ក្រោយមានសេរីភាព អ្នកស្រីទេព វន្នី សុំឲ្យមានការដោះលែងសកម្មជនអតីតបក្សប្រឆាំងនិងអតីតអ្នកកាសែត
នៅម៉ោងប្រមាណ៨និង៣០នាទីយប់មិញនេះ អ្នកស្រីទេព វន្នី សកម្មជនដីធ្លីតំបន់បឹងកក់ត្រូវបានដោះលែងឲ្យមានសេរីភាពវិញហើយ។ ការដោះលែងទាំងយប់នេះ ធ្វើឡើងភ្លាមៗក្រោយពីព្រះមហាក្សត្រកម្ពុជាបានចេញព្រះរាជក្រឹត្យលើកលែងទោសដល់អ្នកស្រី និងសកម្មជនដីធ្លីបីនាក់ទៀត។ បន្ទាប់ពីចេញពីពន្ធនាគារភ្លាម អ្នកស្រីទេព វន្នី បានអំពាវនាវឲ្យមានការដោះលែងសកម្មជនអតីតបក្សសង្រ្គោះជាតិ និងអតីតអ្នកកាសែតអាស៊ីសេរីទាំងពីរនាក់ឲ្យមានសេរីភាពឡើងវិញដូចអ្នកស្រីផងដែរ។
ចុះផ្សាយនៅថ្ងៃ៖
ស្តាប់ - ០២:៣១
ដោយលើកដៃសំពះទៅកាន់កាម៉េរាអ្នកកាសែត និងទូរស័ព្ទរបស់អ្នកគាំទ្រអ្នកស្រី ដែលកំពុងថតផ្សាយផ្ទាល់តាមហ្វេសប៊ុក អ្នកស្រីទេព វន្នី បានអំពាវនាវដល់សហគមន៍អន្តរជាតិ និងប្រទេសមហាអំណាចឲ្យជួយអន្តរាគមន៍មកកាន់លោកនាយករដ្ឋមន្រ្តីហ៊ុន សែន ដើម្បីឲ្យដោះលែងសកម្មជនអតីតបក្សប្រឆាំងទាំង១៥នាក់ និងអតីតអ្នកកាសែតវិទ្យុអាស៊ីសេរី២នាក់ផងដែរ។ អ្នកស្រីទេព វន្នី បានអះអាងថា អ្នកស្រីបានយល់ច្បាស់ពីទុក្ខលំបាករបស់ពួកគេទាំងនោះនៅក្នុងពន្ធនាគារ ថាតើមានការលំបាក និងកើតទុក្ខក្នុងចិត្តបែបណា។ ម្យ៉ាងវិញទៀត អ្នកស្រីក៏លើកឡើងដែរថា ក្រុមគ្រួសាររបស់ពួកគេ ក៏កំពុងរង់ចាំពួកគេត្រឡប់មកផ្ទះវិញ ដើម្បីជួបជុំរីករាយជាមួយក្រុមគ្រួសារ។
ជាមួយនឹងការអំពាវនាវរបស់អ្នកស្រីទេព វន្នីនេះ អតីតបក្សប្រឆាំង និងសង្គមស៊ីវិលក៏សង្ឃឹមថា សកម្មជនអតីតបក្សប្រឆាំង និងអតីតអ្នកកាសែតវិទ្យុអាស៊ីសេរី ក៏នឹងត្រូវបានដោះលែងឲ្យមានសេរីភាពវិញផងដែរ។ លោកអ៊ូ ច័ន្ទរ័ត្ន ដែលជាអតីតតំណាងរាស្រ្តអតីតគណបក្សសង្រ្គោះជាតិ បានលើកឡើងថា ការដោះលែងអ្នកស្រីទេព វន្នីនេះ ជាសញ្ញាវិជ្ជមានសម្រាប់សកម្មជនអតីតបក្សប្រឆាំងទាំង១៥នាក់ និងលោកកឹម សុខា។ ចំណែកលោកកន សាវាង្ស មន្រ្តីជាន់ខ្ពស់នៃអង្គការខុមហ្វ្រែលតាមរយៈហ្វេសប៊ុក បានស្នើសុំព្រះមហាក្សត្រឲ្យព្រះរាជទានលើកលែងទោសដល់អតីតអ្នកកាសែតវិទ្យុអាស៊ីសេរីពីរនាក់ គឺលោកយាង សុជាមេត្តា និងលោកអ៊ួន ឈិន ឲ្យមានសេរីភាពឡើងវិញ។ លោកកន សាវាង្ស ក៏សង្ឃឹមថា តុលាការក្រុងភ្នំពេញនឹងទម្លាក់ការចោទប្រកាន់មកលើពួកគាត់ ។
សូមបញ្ជាក់ថា អ្នកស្រីទេព វន្នី ត្រូវបានដោះលែងចេញពីពន្ធនាគារព្រៃសកាលពីយប់មិញនេះ បន្ទាប់ពីព្រះមហាក្សត្របានចេញព្រះរាជក្រឹត្យលើកលែងទោសដល់អ្នកស្រី និងសកម្មជនបឹងកក់បីនាក់ទៀត។ អ្នកស្រីទេព វន្នី ត្រូវបានតុលាការផ្ដន្ទាទោសចំនួន២ឆ្នាំកន្លះ ដោយចោទប្រកាន់ពីបទ «ប្រមាថអ្នករាជការសាធារណៈ និងបទប្រឆាំងអ្នករាជការសាធារណៈ ដោយមានស្ថានទម្ងន់ទោស»។ ក្រោយមានសេរីភាព អ្នកស្រីទេព វន្នី អះអាងថា នឹងនៅតែបន្តបញ្ចេញមតិ និងសកម្មភាពទៀត រហូតទាល់តែបញ្ហាដីធ្លីនៅតំបន់បឹងកក់ត្រូវបានបញ្ចប់ទាំងស្រុង។
លោកសុខ ឥសាន អ្នកនាំពាក្យគណបក្សប្រជាជនកម្ពុជាបានបញ្ជាក់ថា ការសម្រេចស្នើលើកលែងទោសអ្នកស្រីទេព វន្នីនេះ គឺបង្ហាញពីមនោសញ្ចេតនារបស់លោកនាយករដ្ឋមន្រ្តីហ៊ុន សែន ដែលតែងតែសណ្តោសប្រោសប្រណីដល់ពលរដ្ឋខ្មែរគ្រប់រូបដោយមិនប្រកាន់និន្នាការនយោបាយ ឬអតីតកាលដែលធ្លាប់ជេរប្រមាថលោកនោះឡើយ។ ដូច្នេះហើយ លោកសុខ ឥសាន ប្រាប់ទៅអ្នកស្រីទេព វន្នី ត្រូវចេះភ្ញាក់រលឹក និងគិតពិចារណា កុំភ្លើតភ្លើនតាមការញុះញង់របស់គេ និងកុំចង់ក្លាយជាវីរនារីដោយសារតែការញុះញង់នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ