ក្រុមប្រឹក្សាសិទ្ធិមនុស្សរបស់ UN បារម្ភពីស្ថានភាពសិទ្ធិមនុស្សនៅកម្ពុជា
ក្រុមប្រឹក្សាសិទ្ធិមនុស្សនៃអង្គការសហប្រជាជាតិ បានបើកកិច្ចប្រជុំលើកទី៣៦របស់ខ្លួន នៅទីក្រុងហ្សឺណែវ កាលពីម្សិលមិញ។ នៅក្នុងសេចក្ដីថ្លែងការណ៍បើកកិច្ចប្រជុំនោះ ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បានលើកឡើងពីស្ថានភាពសិទ្ធិមនុស្សនៅកម្ពុជា។ ជាស្ថានភាពសិទ្ធិមនុស្សដែល លោកយល់ថា កំពុងធ្លាក់ទៅក្នុងសភាពគួរឲ្យបារម្ភ។ ប៉ុន្តែប្រធានគណៈកម្មាធិការសិទ្ធិមនុស្សកម្ពុជាបានបដិសេធ។
ចុះផ្សាយនៅថ្ងៃ៖
ស្តាប់ - ០២:៣៤
លោក ហ្សេដ រ៉ាអាដ អាល់ ហ៊ូសេន ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បានសម្ដែងក្ដី ព្រួយបារម្ភយ៉ាងខ្លាំង អំពីការចាប់ខ្លួនប្រធានបក្សប្រឆាំង គឺលោក កឹម សុខា។ សម្រាប់លោក ហ្សេដ រ៉ាអាដ អាល់ ហ៊ូសេន ការចាប់ខ្លួននេះ ហាក់ដូចជាបានធ្វើឡើងដោយមិនគោរពតាមនីតិវិធីច្បាប់ត្រឹមត្រូវ ឬអភ័យឯកសិទ្ធិសភារបស់លោក កឹម សុខា។ ឧត្តមស្នងការទទួលបន្ទុកសិទ្ធិមនុស្ស ក៏បានលើកឡើងពីក្ដីព្រួយបារម្ភចំពោះការថ្លែងរបស់លោកនាយករដ្ឋមន្ដ្រី ហ៊ុន សែន និងមន្ដ្រីជាន់ខ្ពស់រដ្ឋាភិបាលមួយចំនួនផងដែរ ដែលតែងតែលើកឡើងពីទោសក្បត់ជាតិរបស់លោក កឹម សុខា ជាសាធារណៈ។ ជាការថ្លែងដែលលោក អាល់ ហ៊ូសេន ចាត់ទុកថាបានរំលោភទៅលើការសន្មតថាគ្មានទោស និងទទួលបានការជំនុំជម្រះក្ដីដោយយុត្តិធម៌។
មិនត្រឹមតែប៉ុណ្ណោះ លោក អាល់ ហ៊ូសេន ក៏បានលើកឡើងផងដែរ អំពី ការបិទអង្គការសង្គមស៊ីវិលអន្ដរជាតិ NDI ការដកហូតអាជ្ញាប័ណ្ណរបស់វិទ្យុមួយចំនួន និងការបិទទ្វាររបស់កាសែត The Cambodia Daily។ តាមរយៈក្ដីព្រួយបារម្ភអស់ទាំងនេះ ឧត្តមស្នងការទទួលបន្ទុកសិទ្ធិមនុស្ស បានជំរុញឲ្យរដ្ឋាភិបាលកម្ពុជា ធានានូវសិទ្ធិនយោបាយ សិទ្ធិស៊ីវិល និងសេរីភាពប្រព័ន្ធផ្សព្វផ្សាយពេញលេញ មុនពេលការបោះឆ្នោតជាតិនៅឆ្នាំក្រោយ។
យ៉ាងណាក៏ដោយ សេចក្ដីព្រួយបារម្ភអស់ទាំងនេះ ត្រូវបានច្រានចោលដោយលោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា។ នៅក្នុងសេចក្ដីថ្លែងការណ៍ នៅថ្ងៃទី១១កញ្ញា លោក កែវ រ៉េមី បានអះអាងថា ការចាប់ខ្លួនលោក កឹម សុខា ការបិទប្រព័ន្ធផ្សព្វផ្សាយមួយចំនួន រួមទាំងអង្គការក្រៅរដ្ឋាភិបាលមួយ គឺធ្វើឡើងដោយអនុលោមតាមនីតិវិធីច្បាប់និងប្រព័ន្ធតុលាការ។ ប៉ុន្តែលោក កែវ រ៉េមី កត់សម្គាល់ឃើញថា រឿងរ៉ាវទាំងនេះ បែរជាត្រូវបានបកស្រាយខុស ថាជាការបំពានអភ័យឯកសិទ្ធិសភា គំរាមកំហែងសេរីភាពសារព័ត៌មាន ឬជាចេតនារឹតត្បិតសេរីភាពក្នុងការបញ្ចេញមតិទៅវិញ។
ប្រធានគណៈកម្មាធិការសិទ្ធិមនុស្សកម្ពុជា បានឆ្លៀតយកឱកាសនេះ អះអាងពីឆន្ទៈរបស់កម្ពុជា ក្នុងការលើកកម្ពស់កិច្ចការពារសិទ្ធិមនុស្សនៅកម្ពុជា។ លោក កែវ រ៉េមី ស្នើផងដែរថា រាល់ទំនាក់ទំនង កិច្ចសហប្រតិបត្តិការ និងភាពជាដៃគូទាំងអស់ គួរតែធ្វើឡើងដោយការគោរពគ្នាទៅវិញទៅមក ចៀសឲ្យផុតពីការជ្រៀតជ្រែកកិច្ចការផ្ទៃក្នុងនៃដែនយុត្តាធិការរបស់រដ្ឋភាគីនីមួយៗ ដូចមានចែងក្នុងធម្មនុញ្ញរបស់អង្គការសហប្រជាជាតិ។ នេះបើតាមលោក កែវ រ៉េមី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ