កម្ពុជានឹងជួបគ្រោះរាំងស្ងួតធ្ងន់ធ្ងរខ្លាំងពីពេលនេះរហូតដល់ដើមឆ្នាំ២០២០
ប្រទេសកម្ពុជានឹងជួបគ្រោះរាំងស្ងួតធ្ងន់ធ្ងរខ្លាំង ចាប់ពីពេលនេះ រហូតដល់ខែមករា ឆ្នាំ២០២០។ គណៈកម្មការទន្លេមេគង្គបានទាញសញ្ញាប្រកាសអាសន្នយ៉ាងដូច្នេះ តាមរយៈសេចក្ដីប្រកាសព័ត៌មានបន្ទាន់មួយ នៅថ្ងៃអង្គារ ទី១៩វិច្ឆិកា។ បើតាមគណៈកម្មការទន្លេមេគង្គ គ្រោះរាំងស្ងួតនេះ កើតឡើងដោយសារតែបរិមាណទឹកភ្លៀងមិនគ្រប់គ្រាន់ក្នុងអំឡុងរដូវវស្សា និងបាតុភាពអែលនីញ៉ូ ដែលបង្កឲ្យមានកម្ដៅ ក៏ដូចជារំហួតខ្ពស់ខុសប្រក្រតី។
ចុះផ្សាយនៅថ្ងៃ៖
ស្តាប់ - ០២:២២
ការព្យាករណ៍របស់គណៈកម្មការទន្លេមេគង្គឲ្យដឹងថា តំបន់ភាគឥសាននៅកម្ពុជា រួមមានខេត្តឧត្តរមានជ័យ ព្រះវិហារ និងខេត្តសៀមរាប នឹងរងផលប៉ះពាល់ដោយសារគ្រោះរាំងស្ងួតខ្លាំងបំផុត។ ភាពរាំងស្ងួតនេះ នឹងចាប់ផ្ដើមនៅក្នុងអំឡុងសប្ដាហ៍ទី៣ និងសប្ដាហ៍ទី៤នៃខែវិច្ឆិកា ហើយស្ថានភាពនេះនឹងវិវត្តធ្ងន់ធ្ងរឡើង ចាប់ពីខែធ្នូ រហូតដល់ខែមករា ឆ្នាំ២០២០។ ស្ថិតក្នុងអំឡុងពេលនេះ តំបន់ជាច្រើននៅតាមដងទន្លេមេគង្គ មានភ្លៀងធ្លាក់តិចតួច ឬគ្មានភ្លៀងតែម្ដង។
លោកបណ្ឌិត ឡាំ ហុងសឺន ប្រធានមជ្ឈមណ្ឌលគ្រោះរាំងស្ងួតនិងទឹកជំនន់ប្រចាំតំបន់ នៃលេខាធិការដ្ឋានគណៈកម្មការទន្លេមេគង្គ បានគូសបញ្ជាក់ថា អាកាសធាតុស្ងួតរយៈពេលយូរនៅឆ្នាំនេះ អាចបង្កផលប៉ះពាល់ជាអវិជ្ជមានដល់ដំណាំនិងផលិតផលកសិកម្ម។ ហើយប្រសិនបើគ្រោះរាំងស្ងួតនៅតែបន្ត នោះវាអាចបង្កឲ្យមានបញ្ហាកង្វះទឹកប្រើប្រាស់ថែមទៀត។ នេះបើតាមលោកបណ្ឌិត ឡាំ ហុងសឺន។
ជាការកត់សម្គាល់ ក្រៅពីកម្ពុជា គ្រោះរាំងស្ងួតធ្ងន់ធ្ងរនេះក៏កើតមាននៅខេត្តចំនួន១២នៅតំបន់ភាគខាងជើងនិងតំបន់ឥសាននៃប្រទេសថៃផងដែរ។ ចំណែក តំបន់ភាគកណ្ដាលនិងភាគខាងជើងនៃប្រទេសឡាវ រួមមានខេត្តវៀងចន្ទ សាយសូមបុណ្យ សាយ៉ាបូរី និងខេត្តលួងប្រាបាង រងផលប៉ះពាល់ដែរ ប៉ុន្តែតិចតួចជាង។ ដោយឡែក នៅដែនដីសណ្ដរមេគង្គនៃប្រទេសវៀតណាមវិញ ថ្វីដ្បិតតែមិនមានសញ្ញាពីគ្រោះរាំងស្ងួត ប៉ុន្តែលំហូរនៃទឹកប្រៃ អាចក្លាយជាបញ្ហា បង្កជាហានិភ័យខ្លះៗដល់ដំណាំកសិកម្ម។
សូមជម្រាបថា គ្រោះរាំងស្ងួតនាឆ្នាំ២០១៩នេះ បានបណ្ដាលឲ្យទឹកទន្លេមេគង្គធ្លាក់ចុះដល់កម្រិតទាបបំផុតនៅក្នុងរយៈពេល៦០ឆ្នាំចុងក្រោយ។ តំបន់ភាគច្រើននៃដងទន្លេបានជួបប្រទះនូវលំហូរទឹកទាបគួរឲ្យកត់សម្គាល់ ចាប់តាំងពីខែមិថុនាមកម្ល៉េះ។ យ៉ាងណាក៏ដោយ គណៈកម្មការទន្លេមេគង្គរំពឹងទុកថា ស្ថានភាពរាំងស្ងួត នឹងមានភាពប្រសើរឡើងជាងមុនបន្តិចម្ដងៗ ចាប់ពីសប្ដាហ៍ទី២នៃខែមករាឆ្នាំ២០២០ ដោយសារតែអាកាសធាតុនឹងប្រែមកមានសំណើមបន្តិចវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ