អំពើចោរកម្មដ៏សាហាវកំពុងគំរាមសុវត្ថិភាពពលរដ្ឋខ្មែរ
រយៈពេលប៉ុន្មានសប្តាហ៍ចុងក្រោយនៃខែធ្នូនេះ អំពើប្លន់សម្លាប់ បានកើតមានឡើង យ៉ាងកក្រើក ទាំងនៅរាជធានី និងនៅតាមបណ្តាខេត្ត។ អំពើចោរកម្មដែលគេគិតថាមានខ្សែបណ្តាញនេះ បានគំរាមដល់សុវត្ថិភាពពលរដ្ឋនិងបានធ្វើអោយលោក នាយករដ្ឋមន្ត្រីហ៊ុន សែន បញ្ជាអោយស្ថាប័នពាក់ព័ន្ធ និងអាជ្ញាធរគ្រប់មូលដ្ឋាន បង្កើនប្រតិបត្តិការបង្រ្កាប និងវែកមុខជនពាក់ព័ន្ធ។ ក្រសួងមហាផ្ទៃ និងក្រសួងយុត្តិធម៌ កំពុងដុតដៃដុតជើង ដើម្បីរក្សាសុខសុវត្ថិភាពជូនពលរដ្ឋឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
នៅខេត្តកំពត នៅវេលាម៉ោង២ រំលងអាធ្រាត្រ ចូលថ្ងៃទី៩ ខែធ្នូ ជនប្រដាប់អាវុធ២នាក់ ជាមួយនឹងកាំភ្លើងខ្លី២ដើម បានចូលទៅធ្វើសកម្មភាពភ្ជង់ និងចាប់ចងស្រ្តីជាម្ចាស់ផ្ទះ រួចហើយប្លន់យកគ្រឿងអល្លង្កា និងលុយមួយចំនួន មុនពេលពួកវា បានរត់គេចខ្លួនបាត់។
នៅខេត្តបាត់ដំបង នៅវេលាម៉ោង០៧៖៣០ នាទីយប់ ថ្ងៃទី៩ ខែធ្នូ ក្រុមចោរប្រដាប់អាវុធ៣ បានចូលប្លន់ផ្ទះថៅកែម៉ាស៊ីនកិនស្រូវប្រមូលយកមាស ប្លាទីន និងលុយប្រមាណជាង១ម៉ឺនដុល្លារ ហើយគេចខ្លួនបាត់។
នៅភ្នំពេញ ក្នុងខណ្ឌទួលគោក ឯណេះវិញ នៅព្រឹកថ្ងៃទី ១១ ធ្នូ យុវជនម្នាក់ ត្រូវបានជនសង្ស័យ៤នាក់ ជិះម៉ូតូ២គ្រឿង បាញ់សម្លាប់ ប្លន់យកម៉ូតួមួយគ្រឿង ហើយជិះចេញទៅដោយ សុវត្ថិភាព។ នៅថ្ងៃដដែលនេះដែរ កម្លាំងអាវុធហត្ថ បានបើកប្រតិបត្តិការ បង្រ្កាបក្រុមចោរ ប្លន់នេះ ចាប់បាន៤នាក់ និងបាញ់សម្លាប់២នាក់ ដោយសារតដៃនឹងសមត្ថកិច្ច។ បន្ទាប់មក នៅយប់ថ្ងៃទី ១២ ធ្នូ អំពើចោរកម្ម ប្លន់សម្លាប់ ៣ករណី បានកើតមានឡើងផ្ទួនៗគ្នាទៅក្នុងខេត្តចំនួន៣គឺ បាត់ដំបង ពោធិ៍សាត់ និងកណ្តាល។
រំលង១ថ្ងៃ គឺនៅថ្ងៃទី ១៤ ខែធ្នូ លោកនាយករដ្ឋមន្ត្រី ហ៊ុន សែន បានបញ្ជាអោយ កម្លាំងមានសមត្ថកិច្ច ទាំងអស់ បើកប្រតិបត្តិការដើម្បីទប់ស្កាត់ និងបង្រ្កាបចំពោះអំពើប្លន់ប្រដាប់អាវុធ និងក្រុមជនឃោរឃៅ។ លោក នាយករដ្ឋមន្ត្រីហ៊ុន សែន ក៏បាន អំពាវនាវឱ្យ ក្រសួងយុត្តិធម៌ និងក្រសួងមហាផ្ទៃ ពិនិត្យឡើងវិញ ចំពោះការស្នើលើកលែងទោសដល់ទណ្ឌិត ដែលពាក់ព័ន្ធនឹងអំពើប្លន់ និងគ្រឿងញៀន ផងដែរ។
នៅថ្ងៃទី ១៤ ខែធ្នូ ដដែល រដ្ឋមន្រ្តីក្រសួងយុត្តិធម៌ បានចេញលិខិតមួយកោះហៅ ព្រះរាជអាជ្ញាទូទាំងប្រទេស បើកកិច្ចប្រជុំនៅថ្ងៃទី១៨ ខែធ្នូ ដើម្បីពិភាក្សាអំពីការលើកលែងទោស និងពិនិត្យសំណុំរឿង លួច ឆក់ និងប្លន់ នៅក្នុងប្រទេសកម្ពុជា។
នៅថ្ងៃបន្ទាប់ លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាអោយស្នងការនគរបាលខេត្តបាត់ដំបង ពោធិ៍សាត់ និងកណ្ដាល ត្រូវរកអោយឃើញក្រុមចោរប្លន់ប្រដាប់អាវុធដែលបានបាញ់ប្លន់ប្រជាពលរដ្ឋយកទ្រព្យសម្បត្តិ និងបណ្តាលអោយមនុស្សស្លាប់ ហើយពួកគេអាចប្រឈមនឹងការទម្លាក់បុណ្យស័ក្តិ ប្រសិនបើពួកគេមិនអាចចាប់ខ្លួនជនសង្ស័យ នៅក្នុងករណីទាំងនេះបាន ។
ទោះជាមានការដុតដៃដុតជើងពីស្ថាប័នពាក់ព័ន្ធយ៉ាងដូច្នេះក្តី ក៏នៅព្រឹកថ្ងៃទី១៩ ខែធ្នូ ឆ្នាំ២០១៥នេះ ក៏អំពើចោរកម្មប្លន់សម្លាប់បានកើតមានឡើងផ្សារតាឡាត់ ស្រុកភ្នំស្រួច ខេត្តកំពង់ស្ពឺ ហើយស្មៀនម្នាក់ត្រូវក្រុមចោរបាញ់សំលាប់។
ដោយឡែក នៅយប់ថ្ងៃទី ១៩ ដដែលនេះ អំពើប្លន់ ក៏បានកើតមានឡើងទៅលើថៅកែលក់ជីកសិកម្មនៅខេត្តព្រះវិហា ឯណោះផងដែរ។
សូមបញ្ជាក់ដែរថា នៅថ្ងៃទី២០ ខែធ្នូ ឆ្នាំ២០១៥ មានអាជីវករលក់មាស និងដូរលុយមួយចំនួននៅក្នុងផ្សារកំពង់ប្រណាក ក្រុងព្រះវិហារ រួមទាំងម្ចាស់ហាងវេរលុយវីងខ្លះបានសម្រេចបិទតូប និងផ្អាកអាជីវកម្ម ដោយសារផ្អើល និងភ័យខ្លាចខ្លាំងទៅនឹងដំណឹងក្រុមចោរចូលប្លន់ថៅកែលក់ជី កសិកម្មកាលពីយប់ថ្ងៃទី១៩ធ្នូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ