មន្ត្រីបក្សប្រឆាំង៣រូបដែលកំពុងជាប់ពន្ធនាគារសុំលាលែង ដើម្បីជៀសវាងប៉ះពាល់ដល់បក្សព្រោះច្បាប់ថ្មី
មន្ត្រីជាន់ខ្ពស់បក្សប្រឆាំងបីរូប គឺលោកហុង សុខហួរ លោកអ៊ុំ សំអាន និងមាជ សុវណ្ណារ៉ាដែលកំពុងជាប់ពន្ធនាគារព្រៃស បានសុំលាលែងពីសមាជិកភាពនៃគណៈកម្មាធិការនាយករបស់គណបក្ស។ នេះបើតាមយោងតាមលិខិតលាលែងដាច់ដោយឡែកពីគ្នារបស់គេកាលពីយប់មិញ។ មូលហេតុសំខាន់នៃការសុំលាលែងព្រមគ្នានេះ គឺដើម្បីជៀសវាងប៉ះពាល់ដល់គណបក្សមុននឹងច្បាប់គណបក្សនយោបាយថ្មីចាប់ផ្តើមអនុវត្ត។
ចុះផ្សាយនៅថ្ងៃ៖
ស្តាប់ - ០២:២៣
លោកហុង សុខហួរ សមាជិកព្រឹទ្ធសភាគណបក្សសម រង្ស៊ី បានសុំលាលែងពីតំណែងជាអគ្គលេខាធិការ និងសមាជិកគណៈកម្មាធិការនាយកគណបក្សសម រង្ស៊ី។ រីឯលោកអ៊ុំ សំអាន តំណាងរាស្ត្រ និងលោកមាជ សុវណ្ណារ៉ា ប្រធាននាយកដ្ឋានព័ត៌មានបានសុំលាលែងពីសមាជិកភាពគណៈកម្មាធិការនាយកគណបក្សសង្គ្រោះជាតិ។ អ្នកទាំងបីសុទ្ធតែលើកហេតុផលដូចគ្នាថា ដោយសារតែមូលហេតុផ្ទាល់ខ្លួន។
ក៏ប៉ុន្តែបើតាមគណីហ្វេសប៊ុករបស់លោកមាជ សុវណ្ណារ៉ា ការសុំលាលែងនេះ គឺដើម្បីកុំឲ្យប៉ះពាល់ដល់គណបក្សប្រឆាំងតាមឧបសគ្គច្បាប់គណបក្សនយោបាយថ្មីត្រង់មាត្រា១៨ថ្មី ដែលបានចែងថា«ប្រធាន អនុប្រធាន និងសមាជិកគណៈកម្មាធិការនាយកដែលមានទោស មិនត្រូវឲ្យមានតួនាទីនៅក្នុងគណបក្ស»។ ក្នុងន័យនេះ បើទោះបីមន្ត្រីទាំងបីនាក់មិនលាលែងក៏គង់តែត្រួវអស់តួនាទីនៅក្នុងគណបក្សដដែលដូចដដែលនៅពេលដែលច្បាប់ស្តីពីគណបក្សនយោបាយថ្មីចាប់អនុវត្តនោះ។ ហើយនេះ ក៏ជាអ្វីដែលលោកសម រង្ស៊ី អតីតប្រធានគណបក្សសង្គ្រោះជាតិធ្លាប់បានធ្វើផងដែរកាលពីប៉ុន្មានសប្តាហ៍កន្លងទៅនេះ។
ការសុំលាលែងពីតួនាទីនៅក្នុងគណបក្សរបស់មន្ត្រីទាំងបីរូបនេះ បានកើតឡើងមុនច្បាប់ស្តីពីគណបក្សនយោបាយថ្មីនឹងត្រូវចូលជាធរមានក្នុងពេលដ៏ខ្លីខាងមុខនេះ ក្រោយពីច្បាប់ដ៏ចម្រូងចម្រាសមួយនេះត្រូវតំណាងរាស្ត្រគណបក្សប្រជាជនកម្ពុជាសម្រេចអនុម័តធ្វើវិសោធនកម្មដោយគ្មានវត្តមានតំណាងរាស្ត្រគណបក្សសង្គ្រោះជាតិសូម្បីតែម្នាក់កាលពីថ្ងៃទី២០ កុម្ភៈកន្លងទៅ។ ច្បាប់ថ្មីនេះ ត្រូវបានគណបក្សប្រឆាំង និងអ្នកវិភាគទាំងឡាយមើលឃើញថានឹងក្លាយជាឧបករណ៍របស់រដ្ឋាភិបាលក្នុងការគាបសង្កត់ទៅលើគណបក្សសង្គ្រោះជាតិ បើទោះបីគណបក្សប្រជាជនកម្ពុជាបញ្ជាក់ហើយថា វានឹងអនុវត្តលើគ្រប់គណបក្សទាំងពួងរួមទាំងគណបក្សកាន់អំណាចផង។
សូមបញ្ជាក់ថា លោកហុង សុខហួរ ត្រូវបានតុលាការក្រុងភ្នំពេញផ្តន្ទាទោសរយៈពេល៧ឆ្នាំនៅក្នុងពន្ធនាគារក្រោមបទចោទប្រកាន់ចំនួនបី គឺបទក្លែងឯកសារសាធារណៈ ការប្រើប្រាស់ឯកសារសាធារណៈក្លែងនិងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គមពាក់ព័ន្ធនឹងសន្ធិសញ្ញាព្រំដែនកម្ពុជា និងវៀតណាម។ ចំណែកលោកអ៊ុំ សំអាន ត្រូវតុលាការកាត់ទោស២ឆ្នាំកន្លះ និងពិន័យជាប្រាក់ចំនួន៤លានរៀលពីបទ បទញុះញង់នាំឲ្យមានការរើសអើង និងប្រព្រឹត្តបទឧក្រិដ្ឋជាអាទិ៍ ទាក់ទងនឹងការផ្សព្វផ្សាយឯកសារផែនទីព្រំដែនកម្ពុជា-វៀតណាម។ រីឯលោកមាជ សុវណ្ណារ៉ាវិញ ត្រូវបានតុលាការផ្តន្ទាទោសចំនួន២០ឆ្នាំពីបទដឹកនាំកុបកម្ម និងចលនាចូលរួមកុបកម្មបង្កឲ្យមានអំពើហិង្សានៅក្បែរទៅលានប្រជាធិបតេយ្យកាលពីខែកក្កដា ឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ