សមត្ថកិច្ចខេត្តកណ្ដាលរើផ្ទះបីខ្នង ក្រោមសម្រែកទ្រហោយំរបស់ម្ចាស់ផ្ទះ
សមត្ថកិច្ចខេត្តកណ្ដាល កាលពីថ្ងៃទី ០៨ កញ្ញា ម្សិលមិញ បានរុះរើផ្ទះប្រជាពលរដ្ឋចំនួនបីខ្នង នៅក្នុងភូមិទួលក្រសាំង ឃុំរកាខ្ពស់ ស្រុកស្អាង ខេត្តកណ្ដាល។ ការរុះរើនេះធ្វើឡើងតាមអំណាចសាលដីការបស់តុលាការកំពូល ដើម្បីយកដីជូនភាគីឈ្នះក្ដី។ ខណៈភាគីចាញ់ក្ដីទាំងបីគ្រួសាររារាំង ស្រែកទ្រហោយំ ដេកននាលដី មិនឲ្យអាជ្ញាធររុះរើ ដោយចាត់ទុកសេចក្ដីសម្រេចរបស់តុលាការកំពូលថា គឺអយុត្តិធម៌។អត្ថបទដោយ៖ យ៉ា រសាត់
ចុះផ្សាយនៅថ្ងៃ៖
ស្តាប់ - ០២:៣៧
ផ្ទះចំនួនបីខ្នងធ្វើអំពីឈើ ប្រក់ស័ង្កសីមួយខ្នង និងផ្ទះថ្មប្រក់ស័ង្កសីពីរខ្នង ត្រូវបានកម្លាំងសមត្ថកិច្ចចម្រុះខេត្តកណ្ដាល វាយកម្ទេចចោលគ្មានប្រណី បើទោះបីជាមានការរារាំងពីម្ចាស់ផ្ទះយ៉ាងណាក៏ដោយ។
នៅពេលបានឃើញសមត្ថកិច្ចជាច្រើននាក់ រួមនឹងគ្រឿងចក្របម្រុងចូលទៅរើផ្ទះរបស់ខ្លួន ក្រុមគ្រួសារម្ចាស់ផ្ទះប្រុសស្រី បាននាំគ្នាចេញទៅស្រែកផង យំផង ដើម្បីរារាំងក្រុមសមត្ថកិច្ច។ អ្នកខ្លះឡើងអង្គុយលើដៃ លើកង់គ្រឿងចក្រ ខ្លះដេកននាលលើដីពីមុខគ្រឿងចក្រ ខ្លះដុតសម្បកកង់ឡាន អ្នកខ្លះកាន់ដបសាំងគម្រាមចាក់ដុតផ្ទះជាដើម។ សកម្មភាពទាំងនេះបានទាក់ទាញប្រជាពលរដ្ឋជុំវិញ និងអ្នកដំណើរឲ្យឈប់មើលយ៉ាងច្រើនកុះករ ក្នុងទឹកចិត្តអាណិតម្ចាស់ផ្ទះ ជាពន់ពេក។ ក្រៅពីសកម្មភាពខាងលើ ក៏មានការប៉ះទង្គិច ប្រើអំពើហិង្សាដាក់គ្នាទៅវិញទៅមកផងដែរ តែមិនមានអ្នករងរបួសធ្ងន់ធ្ងរទេ។
អស់រយៈពេលជាច្រើនម៉ោង សកម្មភាពទាំងនោះមិនអាចរារាំងក្រុមសមត្ថកិច្ចបានទេ ដោយនៅទីបំផុត គ្រឿងចក្របានសម្រុកចូល រុះរើផ្ទះទាំងបីខ្នងខ្ទេចគ្មានសល់។
មន្ត្រីតុលាការខេត្តកណ្ដាលបានបញ្ជាក់ថា រឿងក្តីនេះបានកើតឡើងតាំងពីឆ្នាំ២០០៤មក។ បើតាមមន្ដ្រីតុលាការដដែល ដើមបណ្ដឹងជាអ្នកឈ្នះក្តីចាប់តាំងពីសាលាដំបូងខេត្តកណ្ដាល សាលាឧទ្ធរណ៍ និងតុលាការកំពូល។ ចំណែកភាគីចាញ់ក្ដី មានបីរូបដែលជាម្ចាស់ផ្ទះត្រូវបានវាយកម្ទេច។ ដីដែលអនុវត្តសាលដីកាឲ្យទៅភាគីឈ្នះក្តី មានទំហំ២៥ម៉ែត្រគុណនឹង១០ម៉ែត្រ ពីរប្លង់ និងដីទំហំ២០ម៉ែត្រគុណនឹង១០០ម៉ែត្រ មួយប្លង់។
សាលដីការបស់តុលាការកំពូល បានបង្គាប់ឲ្យភាគីចាញ់ក្តីរុះរើផ្ទះចេញ ប្រគល់ដីឲ្យភាគីឈ្នះក្ដី និងជួយដោះស្រាយសំណងពីរគ្រួសារ ក្នុងមួយគ្រួសារៗចំនួន១ពាន់ដុល្លារ និងមួយគ្រួសារទៀត ២ពាន់ដុល្លារ តែភាគីចាញ់ក្ដីមិនព្រមរុះរើតាមសាលដីកា។
ប៉ុន្តែបើតាមភាគីចាញ់ក្តីទាំងបីគ្រួសារ ដីនោះ ជាដីពួកគាត់រស់នៅតាំងពីឆ្នាំ១៩៨៧ ហើយក៏មានការទទួលស្គាល់ពីប្រធានភូមិ មេឃុំដែរ។ ភាគីចាញ់ក្ដីបន្ដថា សាលក្រមឲ្យពួកគាត់ចាញ់ក្ដី ជារឿងអយុត្តិធម៌។
ជាមួយគ្នានោះ សាលាដំបូងខេត្តកណ្តាល ក៏បានចេញសេចក្តីថ្លែងការណ៍មួយផងដែរដោយបញ្ជាក់ឲ្យដឹងថា មុនពេលមានវិវាទ ភាគីដែលត្រូវកម្លាំងមានសមត្ថកិច្ចចុះរុះរើផ្ទះខាងលើ បានសុំម្ចាស់ដីស្នាក់នៅជាបណ្តោះអាសន្ន។ ក្រោយមកពួកគេខាងលើបានសាងសង់លំនៅឋានដោយគ្មានច្បាប់អនុញ្ញាត និងម្ចាស់ដីពុំបានដឹង។ លុះឃើញដូច្នេះ ម្ចាស់ដីបានស្នើសុំឲ្យរុះរើ និងឲ្យចាកចេញ តែពួកគេមិនព្រម ដោយអះអាងថា សុខចិត្តស្លាប់ក៏មិនចេញដែរ។ ដោយសារតែភាគីចាញ់ក្ដីមិនព្រមរុះរើដូច្នេះហើយ ទើបឈានដល់ការអនុវត្តសាលដីកា ដោយវាយកម្ទេចផ្ទះនៅថ្ងៃទី៨សីហាតែម្ដង។
យ៉ាងណាក៏ដោយ ការអនុវត្តសាលដីកានេះ ហាក់ផ្ទុយពីគោលការណ៍របស់ក្រសួងរៀបចំដែនដី ដែលកន្លងមកតែងតែអះអាងថា នឹងដោះស្រាយបញ្ហាទំនាស់ដីធ្លីជូនប្រជាពលរដ្ឋដោយសន្ដិវិធី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ