អ្នកទេសចរបរទេស ហូរចូលមកកម្ពុជាជាមួយនឹងប្រាក់ចំណូល ក៏ដូចជាបញ្ហាដែលត្រូវប្រុងប្រយ័ត្ន
ចុះផ្សាយនៅថ្ងៃ៖
ស្តាប់ - ០៤:៤៦
ប្រទេសកម្ពុជារស់នៅពឹងផ្អែកមួយផ្នែកធំ លើវិស័យទេសចរណ៍។ ប៉ុន្មានឆ្នាំចុងក្រោយនេះ កម្ពុជាទទួលបានការចាប់អារម្មណ៍និងទទួលស្គាល់កាន់តែច្រើន អំពីវិស័យទេសចរណ៍ ធ្វើឲ្យភ្ញៀវទេសចរបរទេសដែលចូលមកកម្ពុជា មានការកើនឡើងជាលំដាប់។ ជាការពិតហើយថា អ្នកទេសចរបរទេស ហូរចូលមកកម្ពុជាជាមួយនឹងប្រាក់ចំណូលច្រើន។ ប៉ុន្តែអ្នកជំនាញលើវិស័យទេសចរណ៍បានក្រើនរំលឹកថា មានបញ្ហាមួយចំនួនក៏ហូរចូលមកកម្ពុជាដោយសារទេសចរបរទេសដែរ ដែលទាមទារឲ្យរដ្ឋាភិបាលកម្ពុជាប្រុងប្រយ័ត្ន។
វិស័យទេសចរណ៍ ជាសសរស្ដម្ភសេដ្ឋកិច្ចដ៏សំខាន់មួយ ក្នុងចំណោមសសរស្ដម្ភសេដ្ឋកិច្ចសំខាន់ៗទាំង៤របស់កម្ពុជា។ ប៉ុន្មានឆ្នាំចុងក្រោយនេះ ចំនួនភ្ញៀវទេសចរដែលមកកម្សាន្តនៅកម្ពុជា មានចំនួនកើនឡើងជាលំដាប់។ នៅឆ្នាំ២០១៤ កម្ពុជាទទួលភ្ញៀវទេសចរបរទេសបានចំនួន៤លាន៥សែននាក់ និងរកចំណូលបាន២ពាន់លានដុល្លារ។ រហូតដល់ឆ្នាំ២០១៥ ចំនួនភ្ញៀវទេសចរបានលោតឡើងរហូតដល់ទៅ៤លាន៧សែននាក់ និងបន្តកើនឡើងដល់ ៥លាននាក់នៅក្នុងឆ្នាំ២០១៦។ ចំណែកនៅឆ្នាំ២០១៧នេះ ក្នុងរយៈពេល១ឆមាសដើមឆ្នាំ កម្ពុជាទាក់ទាញបានភ្ញៀវទេសចរជាង២លាន៦លាននាក់។ ទន្ទឹមគ្នានេះ រដ្ឋាភិបាលកម្ពុជា និងផ្នែកឯកជនក្នុងវិស័យនេះ មានគម្រោងទាក់ទាញភ្ញៀវទេសចរឲ្យបាន៧លាន៥សែននាក់ នៅក្នុងឆ្នាំ២០២០ខាងមុខ។ ហើយប្រសិនបើគោលដៅនៅក្នុងឆ្នាំ២០២០សម្រេចបានមែននោះ ប្រាក់ចំណូលប្រមាណ៥ពាន់លានដុល្លារនឹងហូរចូលសេដ្ឋកិច្ចប្រទេសកម្ពុជា ជាមួយការងារសម្រាប់ប្រជាជនជាង១លាននាក់។
ជាការពិត កំណើនភ្ញៀវទេសចរដែលមកកម្សាន្តនៅកម្ពុជាជារៀងរាល់ឆ្នាំនេះ មិនមែនជារឿងចៃដន្យទេ។ រដ្ឋាភិបាល តាមរយៈក្រសួងទេសចរណ៍ បានធ្វើកិច្ចការងារជាច្រើន ដើម្បីទាក់ទាញទេសចរបរទេសឲ្យមកកាន់កម្ពុជា និងជាពិសេស ធ្វើឲ្យអ្នកទាំងនោះបន្តត្រឡប់មកកម្ពុជាជាថ្មីម្ដងទៀត។ ការងារមួយចំនួនដែលរដ្ឋាភិបាលអនុវត្តបានជោគជ័យ រួមមានការពង្រីកគោលដៅទេសចរណ៍ និងការបង្កើតជើងហោះហើរផ្ទាល់ពីបរទេសជាដើម។ ជាងនេះទៅទៀត យុទ្ធនាការកម្ពុជា ព្រះរាជាណាចក្រអច្ឆរិយៈ ក៏ដូចជាចលនាប្រឡងប្រណាំងទីក្រុងស្អាត រមនីយដ្ឋានស្អាត សេវាល្អ ក៏បានចូលរួមយ៉ាងសកម្មក្នុងការទាក់ទាញភ្ញៀវទេសចរបរទេសមកកាន់កម្ពុជាផងដែរ។
ការងារទាំងនេះ ក្រៅតែពីបានទាក់ទាញភ្ញៀវទេសចរហើយ វាក៏បានលើកកម្ពស់កិត្យានុភាពរបស់កម្ពុជា នៅលើវេទិកាពិភពលោកផងដែរ។ ជាក់ស្ដែង តាមរយៈគេហទំព័រ TripAdvisor ដែលល្បីល្បាញក្នុងការផ្ដល់ប្រឹក្សាផ្នែកទេសចរណ៍ ប្រាសាទអង្គរវត្តក្នុងខេត្តសៀមរាបរបស់កម្ពុជាបានជាប់ជាគោលដៅទេសចរណ៍ល្អបំផុតលេខ១ នៅលើពិភពលោក ជាលើកទី២ បន្ទាប់ពីបានទទួលកិត្តិយសនេះម្ដងរួចហើយកាលពីឆ្នាំ២០១៥។ គេហទំព័រសម្រាប់ដំណើរកម្សាន្ត Travel And Leisure ក៏បានចាត់ថ្នាក់ខេត្តសៀមរាប ថាជាទីក្រុងដ៏ល្អបំផុតមួយរបស់ពិភពលោកផងដែរ។
ដោយឡែក នៅក្នុងការគ្រប់គ្រងវិស័យទេសចរណ៍ ក្រសួងទេសចរណ៍បានដាក់ដំណើរការប្រព័ន្ធចុះបញ្ជីអាជ្ញាប័ណ្ណពាណិជ្ជកម្មនិងមគ្គុទ្ទេសក៍ទេសចរណ៍តាមប្រព័ន្ធអ៊ីនធឺណែត។ ប្រព័ន្ធថ្មីនេះ ជួយកាត់បន្ថយពេលវេលានិងការចំណាយមិនចាំបាច់ ក្នុងការដាក់ពាក្យសុំអាជ្ញាប័ណ្ណរបស់អាជីវករ។ ហើយរដ្ឋាភិបាលក៏អាចត្រួតពិនិត្យលើអាជីវកម្មនិងមគ្គុទ្ទេសក៍ទេសចរណ៍ដែលគ្មានអាជ្ញាប័ណ្ណ បានកាន់តែប្រសើរជាងមុនផងដែរ។ ក្រៅពីនេះ ក្រសួងទេសចរណ៍ ក៏បានណែនាំឲ្យអាជីវកម្មមណ្ឌលកម្សាន្តទេសចរណ៍មនុស្សពេញវ័យទាំងអស់ ពង្រឹងគុណភាពបុគ្គលិករបស់ខ្លួន ហើយក្រសួងគាំទ្រទាំងស្រុងនូវការបណ្ដុះបណ្ដាលទាំងឡាយណាដែលរួមចំណែកអភិវឌ្ឍធនធានមនុស្សក្នុងវិស័យទេសចរណ៍។ លើសពីនេះ ក្រសួងក៏បានបង្កើតយុទ្ធសាស្ត្រត្រៀមខ្លួនសម្រាប់ទេសចរចិន China Ready ផងដែរ ដើម្បីទាក់ទាញភ្ញៀវទេសចរចិនមកកម្ពុជាឲ្យកាន់តែច្រើនឡើងថែមទៀត។ ទាំងនេះគឺជាជំហានវិជ្ជមានដែលអ្នកជំនាញទេសចរណ៍អះអាងថា នឹងជួយបង្កើនចំនួនអ្នកទេសចរបរទេសចូលមកកម្ពុជា។
យ៉ាងណាក៏ដោយ ទន្ទឹមនឹងសមិទ្ធិផលគាប់ប្រសើរទាំងនេះ អ្នកជំនាញផ្នែកទេសចរណ៍អះអាងថា នៅមានបញ្ហាមួយចំនួនទៀត ដែលទាមទារឲ្យរដ្ឋាភិបាលកម្ពុជាប្រុងប្រយ័ត្ន និងយកចិត្តទុកដាក់កែលម្អ។
ជាការពិត អ្នកទេសចរបរទេស ហូរចូលមកកម្ពុជាជាមួយនឹងវប្បធម៌បរទេស និងការជួញដូរផ្លូវភេទលើកុមារជាដើម។ ទាំងនេះទាមទារឲ្យមានការប្រុងប្រយ័ត្ន និងចាត់វិធានការការពារឲ្យបានល្អប្រសើរ ធ្វើយ៉ាងណាកុំឲ្យបញ្ហានេះក្លាយជាជំងឺមហារីកព្យាបាលលែងបាន។ ចំណែកបញ្ហាដែលចាំបាច់ឲ្យមានការកែលម្អ មានដូចជាបញ្ហាកាកសំណល់ និងបញ្ហាសន្តិសុខ។ បញ្ហាសន្តិសុខ លួច ឆក់ ប្លន់ ដែលសព្វថ្ងៃកំពុងធ្វើឲ្យអ្នកទេសចរបរទេសព្រួយបារម្ភ។
សរុបមកវិញ តាមរយៈទឡ្ហីករណ៍ដែលបានលើកឡើងខាងដើម គេអាចវាយតម្លៃបានថា វិស័យទេសចរណ៍កម្ពុជាកំពុងតែដើរនៅលើផ្លូវដ៏ត្រឹមត្រូវមួយ។ នេះគឺជាសញ្ញាល្អសម្រាប់កម្ពុជា ដែលរស់នៅពឹងផ្អែកមួយផ្នែកធំ លើវិស័យឧស្សាហកម្មគ្មានផ្សែងនេះ។ យ៉ាងណាក៏ដោយ កម្ពុជានៅមានការងារជាច្រើនទៀតដែលត្រូវធ្វើ ដើម្បីធានានិរន្ដរភាពនៃកំណើនទេសចរ។ ការងារទាំងនោះ មែនទែនទៅមិនមែនជារឿងថ្មីទេសម្រាប់កម្ពុជា ជាអាថិ៍ដូចជា បញ្ហាសន្តិសុខ កាកសំណល់ និងការជួញដូរផ្លូវភេទលើកុមារជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ