៣ខែឆ្នាំ២០១៩ ចំនួនអ្នកស្លាប់ និងរបួសដោយគ្រោះថ្នាក់ចរាចរណ៍កើនឡើងច្រើនធៀបនឹងឆ្នាំ២០១៨
ចំនួនគ្រោះថ្នាក់ ចំនួនអ្នកស្លាប់ និងរបួស ដោយចរាចរណ៍នៅក្នុងត្រីមាសទី១ ឆ្នាំ២០១៩នេះ បានកើនឡើង បើធៀបទៅនឹងរយៈពេលដូចគ្នានៅឆ្នាំ២០១៨។ ប៉ូលីសចរាចរណ៍ ក្រសួងមហាផ្ទៃឲ្យដឹងថា ករណីគ្រោះថ្នាក់ចរាចរណ៍ ដែលបានកើនឡើងនេះ គឺដោយមូលហេតុ មិនគោរពច្បាប់ចរាចរណ៍ ដោយប្រើប្រាស់ល្បឿនហួសកំណត់ និងមិនគោរពសិទ្ធិអ្នកដទៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
តាមរបាយការណ៍របស់ប៉ូលីសចរាចរណ៍ក្រសួងមហាផ្ទៃ ដែលបានបង្ហាញកាលពីថ្ងៃម្សិលមិញនៅក្នុងកិច្ចប្រជុំទប់ស្កាត់គ្រោះថ្នាក់ចរាចរណ៍ផ្លូវគោក គ្រោះថ្នាក់ចរាចរណ៍ប្រចាំត្រីមាសទី១ ឆ្នាំ២០១៩នេះ បានកើតឡើងចំនួន១០៧៦លើក បណ្តាលឲ្យស្លាប់មនុស្សចំនួន៥១៣នាក់ និង របួស ១៥៩២នាក់។
ប្រៀបធៀបត្រីមាសទី១ ឆ្នាំ២០១៨ គ្រោះថ្នាក់បានកើនឡើង២៥៧លើក ខណៈឆ្នាំ២០១៨មានចំនួន៨១៩លើក គឺស្មើនឹង ៣១ភាគរយ ស្លាប់កើនឡើងចំនួន៣៣នាក់ ស្មើ៧ភាគរយ និងរបួសកើន ៣៥៨នាក់ ២៩ភាគរយ ធៀបនឹងឆ្នាំ២០១៨ សម្រាប់រយៈពេលដូចគ្នា។ ភូមិសាស្ត្រដែលមានអ្នកស្លាប់ដោយគ្រោះថ្នាក់ចរាចរណ៍ច្រើនជាងគេ គឺនៅរាជធានីភ្នំពេញចំនួន៩១នាក់ ខេត្តកំពង់ស្ពឺចំនួន៣៩នាក់ និងខេត្តព្រះសីហនុចំនួន៣២នាក់។
ការស្លាប់ដោយគ្រោះថ្នាក់ចរាចរណ៍ច្រើនបែបនេះ បង្ហាញថាមានមនុស្សចំនួន៦នាក់ គិតជាមធ្យម ដែលបានស្លាប់ក្នុងមួយថ្ងៃ និងរបួស១៨នាក់។ ប៉ូលីសឲ្យដឹងថា មូលហេតុចម្បងនៃគ្រោះថ្នាក់ចរាចរណ៍នេះ បណ្តាលមកពីការបើកបរលើសល្បឿនកំណត់ ដែលមាន៤១ភាគរយ មិនគោរពសិទ្ធិអ្នកដទៃចំនួន១៩ភាគរយ មិនប្រកាន់ស្តាំ១៣ភាគរយ បត់នៅក្នុងស្ថានភាពគ្រោះថ្នាក់៩ភាគរយ បើកបរក្រោយមឥទ្ធិពលនៃគ្រឿងស្រវឹង៤ភាគរយ កត្តាយានយន្ត៣ភាគរយ និងងងុយគេង២ភាគរយ។
ជុំវិញការស្លាប់ និងរបួស ដោយគ្រោះថ្នាក់ចរាចរណ៍នៅតែបន្តកើនឡើងដូច្នេះ អ្នកតាមដានសង្គម អ្នកជំនាញផ្នែកចរាចរណ៍នានា មើលឃើញថា មហន្តរាយលើទ្រូងផ្លូវទាំងនេះ គឺដោយសារតែការមិនគោរពច្បាប់របស់អ្នកបើកបរយានយន្ត ខណៈសមត្ថកិច្ច មិនបានចាត់វិធានការម៉ឺងម៉ាត់ ឲ្យមានការគោរពច្បាប់ចរាចរណ៍។ តាមអ្នកតាមដានសង្គម វិធានការអប់រំជុំវិញបញ្ហាចរាចរណ៍នេះ ហាក់ដូចជាហួសពេលទៅហើយ គួបផ្សំនឹងឥរិយាបទអាក្រក់របស់អ្នកបើកបរមួយចំនួនទៀតនោះ វិធានការផ្លូវច្បាប់គួរតែត្រូវបានអនុវត្តឲ្យបានតឹងរឹង ដោយស្មើភាព និងតម្លាភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ