លោក ស ខេង ដាក់ចេញវិធានការ៩ចំណុចទប់ស្កាត់គ្រោះថ្នាក់ចរាចរណ៍ក្នុងឱកាសភ្ជុំបិណ្ឌ
គណៈកម្មាធិការជាតិសុវត្ថិភាពចរាចរណ៍ផ្លូវគោក បានចេញសេចក្ដីអំពាវនាវមួយកាលពិថ្ងៃទី ១៥ កញ្ញា ដោយបានដាក់ចេញនូវវិធានការ ៩ចំណុចដើម្បីជម្រុញដល់អ្នកបើកបរនិងអ្នករួមដំណើរចូលរួមបង្ការ ទប់ស្កាត់គ្រោះថ្នាក់ចរាចរណ៍ក្នុងឱកាសបុណ្យភ្ជុំបិណ្ឌ។ ជាពិធីបុណ្យប្រពៃណីដ៏ធំមួយ ដែលប្រជាពលរដ្ឋខ្មែរនៅទូទាំងប្រទេស ត្រូវវិលត្រឡប់ទៅកាន់ស្រុកកំណើតរៀងៗខ្លួន ដើម្បីជួបជុំគ្រួសារ។
ចុះផ្សាយនៅថ្ងៃ៖
ស្តាប់ - ០១:៤២
ជាសេចក្ដីអំពាវនាវចុះហត្ថលេខាដោយ លោក ស ខេង រដ្ឋមន្ត្រីក្រសួងមហាផ្ទៃនិងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក កាលពីថ្ងៃទី១៥កញ្ញា និងត្រូវបានផ្សាយជាសាធារណៈនៅថ្ងៃទី១៧កញ្ញានេះ។
ដើម្បីបង្ការ ទប់ស្កាត់ និង កាត់បន្ថយគ្រោះថ្នាក់ចរាចរណ៍ផ្លូវគោកក្នុងឱកាសបុណ្យភ្ជុំបិណ្ឌនិងពិធីកាន់បិណ្ឌ ដែលចាប់ផ្ដើមពីថ្ងៃទី១៧ដល់ថ្ងៃទី១តុលា គណៈកម្មាធិការជាតិសុវត្ថិភាពចរាចរណ៍ បានណែនាំដូចតទៅទី១-កុំផ្ទុកមនុស្សឬទំនិញលើសច្បាប់កំណត់ជាពិសេសរថយន្តដឹកអ្នកដំណើរ ឬ ដឹកកម្មករ។ ទី២-ត្រួតពិនិត្យលក្ខណៈបច្ចេកទេសយានជំនិះ។ ទី៣-អ្នកបើករថយន្តនិងអ្នករួមដំណើរពាក់ខ្សែរក្រវ៉ាត់សុវត្ថិភាពឲ្យបានត្រឹមត្រូវ។ ទី៤-អ្នកបើករថយន្តនិងអ្នករួមដំណើរត្រូវពាក់មួកសុវត្ថិភាពឲ្យបានត្រឹមត្រូវគ្រប់ៗគ្នា។ ទី៥-ត្រូវបន្ថយល្បឿនបើកបរតាមច្បាប់កំណត់។ ទី៦-មុននឹងវ៉ាជែង ត្រូវដឹងច្បាស់ថា ខាងមុខទំនេរអាចជែងបានដោយសុវត្ថិភាព។ ទី៧-ត្រូវគោរពសិទ្ធិអាទិភាពនៅត្រង់ផ្លូវប្រសព្វ។ ទី៨-មិនបើកបរក្រោមឥទ្ធិពលនៃជាតិស្រវឹងឬសារធាតុញៀន។ ទី៩-ត្រូវប្រកាន់ខ្ជាប់នូវសុជីវធម៌ សីលធម៌ និងការអធ្យាស្រ័យ។
លោក អ៊ា ចរិយា នាយកវិទ្យាស្ថានសុវត្ថិភាពចរាចរណ៍ លើកឡើងថា ការអំពាវនាវតែមួយមុខនៅមិនទាន់គ្រប់គ្រាន់ ហើយក៏មិនអាចមានប្រសិទ្ធិភាពខ្ពស់ដែរ។ លោកថា ក្រៅពីការអំពាវនាវក្រសួងគួរតែពង្រឹងការអនុវត្តច្បាប់ដោយដាក់កម្លាំងសមត្ថកិច្ចនៅតាមផ្លូវគោលដៅសំខាន់ៗ ដើម្បីត្រួតពិនិត្យកុំឲ្យមានការដឹកលើសចំណុះនិងការជិះលើដំបូលជាដើម។
សូមបញ្ជាក់ថា ក្នុងថ្ងៃធម្មតាគ្រោះថ្នាក់ចរាចរណ៍បានបណ្តាលអោយមនុស្សស្លាប់ចំនួនពី៤ទៅ៥នាក់ក្នុងមួយថ្ងៃៗ ប៉ុន្តែនៅថ្ងៃបុណ្យវិញ ចំនួនអ្នកស្លាប់បានកើនឡើងពី៦ទៅ៧នាក់ឬច្រើនជាងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ