អន្តរាគមន៍របស់រដ្ឋទៅលើតម្លៃដឹកជញ្ជូនគួរតែធ្វើជាបន្ត បើចង់កាត់បន្ថយភាពក្រីក្ររបស់ពលរដ្ឋ
ចុះផ្សាយនៅថ្ងៃ៖
ស្តាប់ - ០៤:៥៣
បញ្ហាឡើងថ្លៃរថយន្តនៅក្នុងអំឡុងបុណ្យធំៗ ឆ្នាំណាក៏បានចោទជាបញ្ហាដែរ ដោយហេតុថា ប្រទេសកម្ពុជាបានអនុវត្តតាមសេដ្ឋកិច្ចទីផ្សារសេរី។ ក៏ប៉ុន្តែរយៈពេល ២ឆ្នាំចុងក្រោយនេះ បញ្ហាសំបុត្រឡានឡើងថ្លៃ ត្រូវបានដោះស្រាយជាបណ្តើរៗហើយ តាមរយៈអន្តរាគមន៍របស់ក្រសួងដឹកជញ្ជូន ខណៈដែលរដ្ឋាភិបាលកម្ពុជាបានស្ថិតនៅក្នុងដំណាក់កាលមួយនៃកំណែទម្រង់។ មកទល់ឆ្នាំនេះជាឆ្នាំទី ២ហើយដែលក្រុមហ៊ុនដឹកជញ្ជូនរថយន្តក្រុងធំៗ ១ចំនួនប្រកាសមិនឡើងថ្លៃសំបុត្រពេលបុណ្យចូលឆ្នាំថ្មី។
នៅកម្ពុជា អ្នកណាក៏ដឹងដែរថា ការចំណាយទៅលើមធ្យោបាយធ្វើដំណើរ នៅក្នុងឱកាសមានបុណ្យទានធំៗ ដូចជាបុណ្យចូលឆ្នាំនេះជាដើម គឺជាបន្ទុកដ៏ធ្ងន់ធ្ងរមួយរបស់ពលរដ្ឋខ្មែរ ដែលភាគច្រើនបានធ្លាក់ទៅលើអ្នកចំណាកស្រុក។ បន្ទុកធ្ងន់ធ្ងរគឺដោយសារតែ ភាគច្រើននៃអ្នកធ្វើដំណើរ មិនមែនជាអ្នកមានជីវភាពធូរធារ ភាគច្រើនគឺជាកម្មករ ពលករ ចំណាកស្រុក ដែលឡើងទៅធ្វើការនៅទីក្រុង និងនៅប្រទេសជិតខាង ដើម្បីបានរស់ និងដោះបំណុលគ្រួសារប៉ុណ្ណោះ។ តាមការប៉ាន់ប្រមាណ មានពលករ និងកម្មករខ្មែរ យ៉ាងហោចក៏ ១,៥ លាននាក់ដែរដែលបានចាកចេញពីស្រុកកំណើតទៅរកការងារធ្វើនៅតាមទីក្រុង ទីប្រជុំជន និងតំបន់កំសាន្តនានា។
ទោះយ៉ាងណា តាមរយៈកំណែទម្រង់របស់រដ្ឋាភិបាល ដែលក្រសួងសាធារណៈការ និងដឹកជញ្ជូន បានដឹកនាំដោយរដ្ឋមន្ត្រីថ្មី ក្រសួងដែលធ្លាប់តែងាប់ស្តូកមួយនេះ មានភាពរស់រវើកឡើងវិញ។ រយៈពេលពីរឆ្នាំចុងក្រោយនេះ ឃើញថាបញ្ហា ដែលគេយល់ថាជាការលំបាកនោះ ត្រូវបានដោះស្រាយជាបណ្តើរៗ ពោលគឺរដ្ឋាភិបាលតាមរយៈក្រសួងដឹកជញ្ជូន បានជជែកគ្នារកច្រកចេញជាបន្តបន្ទាប់ដើម្បីជួយសម្រាលបន្ទុករបស់ពលរដ្ឋខ្មែរ ដែលរស់នៅក្រោមបន្ទាត់ក្រីក្រនៅឡើយ។
នោះគឺការសម្រេចមិនដំឡើងថ្លៃដឹកជញ្ជូននាឱកាសបុណ្យប្រពៃណីចូលឆ្នាំខ្មែរនេះ ពីក្រុមហ៊ុនដឹកជញ្ជូនអ្នកដំណើរចំនួន ២៩។ ការសម្រេចនេះ បានធ្វើឡើងកាលពីថ្ងៃចន្ទម្សិលមិញខណៈដែលមានការជួបប្រជុំគ្នារវាងតំណាងក្រុមហ៊ុនដឹកជញ្ជូន និងក្រសួងដឹកជញ្ជូន។ តាមពិត បញ្ហានេះ គេអាចធ្វើបានមិនមែនធ្វើមិនបាននោះទេ ហើយមតិខ្លះគិតថាជារឿងកំប៉ិកកំប៉ុកទៅទៀតនៅក្នុងដំណាក់កាលមួយដែលប្រទេសកម្ពុជាកំពុងរៀបចំការបោះឆ្នោតដូច្នេះ។
ជាការកត់សម្គាល់ដំណោះស្រាយបែបនេះ បានធ្វើឡើងបន្ទាប់ពីការកំណត់តម្លៃប្រេងសាំង ដែល កន្លងមកបញ្ហាតម្លៃប្រេងសាំងនេះ រងការរិះគន់ខ្លាំងក្លាដែរពីរឿងឡើងថ្លៃមិនធ្លាក់ចុះសោះ។ ដោយជំនះនូវផ្នត់គំនិតទីផ្សារសេរី រដ្ឋាភិបាលបានសម្រេចតាមរយៈរូបមន្តមួយ ដ៏ជោគជ័យ គឺការកំណត់តម្លៃប្រេងសាំងរួមនៅលើទីផ្សារ។
ទោះយ៉ាងណា ការមិនឡើងថ្លៃសំបុត្ររថយន្តនៅក្នុងឱកាសនៃពិធីបុណ្យចូលឆ្នាំថ្មីនេះ និងជាលើកទី ២ផងដែរ គឺបានបង្ហាញពីចំណុចវិជ្ជមានមួយ ដែលគេគួរតែមានការគិតគូរជួយសម្រួលដល់បន្ទុកចំណាយរបស់អ្នកដំណើរខ្មែរ ភាគច្រើននៅមានជីវភាពលំបាកនៅឡើយ។
ម្យ៉ាងទៀត វាជាគុណសម្បត្តិ ឬក៏គុណធម៌មួយ ដែលបង្ហាញថា ក្រុមហ៊ុនប្រកបអាជីវកម្មដឹកជញ្ជូននៅស្រុកខ្មែរ នឹងមិនគិតតែពីផលចំណេញតែមួយមុខដូចកាលពីមុននោះទេ។ នៅក្នុងដំណាក់កាលដែលនយោបាយកម្ពុជាកំពុងតែមានការប្រទាញប្រទង់គ្នា ជុំវិញការបោះឆ្នោតឃុំ សង្កាត់ និងការបោះឆ្នោតសកលនៅពេលខាងមុខនេះ ចង់មិនចង់ ឥរិយាបទបែបនេះ វាជាចំណុចដ៏វិជ្ជមានមួយ ដែលទាមទារឲ្យមានការដោះស្រាយ។
ជាមួយគ្នានេះ ក៏មានការរិះគន់ដែរថា ដំណោះស្រាយដូច្នេះ គេគួរតែចាប់ផ្តើមធ្វើជាយូរមកហើយ មិនមែននៅពេលនេះទេ។ ទោះយ៉ាងនេះក្តី វានឹងមិនទាន់ហួសពេលទេ សម្រាប់ក្រុមហ៊ុនដឹកជញ្ជូន ក៏ដូចជារដ្ឋាភិបាលដែលជាអ្នកគ្រប់គ្រងលើទីផ្សារអាជីវកម្ម។ ដំណាលគ្នានេះ ក៏មានក្រុមហ៊ុនលក់ស្រាបៀរដែលផលិតនៅប្រទេសអាឡឺម៉ង់មួយដែរនៅឆ្នាំនេះ បានចូលរួមលើកស្ទួយជីវភាពជនក្រីក្រ តាមរយៈការចែកសំបុត្រឡានក្រុងប្រមាណជា ៥ពាន់សំបុត្រ ដល់អ្នកដំណើរនៅក្នុងឱកាសបុណ្យចូលឆ្នាំខ្មែរនេះ។ កាយវិការនេះ ក៏បង្ហាញដែរថាដើម្បីតែយីហោស្រាបៀរមែនពិត តែក្រុមហ៊ុនក៏មានផលតបស្នងខ្លះដែរដល់សាធារណៈជនវិញ បន្ទាប់ពីពួកគេចំណាយថវិកាទៅលើស្រាបៀរ។
ដូច្នេះដរាបណាពលរដ្ឋខ្មែរដែលជាកម្មករ និងពលករចំណាកស្រុក នៅតែមានស្ថានភាព រអ៊ូរទាំនិងលំបាកជុំវិញការធ្វើដំណើរពេលបុណ្យធំៗទៅកាន់ស្រុកកំណើត និងពីស្រុកកំណើតទៅកាន់កន្លែងធ្វើការវិញនោះ គេគួរតែកុំបណ្តោយឲ្យមានទីផ្សារដឹកជញ្ជូនសេរី បែបអាណាធិបតេយ្យ។ ក្រុមហ៊ុនដឹកជញ្ជូនប្រមាណជា ៣០ក្រុមហ៊ុន គួរជ្រើសរើសការរក្សាតម្លៃដឹកជញ្ជូនដដែល ឬតម្លើងតិចតួច ចៀសវាង ការតម្លើងទ្វេរដងដូចកាលពីមុន វាជាបន្ទុកធ្ងន់ធ្ងរណាស់ដល់អ្នកធ្វើដំណើរក្នុងឱកាសពិសេស។ ជាមួយគ្នានេះ រដ្ឋត្រូវមានកិច្ចអន្តរាគមន៍ឲ្យបានជាប់លាប់ និងចាត់ទុកថាបញ្ហានេះ ក៏ជាផ្នែកមួយជួយកាត់បន្ថយភាពក្រីក្រក្នុងចំណោមប្រជាពលរដ្ឋដែរ ក្រៅពីផលប្រយោជន៍អ្វីផ្សេងទៀតក្រៅពីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ