ឆ្លើយតបនឹងតុលាការ៖ លោក សម រង្ស៊ីថា នឹងអំពាវនាវបន្ថែមដល់កងទ័ពកុំឱ្យស្ដាប់បញ្ជាលោកហ៊ុន សែន
អតីតប្រធានអតីតបក្សប្រឆាំង លោកសម រង្ស៊ី បានអះអាងថា លោកនឹងអំពាវនាវបន្ថែមទៀតដល់កងទ័ពកម្ពុជាកុំឱ្យស្ដាប់បទបញ្ជារបស់លោកនាយករដ្ឋមន្រ្តីហ៊ុន សែន ។ ការអះអាងរបស់លោកសម រង្ស៊ី នេះ ធ្វើឡើងក្រោយពីតុលាការកម្ពុជាបានប្រកាសបិទការស៊ើបសួរចំពោះបណ្តឹងមកលើរូបលោកពីបទ«ញុះញង់កុំឲ្យកងទ័ពស្ដាប់បង្គាប់”។
ចុះផ្សាយនៅថ្ងៃ៖
ស្តាប់ - ០២:០០
តាមរយៈសារអេឡិកត្រូនិក(Email)មកកាន់វិទ្យុបារាំងអន្តរជាតិ លោកសម រង្ស៊ី បានលើកឡើងថា លោកនឹងធ្វើការអំពាវនាវបន្ថែមទៀតដល់កងកម្លាំងប្រដាប់អាវុធកុំឱ្យពួកគេស្ដាប់បញ្ជារបស់លោកនាយករដ្ឋមន្រ្តីហ៊ុន សែន។ បើតាមលោកសម រង្ស៊ី កងកម្លាំងប្រដាប់អាវុធទាំងនេះ នឹងទទួលបាននូវការអំពាវនាវលម្អិត និងទទូចកុំឱ្យស្ដាប់បទបញ្ជាលោកហ៊ុន សែន បន្ថែមទៀតនាពេលខាងមុខនេះ។
ការលើកឡើងរបស់លោកសម រង្ស៊ី នាពេលនេះ គឺជាការឆ្លើយតបទៅនឹងចំណាត់ការរបស់តុលាការកម្ពុជា។ តុលាការកម្ពុជាដែលទើបប្រកាសបិទការស៊ើបសួរសំណុំរឿងចំនួន ២ របស់លោក សម រង្ស៊ី ដែលត្រូវបានប្តឹងឡើងដោយរដ្ឋាភិបាលកម្ពុជា គឺបណ្តឹង «ញុះញង់កុំឲ្យកងទ័ពស្ដាប់បង្គាប់» និងបណ្តឹង «ការប្រមាថចំពោះអង្គព្រះមហាក្សត្រ»។
ចំពោះចំណាត់ការលើបណ្តឹងការប្រមាថចំពោះអង្គព្រះមហាក្សត្រនេះ លោកសម រង្ស៊ី បានឆ្លើយតបទៅកាន់វិញថា លោកបានបន្តនិយាយថា ព្រះមហាក្សត្រកម្ពុជា ព្រះបាទ នរោត្តម សីហមុនី ត្រូវបានចាប់ជាចំណាប់ខ្មាំងដោយលោកនាយករដ្ឋមន្រ្តី ហ៊ុន សែន ។ លោកសម រង្ស៊ីថា សម្តីនេះ គឺធ្ងន់ធ្ងរជាងសម្តីកាលលោកនិយាយនាំឱ្យតុលាការចាត់ការតាមផ្លូវច្បាប់លើរូបលោកទៅទៀត ប៉ុន្តែហេតុអ្វីបានជាសាលាដំបូងរាជធានីភ្នំពេញមិនបានលើកឡើងអំពីបញ្ហានេះផងទៅ។
សូមបញ្ជាក់ថា សំណុំរឿងប្រមាថចំពោះអង្គព្រះមហាក្សត្រដោយលោកសម រង្ស៊ីនេះ ត្រូវបានធ្វើឡើងដោយក្រសួងយុត្តិធម៌។ ក្រសួងយុត្តិធម៌បានចេញអធិបញ្ជាឱ្យសាលាដំបូងរាជធានីភ្នំពេញចាត់វិធានការផ្លូវច្បាប់ប្រឆាំង លោក សម រង្ស៊ី បន្ទាប់ពីលោកបានអះអាងថា សារលិខិតរបស់ព្រះមហាក្សត្រដែលឱ្យពលរដ្ឋទៅបោះឆ្នោតនោះ ជាលិខិតក្លែងក្លាយ ដែលតាក់តែងឡើងដោយរដ្ឋាភិបាលកម្ពុជា។
ចំណែកបណ្តឹងពីបទ «ញុះញង់កុំឲ្យកងទ័ពស្ដាប់បង្គាប់»វិញ ត្រូវបានធ្វើឡើង ក្រោយពីលោក សម រង្ស៊ី កាលពីចុងឆ្នាំ ២០១៧ បានអំពាវនាវតាមហ្វេសប៊ុករបស់លោកដល់កងកម្លាំងប្រដាប់អាវុធកុំស្ដាប់បង្គាប់ឬធ្វើតាមបញ្ជារបស់មេដឹកនាំឱ្យបាញ់ប្រហារពលរដ្ឋស្លូតត្រង់នៅពេលមានការតវ៉ា។ ការអំពាវនាវនាពេលនោះ ក៏ត្រូវបានមន្រ្តីគ្រាក់ៗក្នុងជួរកងទ័ពចេញមកធ្វើការថ្កោលទោសជាបន្តបន្ទាប់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ