រដ្ឋមន្ត្រីទេសចរណ៍៖ បុណ្យទន្លេលើកទី៣ ជោគជ័យលើសពីការរំពឹងទុក
ពិធីបុណ្យទន្លេលើកទី៣ ដែលរៀបចំធ្វើនៅខេត្តស្ទឹងត្រែង រយៈពេល៣ថ្ងៃមកនេះ គឺបានទទួលជោគជ័យលើសពីការរំពឹងទុក។ នេះគឺជាបញ្ជាក់ប្រាប់វិទ្យុបារាំង របស់លោក ថោង ខុន រដ្ឋមន្ត្រីក្រសួងទេសចរណ៍។ លោកថ្លែងដោយក្តីរំភើបថា ពលរដ្ឋនិងអ្នកទេសចរនៅទីនោះ សប្បាយនឹងលេងកម្សាន្ត ព្រមទាំងចាយវាយហូបចុក ហើយសន្តិសុខសណ្តាប់ក៏ល្អ។
ចុះផ្សាយនៅថ្ងៃ៖
ស្តាប់ - ០២:២០
ជាការសរុប ភ្ញៀវទេសចរដែលទៅចូលរួមទស្សនាព្រឹត្តិការណ៍បុណ្យទន្លេ ក្នុង៣ថ្ងៃនេះ គឺមានប្រហែលជាង១០ម៉ឺននាក់។ លោករដ្ឋមន្ត្រីទេសចរណ៍ បានបញ្ជាក់ថា នៅថ្ងៃទី១នៃពិធីបុណ្យ គឺមានមនុស្សជាង៣ម៉ឺននាក់ ថ្ងៃទី២ ជាថ្ងៃបុណ្យធំ លើសពីការស្មាន គឺជាង៥ម៉ឺននាក់ ហើយថ្ងៃទី៣នេះ ក៏មិនតិចជាង៣ម៉ឺននាក់ដែរ។
មនុស្សកើនលើសពីការរំពឹងទុក ក៏មានការភ្ញាក់ផ្អើលដែរចំពោះរដ្ឋបាលខេត្តស្ទែងត្រែង, អ្នកនាំពាក្យសាលាខេត្ត លោក ម៉ែន គង់ បានត្រេកអរថា ការរំពឹងស្មានទុកពីដំបូងឡើយ គឺប្រហែលអាចមានមនុស្សត្រឹមតែ៣ម៉ឺន ទៅ៦ម៉ឺននាក់ប៉ុណ្ណោះ តែលទ្ធផលពេលនេះ គឺលើសពីក្តីរំពឹងទុកច្រើនមែនទែន។
ទន្ទឹមនេះ ទាំងលោក ថោង ខុន ទាំងលោក ម៉ែន គង់ គូសបង្ហាញថា ព្រឹត្តិការណ៍ប្រព្រឹត្តទៅយ៉ាងជោគជ័យ ដោយរលូនតាមការគ្រោងទុក មានសន្តិសុខ សុវត្ថិភាពល្អ ហើយពលរដ្ឋសប្បាយរីករាយ ព្រោះថា មិនដែលមានការរៀបចំធ្វើពិធីបុណ្យធំដូច្នេះពីមុនទេ។
ម្យ៉ាងវិញទៀត គឺគ្មានករណីចោរកម្ម ឬគ្រោះថ្នាក់អ្វីធំដុំគួរឲ្យកត់សម្គាល់នោះទេ គឺមានតែគ្រោះថ្នាក់ចរាចរណ៍តូចតាចដែលអាចដោះស្រាយបាននៅមូលដ្ឋាន។ ទាំងនេះ គឺដោយសារតែ មានកងកម្លាំងប្រដាប់អាវុធប្រមាណជិត៨រយនាក់ ដែលនៅយាមកាមពង្រឹងសន្តិសុខតាមទីតាំងគោលដៅសំខាន់ៗ។
សូមបញ្ជាក់ថា ពិធីបុណ្យទន្លេលើកទី៣ រយៈពេលបីថ្ងៃ ធ្វើនៅខេត្តស្ទឹងត្រែង ចាប់ផ្ដើមតាំងពីថ្ងៃសុក្រ រហូតដល់យប់ថ្ងៃអាទិត្យ ក្រោមប្រធានបទ ទន្លេផ្សារភ្ជាប់ប្រជាជន ទេសចរណ៍ វប្បធម៌ និង បរិស្ថាន។ មានការប្រគំតន្ត្រី និងមានស្តង់ពិព័រណ៌ជាង៦០០កន្លែង ដែលពលរដ្ឋមូលដ្ឋាន សិប្បករខ្នាតតូច បាននាំយកផលិតក្នុងស្រុករបស់ខ្លួនទៅតាំងបង្ហាញនិងសម្រាប់លក់ដូរ។ ក៏មានដែរ ស្តង់របស់ថៃ ជាង២០ ស្តង់លក់របស់ឡាវនិងស្តង់វៀតណាម ខ្លះដែរ។
ដោយឡែក ចំពោះសកម្មភាពកីឡា គឺមានការប្រកួតកីឡា ចំនួន១១ប្រភេទ ផ្នែកខ្លះ មានប្រកួតជាលក្ខណៈមិត្តភាពរវាងឡាវ-កម្ពុជា! លោក ថោង ខុន ក្នុងនាមជាប្រធានគណៈកម្មាធិការជាតិអូឡាំពិកកម្ពុជា បានចុះទៅអង្គុយមើលបាល់ទាត់ដោយផ្ទាល់ និងបានគូសបង្ហាញថា កីឡាករខេត្តស្ទឹងត្រែងល្អៗនិងខ្លាំងៗ ដែលគួរតែមានការលើកទឹកចិត្តបណ្តុះបណ្តាលបន្ថែម។
ជារួមចំពោះអ្នករៀបចំកម្មវិធី, បុណ្យទន្លេឆ្នាំនេះ បានជោគជ័យយ៉ាងល្អ ហើយបុណ្យទន្លេឆ្នាំក្រោយ នឹងរៀបចំនៅខេត្តកណ្តាល វិញម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ