អង្គការសហប្រជាជាតិ ព្រួយបារម្ភពីលទ្ធិប្រជាធិបតេយ្យ និងការបោះឆ្នោតឆ្នាំក្រោយនៅកម្ពុជា
អ្នកជំនាញផ្នែកសិទ្ធិមនុស្សនៃអង្គការសហប្រជាជាតិ កាលពីម្សិលមិញបានចេញសេចក្តីថ្លែងការណ៍សម្តែងពីក្តីបារម្ភអំពីដំណើរការឈានទៅរំលាយគណក្សប្រឆាំងធំជាងគេកម្ពុជា ថានឹងធ្វើឲ្យប៉ះពាល់ដល់លទ្ធិប្រជាធិបតេយ្យ និងការបោះឆ្នោតនៅកម្ពុជាឆ្នាំក្រោយនេះ។ យ៉ាងណាក៏ដោយ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានច្រានចោលការលើកឡើងនេះ និងអះអាងប្រាប់វិទ្យុបារាំងថា ការលើកឡើងនេះ មិនមែនជារឿងថ្មីទេសម្រាប់កម្ពុជា។
ចុះផ្សាយនៅថ្ងៃ៖
ស្តាប់ - ០២:២១
តាមរយៈសេចក្តីថ្លែងការណ៍ចុះថ្ងៃទី១២តុលា លោកស្រីរ៉ូណា ស្មីត (Rhona Smith) អ្នករាយការណ៍ពិសេសផ្នែកសិទ្ធិមនុស្សរបស់អង្គការសហប្រជាជាតិ បានលើកឡើងថា សិទ្ធិស៊ីវិល និងនយោបាយនៅក្នុងប្រទេសកម្ពុជាកំពុងតែដុនដាបខ្លាំង ដែលធ្វើឲ្យមានការព្រួយបារម្ភយ៉ាងខ្លាំង ចំពោះការបោះឆ្នោតនាពេលខាងមុខ និងអនាគតនៃលទ្ធិប្រជាធិបតេយ្យនៅក្នុងប្រទេសមួយនេះ។
ការលើកឡើងរបស់លោកស្រីរ៉ូណាស្មីត ធ្វើឡើងបន្ទាប់ពីក្រសួងមហាផ្ទៃកម្ពុជាបានដាក់ពាក្យប្តឹងរំលាយគណបក្សសង្រ្គោះជាតិ ខណៈដែលមេដឹកនាំគណបក្សប្រឆាំងមួយនេះត្រូវបានចោទប្រកាន់អំពើក្បត់ជាតិ និងកំពុងត្រូវឃុំខ្លួននៅក្នុងពន្ធនាគារក្នុងខេត្តត្បូងឃ្មុំក្បែរប្រទេសវៀតណាម។ លោកស្រី ស្មីត ថ្លែងទៀតថា ការរំលាយគណបក្សសង្គ្រោះជាតិ នឹងជះឥទ្ធិពលដល់សំឡេងនិងជម្រើសរបស់ប្រជាជនកម្ពុជា នៅគ្រប់កម្រិតក្នុងជួររដ្ឋាភិបាល ដែលធ្វើឱ្យមានការព្រួយបារម្ភយ៉ាងខ្លាំងអំពីភាពជាតំណាងរបស់រដ្ឋាភិបាល។
នៅក្នុងសេចក្ដីថ្លែងការណ៍ដដែលនោះ លោកស្រី ស្មីត ក៏បារម្ភផងដែរ អំពីការធ្វើវិសោធនកម្មច្បាប់បន្ថែមទៀតរបស់តំណាងរាស្ត្រគណបក្សកាន់អំណាច ដែលមានរូបមន្តចែកអាសនៈគណបក្សដែលត្រូវរំលាយទៅឲ្យគណបក្សផ្សេងទៀត។
ចំណែក លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានហៅសេចក្តីថ្លែងការណ៍ជាបន្តបន្ទាប់ទាក់ទងទៅនឹងស្ថានការណ៍នយោបាយនៅកម្ពុជាគឺជាសិទ្ធិបញ្ចេញមតិ ក៏ប៉ុន្តែកម្ពុជាចង់បានប្រជាធិបតេយ្យមួយដែលមិនស្ថិតក្រោមការជ្រៀតជ្រែករបស់បរទេសណាមួយឡើយ។ លោកផៃ ស៊ីផាន គូសបញ្ជាក់ថា កម្ពុជានៅតែព្យាយាមពន្យល់បរទេសទាំងនោះ ខណៈដែលពួកគេគឺជាដៃគូពិភាក្សានិងជាដៃគូអភិវឌ្ឍន៍របស់កម្ពុជា។
ជាការកត់សម្គាល់សេចក្តីថ្លែងការណ៍របស់មន្រ្តីទទួលបន្ទុកសិទ្ធិមនុស្សរបស់អង្គការសហប្រជាជាតិ ធ្វើឡើងតែមួយថ្ងៃប៉ុណ្ណោះ ក្រោយសេចក្តីប្រកាសព័ត៌មានរបស់ស្ថានទូតអូស្ត្រាលីនៅកម្ពុជា និងបន្ទាប់ពីស្ថានឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា បានចេញសេចក្តីថ្លែងការណ៍ជម្រុញឲ្យរដ្ឋាភិបាលកម្ពុជាពិចារណាឡើងវិញ នូវអ្វីដែលបណ្តុំប្រទេសអឺរ៉ុប២៨ប្រទេស យល់ថាជាការដកយកចេញដោយបង្ខំពីឆាកនយោបាយនៃគណបក្សមួយដែលបានឈ្នះសម្លេងឆ្នោតប្រជាពលរដ្ឋជាង៤០% នៅក្នុងការបោះឆ្នោតឃុំ-សង្កាត់ កាលពីពេលថ្មីៗនេះ និងអាចជាការវាយបកយ៉ាងធ្ងន់ធ្ងរលើលទ្ធិប្រជាធិបតេយ្យនៅកម្ពុជានិងអាចបាត់បង់នូវកិត្យានុភាពនៃដំណើរការបោះឆ្នោតបច្ចុប្បន្ន។
ការព្រួយបារម្ភពីសហគមន៍អន្តរជាតិជាបន្តបន្ទាប់នេះ ក៏ធ្លាក់មកខណៈពេលដែលគណៈកម្មាធិការអចិន្ត្រៃយ៍រដ្ឋសភា កំពុងតែពិភាក្សាទៅលើវិសោធនកម្មច្បាប់ចំនួនបួន ដោយនៅក្នុងនោះគឺទាក់ទងនឹងការបែងចែកអាសនៈរបស់គណបក្សសង្គ្រោះជាតិទៅឲ្យគណបក្សតូចៗផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ