មនុស្ស១ពាន់៥រយនាក់ នឹងជួបជុំគ្នារាំម៉ាឌីហ្សូន ដើម្បីបញ្ឈប់អំពើហិង្សាលើស្ដ្រី
ចាប់ពីម៉ោង៣រសៀល ដល់ម៉ោង៦ល្ងាចនេះ មនុស្សប្រមាណ១ពាន់៥រយនាក់ នឹងជួបជុំគ្នានៅសួនច្បារមុខវត្តបទុម ដើម្បីរាំចង្វាក់ម៉ាឌីហ្សូន។ ជាការរាំម៉ាឌីហ្សូន ដែលជាផ្នែកមួយនៃយុទ្ធនាការ១៦ថ្ងៃ ធ្វើឡើងក្នុងគោលដៅផ្សព្វផ្សាយពីការបញ្ឈប់អំពើហិង្សាលើស្ដ្រី និងកុមារី។
ចុះផ្សាយនៅថ្ងៃ៖
ស្តាប់ - ០២:០០
នៅថ្ងៃសៅរ៍ទី៦ខែធ្នូនេះ ចាប់ពីម៉ោង៣រសៀលតទៅ គេរំពឹងថា មនុស្សប្រមាណ១ពាន់៥រយនាក់ នឹងចូលរួមរាំស្រុសគ្នានៅក្នុងកម្មវិធីរាំចង្វាក់ម៉ាឌីហ្សូន នៅឯសួនច្បារមុខវត្តបទុម រាជធានីភ្នំពេញ។ ព្រឹត្តិការណ៍នេះ ត្រូវបានបើកចំហរចំពោះសាធារណៈជនទូទៅផងដែរ។ អ្នកដែលចូលរួមនឹងទទួលបានអាវយឺតរបស់យុទ្ធនាការ ព្រមទាំងមានពេលរៀនរាំតាមចង្វាក់ មុននឹងរាំតាមចង្វាក់ម៉ាឌីហ្សូននេះជាក្រុម នាពេលបន្ទាប់មក។
យុទ្ធនាការរាំចង្វាក់ម៉ាឌីហ្សូននេះ គឺជាផ្នែកមួយនៃយុទ្ធនាការ១៦ថ្ងៃ ដែលធ្វើឡើងក្នុងគោលដៅផ្សព្វផ្សាយពីការបញ្ឈប់អំពើហិង្សាលើស្ដ្រី និងកុមារី។ ជាយុទ្ធនាការសកលមួយ ដែលត្រូវបានរៀបចំឡើងជារៀងរាល់ឆ្នាំ តាំងពីឆ្នាំ១៩៩១មក។ នៅកម្ពុជា ទីភ្នាក់ងារសហប្រជាជាតិ លើកកម្ពស់សមភាពយេនឌ័រ និងផ្ដល់ភាពអង់អាចដល់ស្ដ្រី ហៅកាត់ថា UN Women គឺជាអ្នករៀបចំព្រឹត្តិការណ៍នេះ ក្រោមក្របខណ្ឌរបស់យុទ្ធនាការ UNiTE និងកិច្ចសហការពីអង្គការដៃគូជាច្រើនផ្សេងទៀត។
ជារៀងរាល់ឆ្នាំ បើតាម UN Women ស្ដ្រីនិងក្មេងស្រីរាប់លាននាក់នៅទូទាំងសកលលោក ទទួលរងអំពើហិង្សាក្នុងទម្រង់មួយចំនួនដូចជា អំពើហិង្សាក្នុងគ្រួសារ ការរំលោភសេពសន្ថវៈ ការកាត់ច្រឹបប្រដាប់ភេទស្ដ្រី ការសម្លាប់ទាក់ទងនឹងថ្លៃបណ្ណាការ ការជួញដូរមនុស្ស អំពើហិង្សាផ្លូវភេទនៅក្នុងស្ថានភាពមានជម្លោះ ឬការរំលោភបំពានដែលស្ដែងចេញក្នុងទម្រង់ផ្សេងទៀត។
យុទ្ធនាការសកម្មភាព១៦ថ្ងៃ ប្រឆាំងអំពើហិង្សាយេនឌ័រ ដែលចាប់ផ្ដើមពីថ្ងៃ២៥វិច្ឆកា មានបំណងរំលេចឲ្យឃើញពីបញ្ហាប្រឈមទាំងអស់នេះ។ ក្រៅពីការរាំម៉ាឌីហ្សូន យុទ្ធនាការ១៦ថ្ងៃ ក៏មានផងដែរ កម្មវិធីវិទ្យុបង្កើនការយល់ដឹងអំពីការបញ្ឈប់អំពើហិង្សាលើស្ដ្រីនិងកុមារី កម្មវិធីបង្កើនការយល់ដឹងក្នុងចំណោមអ្នកជម្រុញលក់ស្រាបៀរ ព្រមទាំងសិស្សនិស្សិតនៅតាមសាកលវិទ្យាល័យជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ