សហជីព និង ថៅកែរោងចក្រមិនពេញចិត្តសេក្តីព្រាងច្បាប់សហជីពដែលរដ្ឋាភិបាលបានអនុម័ត
សេចក្តីព្រាងច្បាប់ស្តីពី សហជីព ដែលបានចំណាយពេលរៀបចំតាក់តែងឡើង៧ឆ្នាំ ត្រូវបានរដ្ឋាភិបាលកម្ពុជា អនុម័តជាផ្លូវការនៅព្រឹកថ្ងៃសុក្រនេះ ដើម្បីបញ្ចូនបន្តទៅកាន់រដ្ឋសភាជាតិនាពេលខាងមុខ ដើម្បីពិភាក្សា និងអនុម័ត។ មេដឹកនាំសហជីព និង សមាគមរោងចក្រកាត់ដេរនៅកម្ពុជា បានសម្តែងការមិនពេញចិត្តចំពោះសេចក្តីព្រាងច្បាប់ថ្មីនេះ ដោយហេតុថា សេចក្តីព្រាងច្បាប់នេះមិនត្រូវបានបញ្ចូលនូវចំណុចព្រួយបារម្ភដែលខ្លួនបានស្នើឡើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
មេដឹកនាំសហជីពឯករាជ្យនៅកម្ពុជា បានសម្តែងការសោកស្តាយចំពោះការសម្រេចអនុម័តសេចក្តីព្រាងច្បាប់ស្តីពី សហជីព ទាំងចម្រូងចម្រាសពីសំណាក់រដ្ឋាភិបាលកម្ពុជា ។ លោកប៉ាវ ស៊ីណា ប្រធានសម្ព័ន្ធសហជីពចលនាកម្មករ បានថ្លែងប្រាប់វិទ្យុបារាំងអន្តរជាតិថា ក្រសួងការងារមិនបានកែប្រែនូវចំណុចមួយចំនួននៅក្នុងសេចក្តីព្រាងច្បាប់ថ្មីនេះ ទៅតាមការស្នើសុំរបស់ក្រុមមេដឹកនាំសហជីពនោះទេ ដោយបែរជាដាក់ឲ្យរដ្ឋាភិបាលពិភាក្សា និង អនុម័តដោយមិនបានបង្ហាញសេចក្តីព្រាងចុងក្រោយដល់សហជីព។
ចំណែកសមាគមរោងចក្រកាត់ដេរនៅកម្ពុជាហៅកាត់ថា GMACវិញ ក៏បានសម្តែងការព្រួយបារម្ភចំពោះសេចក្តីព្រាងច្បាប់ស្តីពីសហជីព នេះផងដែរ។ បើតាមសេចក្តីថ្លែងការរបស់ខ្លួនកាលពីថ្ងៃព្រហស្បតិ៍ GMAC បានបញ្ជាក់ថា នៅក្នុងសេចក្តីព្រាងច្បាប់ថ្មីនេះ ក្រសួងការងារមិនបានពិចារណាដាក់បញ្ចូលនូវចំណុចព្រួយបារម្ភរបស់ក្រុមនិយោជកនោះឡើយ។ គឺនៅត្រង់ចំណុចនេះ GMAC មើលឃើញថា សេចក្តីព្រាងច្បាប់ស្តីពីសហជីព នឹងមិនអាចដោះស្រាយប្រកបដោយប្រសិទ្ធភាពនូវបញ្ហាទំនាក់ទំនងវិជ្ជាជីវៈដែលវិស័យឯកជនកំពុងជួបប្រទះ។
ផ្ទុយពីការលើកឡើងខាងលើ លោកសោម អូន ប្រធានក្រុមប្រឹក្សាសហជីពជាតិកម្ពុជាដែលមានទំនោរគាំទ្ររដ្ឋាភិបាល បានស្វាគមន៍ ។ ស្វាគមន៍ គឺដោយសារតែលោកយល់ថា សេចក្តីព្រាងច្បាប់ស្តីពីសហជីពនឹងរក្សាទំនាក់ទំនងវិជ្ជាជីវៈ និងធ្វើឲ្យមានសន្តិភាពនៅក្នុងវិស័យកាត់ដេរនៅកម្ពុជា ។
សេចក្តីព្រាងច្បាប់ស្តីពី សហជីព មាន១៧ជំពូក និង ៩១ មាត្រា ។ ក្រសួងការងារធ្លាប់បានអះអាងថា ការបង្កើតច្បាប់នេះឡើង គឺដើម្បីការពារសិទ្ធិ និងផលប្រយោជន៍ស្របច្បាប់របស់កម្មករ ព្រមទាំងធានានូវសិទ្ធិសេរីភាពនៃអង្គការវិជ្ជាជីវៈរបស់កម្មករ និយោជិត និងនិយោជកផងដែរ។ បើតាមក្រសួងការងារ សេចក្តីព្រាងច្បាប់ស្តីពី សហជីព ធ្លាប់ត្រូវបានរៀបចំឲ្យមានការពិភាក្សាជាសាធារណៈ ចំនួន៧ លើករួចមកហើយ។
យ៉ាងណាក៏ដោយ លោកអាត់ ធន់ ប្រធានសម្ព័ន្ធសហជីព សីខៅឌូ បានគូសបញ្ជាក់ថា តាំងពីចុងឆ្នាំ២០១៤ មកដល់ពេលនេះ សហជីពពុំទទួលបានសេចក្តីព្រាងច្បាប់ស្តីពី សហជីព ចុងក្រោយពីក្រសួងការងារនោះទេ។ ដូច្នេះ លោកស្នើឲ្យរដ្ឋាភិបាលកម្ពុជា បង្ហាញសេចក្តីព្រាងច្បាប់នេះដល់សហជីព។ ចំណែកលោកប៉ាវ ស៊ីណា បានសំណូមឲ្យរដ្ឋាភិបាល និង សភា ត្រួតពិនិត្យ និង កែលម្អឡើងវិញនូវសេចក្តីព្រាងច្បាប់នេះ ទៅតាមការស្នើសុំរបស់ក្រុមសហជីព ព្រោះថា វាជាផលប្រយោជន៍របស់កម្មករ និង កម្មរិនីខ្មែរទាំងអស់។
គួរបញ្ជាក់ថា មកដល់ពេលបច្ចុប្បន្ននេះ កម្ពុជាមានសហជីពមូលដ្ឋានចំនួន ៣២១៤ សហជីព សហព័ន្ធសហជីព ចំនួន៨៤សហព័ន្ធ សហភាពសហព័ន្ធសហជីពចំនួន១៣ សហភាព និងសមាគមនិយោជកចំនួន៥សមាគម ។ ចំនួននេះ បើតាមក្រសួងការងារ គឺតម្រូវអោយមានបទប្បញ្ញតិកាន់តែច្បាស់ ដើម្បីធានានូវសិទ្ធិសេរីភាពនៃអង្គការវិជ្ជាជីវៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ