គ.ជ.បថាខ្លួននៅតែអាចដំណើរការទៅមុខដោយគ្មានជំនួយអឺរ៉ុប
សហភាពអឺរ៉ុបប្រចាំនៅកម្ពុជានៅថ្ងៃអង្គារនេះ បានប្រកាសព្យួរជំនួយរបស់ខ្លួនដល់គណៈកម្មាធិការជាតិរៀបចំការបោះឆ្នោត(គ.ជ.ប) បន្ទាប់ពីបណ្តុំប្រទេសលោកខាងលិចជាង២០ប្រទេសនេះ បានជួយផ្នែកបច្ចេកទេសយ៉ាងសកម្មដល់ គ.ជ.ប នាពេលកន្លងទៅ។ ការសម្រេចព្យួរជំនួយរបស់សហភាពអឺរ៉ុបដល់ គ.ជ.ប នៅពេលនេះបានធ្វើឡើងដោយយោងលើហេតុផលតុលាការកំពូលកម្ពុជាកាលពីថ្ងៃទី១៦ខែវិច្ឆិកា បានសម្រេចរំលាយគណបក្សសង្គ្រោះជាតិ ពីពិភពនយោបាយខ្មែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
នៅក្នុងសេចក្តីប្រកាសរបស់ខ្លួននៅថ្ងៃនេះ សហភាពអឺរ៉ុបប្រចាំនៅកម្ពុជា បានរៀបរាប់យ៉ាងរីករាយពីដំណើរការរៀបចំការបោះឆ្នោតក្រុមប្រឹក្សាឃុំ-សង្កាត់ កន្លងមក ដែលមានការទទួលស្គាល់យ៉ាងទូលំទូលាយថា ត្រូវបានធ្វើឡើងប្រកបដោយវិជ្ជាជីវៈ ព្រមទាំងមានស្តង់ដារ តម្លាភាព និងកម្រិតទុកចិត្តខ្ពស់ ហើយការបោះឆ្នោតត្រូវបានឆ្លុះបញ្ចាំងពីឆន្ទៈពិតប្រាកដរបស់អ្នកបោះឆ្នោត។
សហភាពអឺរ៉ុប បានកត់សម្គាល់ថា យោងលើហេតុផលនេះ អាជ្ញាធរបានចាត់វិធានការជាបន្តបន្ទាប់ទៅលើគណបក្សប្រឆាំង ដែលទទួលបានសម្លេង៤៤,៥% នៅក្នុងការបោះឆ្នោតជ្រើសតាំងតំណាងរាស្ត្រឆ្នាំ២០១៣ និង៤៣,៨% នៅក្នុងការបោះឆ្នោតថ្នាក់មូលដ្ឋាននៅឆ្នាំ២០១៧។
សេចក្តីសម្រេចរំលាយគណបក្សសង្គ្រោះជាតិ និងការបែងចែកអាសនៈរដ្ឋសភា និងក្រុមប្រឹក្សាឃុំ-សង្កាត់ ទៅឲ្យគណបក្សដទៃ គឺជាការបដិសេធចោលនូវការជ្រើសរើសរបស់ពលរដ្ឋដែលបានបោះឆ្នោតជូនគណបក្សនេះ នៅក្នុងការបោះឆ្នោតឆ្នាំ២០១៣និងឆ្នាំ២០១៧។ នេះបើតាមសេចក្តីប្រកាសព័ត៌មានរបស់សហភាពអឺរ៉ុប។
ជាមួយគ្នានេះ លោកសោម សូរីដា អគ្គលេខាធិការរងគ.ជ.ប បានសម្តែងការសោកស្តាយនូវ ទង្វើរបស់សហភាពអឺរ៉ុប ដែលបានព្យួរជំនួយដល់គ.ជ.ប។ ក៏ប៉ុន្តែលោកសោម សូរីដា រំពឹងថាគ.ជ.ប នឹងដំណើរការរៀបចំការបោះឆ្នោតចំនួន២ខាងមុខដូចការគ្រោងទុក គឺការបោះឆ្នោតព្រឹទ្ធសភា និងការបោះឆ្នោតជ្រើសតាំងតំណាងរាស្ត្រនីតិកាលទី៦ នៅឆ្នាំ២០១៨ខាងមុខជាមួយនឹងដៃគូរមួយចំនួនទៀតក្រៅពីសហភាពអឺរ៉ុប។
ជាមួយគ្នានេះ នៅក្នុងសេចក្តីថ្លែងការណ៍របស់សហភាពអឺរ៉ុប ដំណើរការបោះឆ្នោតមួយ ដែលគណបក្សប្រឆាំងត្រូវបានផាត់ចេញតាមទំនើងចិត្តបែបនេះ ក៏មិនអាចត្រូវបានមើលឃើញថាមានភាពស្របច្បាប់បានដែរ។ សូមបញ្ជាក់ថា អឺរ៉ុបជាសហគមន៍បរទេសទី២ហើយបន្ទាប់ពីអាមេរិក ដែលបានផ្អាកជំនួយដល់គ.ជ.ប។ បើតាមមន្ត្រីគ.ជ.ប ជំនួយរបស់សហភាពអឺរ៉ុបមានប្រមាណជាង៥លានដុល្លារ ដែលជាជំនួយមួយសំខាន់ដែរ នៅក្នុងដំណើរការរៀបចំការបោះឆ្នោតឆ្នាំ២០១៦-២០១៧ ដែលគ.ជ.ប បានចំណាយអស់ជាង៥០លានដុលា្លរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ