អង្គការHuman Right Watch បរិហារអំពើហិង្សាលើសហជីពក្នុងថ្ងៃអនុម័តច្បាប់សហជីព
អង្គការឃ្លាំមើលសិទិ្ធមនុស្សHuman Right Watch កាលពីម្សិលមិញ បានបរិហារពីអំពើហិង្សាដែលបង្កឡើងដោយក្រុមសន្តិសុខសាលាខណ្ឌដូនពេញទៅលើក្រុមសហជីពដែលបានប្រមូលផ្តុំគ្នានៅក្រៅរដ្ឋសភា ដើម្បីប្រឆាំងនឹងការអនុម័តច្បាប់សហជីព។ អង្គការមួយនេះ ថែមទាំងចង់ឲ្យក្រុមហ៊ុនសម្លៀកបំពាក់និងស្បែកជើងរួមទាំងម្ចាស់ជំនួយផង ថ្កោលទោសចំពោះអំពើហិង្សានេះផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ពីទីក្រុងបាងកក ប្រទេសថៃ លោកPhil Robertson នាយករងនៃអង្គការឃ្លាំមើលសិទិ្ធមនុស្សHuman Rights Watch ប្រចាំតំបន់អាស៊ីបានថ្លែងយ៉ាងដូច្នេះថា ការបោះឆ្នោតរបស់រដ្ឋសភាខ្មែរ ដើម្បីអនុម័តច្បាប់ស្តីពីសហជីព ដែលផ្ទុយទៅនឹងស្តង់ដារអន្តរជាតិ បានបង្ហាញឲ្យឃើញពីការធ្លាក់ចុះបន្ថែមទៀតនៃការគោរពសិទ្ធិការងារនៅក្នុងប្រទេសកម្ពុជា។ បន្ថែមលើនេះលោកបញ្ជាក់ថា ខ្សែវីឌីអូជាច្រើនបង្ហាញពីមន្ត្រីប៉ូលិសកំពុងវាយទៅលើក្រុមសហជីពកម្មករដែលតវ៉ាដោយអហិង្សាប្រឆាំងច្បាប់នេះស្តែងឲ្យឃើញពីការប្តេជ្ញាចិត្តដ៏ទន់ខ្សោយរបស់រដ្ឋាភិបាលកម្ពុជាចំពោះគោរពសិទ្ធិរបស់កម្មករ។
គួរបញ្ជាក់ថា ការបរិហារពីនាយករងនៃអង្គការឃ្លាំមើលសិទិ្ធមនុស្សHuman Rights Watchនាពេលនេះបានធ្វើឡើងមួយថ្ងៃ បន្ទាប់ពីច្បាប់ស្តីពីសហជីព ត្រូវបានរដ្ឋសភាជាតិកម្ពុជាអនុម័តជាផ្លូវការកាលពីថ្ងៃទី០៤ មេសា ដោយសំឡេង៦៧ លើ៩៨សំឡេង។ ការអនុម័តច្បាប់ដ៏ចម្រូងចម្រាសនេះ បានប្រព្រឹត្តទៅដោយសភាពធម្មតានៅក្នុងរដ្ឋសភា។ ប៉ុន្តែអ្វីដែលមិនធម្មតានោះ គឺនៅខាងក្រៅរដ្ឋសភាឯណោះទៅវិញទេដែលបានក្លាយទៅជាសមរភូមិប្រយុទ្ធរបស់ក្រុមសន្តិសុខសាលាខណ្ឌដូនពេញទៅលើក្រុមសហជីព ដែលបានមកប្រមូលផ្តុំគ្នាតវ៉ាប្រឆាំងនឹងច្បាប់នេះដោយសន្តិវិធី។ ក្រុមសន្តិសុខទាំងនោះ បានព្រួតគ្នាដេញចាប់ និងវ៉ៃមិនប្រណីដៃទៅសហជីពម្នាក់បណ្តាលឲ្យបែកក្បាលហូរឈាមតែម្តង។
ចំពោះអំពើហិង្សានេះ លោកនាយករងនៃអង្គការឃ្លាំមើលសិទិ្ធមនុស្សHuman Rights Watch បានលើកឡើងថា ក្រុមហ៊ុនសំលៀកបំពាក់ និងស្បែកជើងម៉ាកល្បីៗ ព្រមទាំងម្ចាស់ជំនួយផងគួរតែថ្កោលទោសនូវការប្រើប្រាស់កងកម្លាំងតាមរបៀបគ្មានច្បាប់ទម្លាប់បែបនេះ និងគួរតែអំពាវនាវឲ្យមានការពន្យល់ និងទទួលខុសចំពោះរឿងនេះ។
ក្រៅពីអង្គការឃ្លាំមើលសិទិ្ធមនុស្សHuman Right Watch អំពើហិង្សាមកលើក្រុមសហជីពនេះក៏ត្រូវបានក្រុមសហជីពខ្លួនឯងផ្ទាល់ និងបណ្តាញអ្នកការពារសិទ្ធិការងារ និងសិទ្ធិមនុស្ស បានសម្តែងការសោកស្តាយ និងធ្វើការថ្កោលទោសផងដែរ។ ពួកគេថែមទាំងបានស្នើឲ្យរដ្ឋាភិបាលខ្មែរចាត់វិធានការលើជនបង្ក និងអ្នកបញ្ជា នាំមកផ្តន្ទាទោសតាមច្បាប់។ ចំណែកសហគមន៍អន្តរជាតិ ដៃគូអភិវឌ្ឍ និងអ្នកបញ្ជាទិញនានា ក៏ជាជម្រើសដែលក្រុមសហជីពបានស្វែងរកការជួយអន្តរាគមន៍ដែរ។
បើទោះបីពេញចិត្ត ឫមិនពេញចិត្តយ៉ាងណាក៏ដោយ ក៏ប៉ុន្តែច្បាប់ស្តីពីសហជីពដ៏ចម្រូងចម្រាសនេះ ត្រូវបានរដ្ឋសភាអនុម័តរួចទៅហើយ។ ដូច្នេះ សម្រាប់អង្គការអន្តរជាតិខាងការងារ(ILO) អ្វីដែលរដ្ឋាភិបាល សហជីព និងនិយោជកត្រូវធ្វើនៅពេលេនេះ គឺបង្វែរការយកចិត្តទុកដាក់របស់ខ្លួនទៅលើការអនុវត្តច្បាប់ថ្មីស្តីពីសហជីព ដោយធ្វើយ៉ាងណាឲ្យមានលក្ខណៈត្រឹមត្រូវ យុត្តិធម៌ និងឥតលម្អៀង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ