ច្បាប់ស្តីពីប្រាក់ឈ្នួលអប្បបរមា ផ្តើមចេញរូបរាង
កម្ពុជានឹងមានច្បាប់ស្តីពីប្រាក់ឈ្នួលអប្បបរមា នៅពេលខាងមុខ ដើម្បីឆ្លើយតបទៅនឹងស្ថានភាពសេដ្ឋកិច្ច និងសង្គមរបស់ប្រទេស។ តំណាងក្រុមសហជីពវិញ បានលើកឡើងថាសេចក្តីព្រាងបឋមនៃច្បាប់ប្រាក់ឈ្នួលអប្បបរមានេះ បានផ្តល់សិទ្ធិច្រើនដល់ក្រសួងការងារ ខណៈសហជីពមានអំណាចតិចតួចនៅក្នុងច្បាប់នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
លោកអ៊ិត សំហេង រដ្ឋមន្ត្រីក្រសួងការងារបានលើកឡើងថា ក្នុងបរិបទ ដែលប្រទេសក្នុងតំបន់កំពុងមានការប្រកួតប្រជែង លើវិស័យពាណិជ្ជកម្មអន្តរជាតិ ជាពិសេសផ្នែកវាយនភណ្ឌកាត់ដេរ និងផលិតស្បែកជើង ការគ្រប់គ្រងលើតម្លៃពលកម្មដ៏សមស្របមួយគឺជាចំណុច អាទិភាពមួយ ដែលប្រទេសកម្ពុជាត្រូវគិតគូរជាចាំបាច់។ លោកបញ្ជាក់ថា ការពង្រឹងយន្តការកំណត់ប្រាក់ឈ្នួលអប្បបរមា គឺពិតជាមានសារៈសំខាន់ក្នុងការឆ្លើយតបទៅនឹងស្ថានភាពសេដ្ឋកិច្ច និងសង្គមរបស់កម្ពុជា។
សូមបញ្ជាក់ថា នៅព្រឹកថ្ងៃទី ២០ ខែមេសា ឆ្នាំ ២០១៧ ក្រសួងការងារ និងបណ្តុះបណ្តាលវិជ្ជាជីវៈ បានបើកសិក្ខាសាលាពិគ្រោះយោបល់ស្តីពីសេចក្តីព្រាងច្បាប់ស្តីពីប្រាក់ឈ្នួលអប្បបរមា ក្នុងគោលបំណងប្រមូលធាតុចូល និងអនុសាសន៍នានាលើសេចក្តីព្រាងបឋមនៃច្បាប់ប្រាក់ឈ្នួលអប្បបរមា សំដៅធ្វើយ៉ាងណាឱ្យសេចក្តីព្រាងច្បាប់នេះ កាន់តែមានប្រសិទ្ធភាព តម្លាភាព និងអាចអនុវត្តបានក្នុងបរិបទនៃការវិវឌ្ឍរបស់កម្ពុជា។
លោកហេង សួរ អ្នកនាំពាក្យក្រសួងការងារបានប្រាប់ឲ្យដឹងច្បាប់ស្តីពីប្រាក់ឈ្នួលអប្បបរមា នឹងត្រូវអនុវត្តលើគ្រប់វិស័យទាំងអស់ ពោលគឺមិនចំពោះតែវិស័យកាត់ដេរនោះទេ។ ប៉ុន្តែលោកលើកឡើងថាក្នុងដំណាក់កាលដំបូងច្បាប់នេះ នឹងអនុវត្តតែលើវិស័យណា ដែលមានកម្លាំងពលកម្មច្រើន ដូចជាវិស័យកាត់ដេរនេះជាដើម ហើយការអនុវត្តលើវិស័យណាមួយផ្សេងទៀត គឺអាស្រ័យលើការពិភាក្សាគ្នានៅក្នុងយន្តការត្រីភាគី។
លោកអាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ដែលបានចូលរួមក្នុងសិក្ខាសាលានោះដែរ បានថ្លែងថាច្បាប់នេះ មានចំណុចល្អ និងមានចំណុចមិនល្អមួយចំនួន។ លោកបញ្ជាក់ថានៅពេល ដែលច្បាប់នេះអនុវត្ត នោះសហជីព និងភាគីពាក់ព័ន្ធអាចជជែកគ្នាពីកំណត់ប្រាក់ឈ្នួល ហើយច្បាប់នេះក៏បង្កើតឲ្យមានសមាសភាពក្រុមប្រឹក្សាចរចាពីគ្រប់ភាគីស្មើគ្នាដែរ។
ចំពោះចំណុចមិនល្អវិញ លោកបញ្ជាក់ថា ច្បាប់នេះគឺផ្តល់សិទ្ធិឲ្យរដ្ឋមន្ត្រីក្រសួងការងារច្រើន លើការកំណត់ប្រាក់ឈ្នួល ហើយភាគីសហជីពគឺបានត្រឹមតែពិភាក្សាគ្នា។ លោកបន្ថែមថានៅពេល ដែលសហជីពបានចូលជាសមាជិកនៃគណៈកម្មការប្រាក់ឈ្នួលហើយ នោះច្បាប់នេះនឹងកំណត់មិនឲ្យមានការដឹកនាំការតវ៉ាណាមួយទេ។ មិនត្រឹមតែប៉ុណ្ណោះ ច្បាប់នេះក៏បានដកសិទ្ធិតំណាងកម្មករ និងកម្មករនៅពេលចរចាប្រាក់ឈ្នួលដែរ។
ចំណែកតំណាងនិយោជកវិញ បានលើកឡើងថាច្បាប់នេះ នឹងធ្វើឲ្យមានស្ថិរភាពនៅក្នុងវិស័យឧស្សាហកម្ម និងវិស័យសេវាកម្មផង។
គួរបញ្ជាក់ថា ប្រាក់ឈ្នួលអប្បបរមា គិតចាប់ពីឆ្នាំ ១៩៩៧ រហូតមកដល់ពេលនេះ រដ្ឋាភិបាលបានដំឡើងប្រាក់ឈ្នួលអប្បបរមា និងអត្ថប្រយោជន៍ផ្សេងៗ របស់កម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើង បានចំនួន ១៣លើក ដោយកើនពី ៣០ដុល្លារអាមេរិក ក្នុងឆ្នាំ ១៩៩៧ ដល់ ១៥៣ដុល្លារអាមេរិក ក្នុងឆ្នាំ ២០១៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ