ស្តាប់ ថតទុក Podcast
  • 00h00 - 01h00 GMT
    កម្មវិធីព័ត៌មាន 18/09 00h00 GMT
  • 06h00 - 07h00 GMT
    កម្មវិធីព័ត៌មាន 18/09 06h00 GMT
  • 12h00 - 13h00 GMT
    កម្មវិធីព័ត៌មាន 18/09 12h00 GMT
កម្ពុជា

ប្រមុខ​រដ្ឋា​ភិបាល​ជា​បន្ត​បន្ទាប់​អបអរ​លោក​ ហ៊ុន សែន ជា​នាយក​រដ្ឋ​មន្ត្រី​នៃ​រដ្ឋា​ភិបាល​កម្ពុជា​អាណត្តិ​ថ្មី​ ខណៈ​អាមេរិក​និង​អឺរ៉ុប​ស្ងាត់​ស្ងៀម​

media  
លោក​នាយក​រដ្ឋមន្ត្រី ហ៊ុន សែន @Samdech Hun Sen, Cambodian Prime Minister

មួយ​សប្តាហ៍​បន្ទាប់​ពី​គណៈ​រដ្ឋមន្ត្រី​ថ្មី អាណត្តិ​ទី​៦​របស់​កម្ពុជា ​បាន​ចាប់​កំណើត​ជា​ផ្លូវការ មេដឹកនាំ​នៃ​បណ្តា​ប្រទេស​ក្នុង​តំបន់ ​និង​ពិភពលោក​ជា​បន្ត​បន្ទាប់​បាន​ផ្ញើ​សារ​អបអរ ដល់​លោកនាយក​រដ្ឋមន្ត្រី ​ហ៊ុន សែន​ ដែល​ត្រូវ​បាន​ក្លាយ​ជា​នាយក​រដ្ឋមន្ត្រី​អាណត្តិ​បន្ត​។ ​ការ​អបអរ​ទាំងនេះ ​បាន​ធ្វើ​ឡើង​ខណៈ​ដែល ​ប្រទេស​លោក​ខាងលិច​មួយ​ចំនួន​ នៅ​តែ​ប្រកាន់​ជំហរ​ស្ងៀមស្ងាត់ ​ជុំវិញ​ការ​បង្កើត​រដ្ឋាភិបាល​អាណ​ត្តិ​ថ្មី​របស់​កម្ពុជា​។  

ប្រមាណ​មួយ​សប្តាហ៍​បន្ទាប់​ពី​រដ្ឋា​ភិ​បាល​អាណត្តិ​ថ្មី ​ត្រូវ​បាន​បង្កើត​ឡើង ​បណ្តា​ប្រទេស ​ដែលជា​មិត្ត​កម្ពុជា​មួយ​ចំនួន​ បាន​សរសេរ​លិខិត​ជា​បន្តបន្ទាប់​ផ្ញើ​ជូន​ប្រមុខ​រដ្ឋាភិបាល​កម្ពុជា ​លោកនាយក​រដ្ឋមន្ត្រី ​ហ៊ុន សែន​។

ជប៉ុន ​និង ​អាឡឺម៉ង់ ​គឺ​ជា​ប្រទេស ​ដែល​ធ្វើ​ឲ្យ​មាន​ការ​ចាប់អារម្មណ៍​ជាង​គេ ​ក្នុង​ចំណោម​ប្រទេស​ ដែល​សរសេរ​លិខិត​មក​អបអរ​ប្រមុខ​រដ្ឋាភិបាល​កម្ពុជា​ថ្មី​លោក ​ហ៊ុន សែន​។ ​លោកនាយក​រដ្ឋមន្ត្រី​ជប៉ុន ​ស៊ីន​ហ្សូ អា​បេ ឲ្យ​ដឹង​ថា ​ប្រទេស​កម្ពុជា​ទទួល​បាន​នូវ​សុខ​សន្តិភាព ​និង​ស្ថិរភាព​ក្នុង​រយៈពេល​២៥​ឆ្នាំ ​កន្លង​ទៅ​នេះ ​ក្រោយ​ការ​បោះឆ្នោត​រៀបចំ​ដោយ ​អ៊ុនតាក់​។ លោក​ សង្ឃឹម​ថា ​ក្រោម​ការ​ដឹកនាំ​របស់​លោក ​ហ៊ុន សែន ​ប្រជាជន​កម្ពុជា​ទាំងអស់​នឹង​រួបរួមគ្នា និង​សម្រេច​បាន​ការ​អភិវឌ្ឍ​ខ្លាំងក្លា​បន្ថែមទៀត​ តាមរយៈ​ការ​បន្ត​លើក​កម្ពស់​ដំណើរការ​ប្រជាធិបតេយ្យ​នៅ​កម្ពុជា​។

លោកស្រី​អធិការបតី​អាឡឺម៉ង់ ​Angela Merkel កាល​ពី​ពេល​ថ្មី​ៗ​នេះ ​ក៏​បាន​សរសេរ​លិខិត​ជូនពរ​ លោក​ ហ៊ុន សែន​ ដែរ ​ដោយ​លោកស្រី ​Merkel​ បញ្ជាក់​ថា ​ប្រទេស ​និង​ប្រជាជន​យើង​ទាំងពីរ​មាន​ទំនាក់ទំនង​ល្អ​។ ​មិត្តភាព​រវាង​ប្រទេស​ទាំងពីរ​ត្រូវ​បាន​ឆ្លុះបញ្ចាំង​ជា​ពិសេស​តាមរយៈ​កិច្ច​សហប្រតិបត្តិការ​ក្នុង​គោលនយោបាយ​អភិវឌ្ឍន៍​អស់​រយៈពេល​ជាច្រើន​ឆ្នាំ​កន្លង​មក​ហើយ ឈរ​លើ​មូលដ្ឋាន​កិច្ច​ព្រមព្រៀង​ទីក្រុង​ប៉ារីស​ឆ្នាំ​១៩៩១ ​ដែល​ចែង​ពី​ការ​គោរព​សិទ្ធិ​មនុស្ស ​នីតិរដ្ឋ និង​គោលការណ៍​ប្រជាធិបតេយ្យ​ ព្រមទាំង​ការ​បោះឆ្នោត​ដោយ ​សេរី​និង​យុត្តិធម៌​»​។

លោកស្រី ​Angela Merkel​ បាន​បញ្ជាក់​ថា ​ចំពោះ​កិច្ច​ការ​ពង្រឹង​ប្រជាធិបតេយ្យ​និង​ការ​ចូលរួម​តាមរយៈ​កិច្ច​សន្ទនា​នយោបាយ​ដោយ​បើក​ចំហរ​នៅ​កម្ពុជា​ លោក​នាយក​រដ្ឋមន្ត្រី ​អាច​ពឹង​ផ្អែកលើ​អាល្លឺម៉ង់​បាន​។ ​លើស​ពីនេះ​ មាន ​ចិន ​រុស្ស៊ី ​ដែលជា​ប្រទេស​មហា​អំណាច ​ក៏​បាន​សម្តែង​ការ​អបអរ ​និង​ជូនពរ​ដល់​ប្រមុខ​រដ្ឋាភិបាល​ថ្មី​កម្ពុជា​។ ​ក្រៅពីនេះ ​មាន​ប្រទេស ​កូរ៉េខាងត្បូង អ៊ុយ​ក្រែ​ន ​ឥណ្ឌា ​ទួ​ក​គី ​ប៉ា​ឡេ​ស្ទី​ន ​និង​បណ្តា​ប្រទេស​នៅក្នុង​តំបន់​អាស៊ាន​។

សូម​បញ្ជាក់​ថា ​បន្ទាប់​ពី​ការ​បោះឆ្នោត ​កាល​ពី​ថ្ងៃ​ទី​២៩​ខែ​កក្កដា ​ដែល​មាន​ការ​ចូលរួម​ចំនួន​២០​គណបក្ស​ គឺ​គណបក្ស​ប្រជាជន​កម្ពុជា​បាន​ឈ្នះ​អាសនៈ​រដ្ឋសភា​ទាំង​អស់ ​ចំនួន​១២៥​អាសនៈ​។​ ជាការ​កត់​សម្គាល់​ដែរ ​ការ​បើក​កិច្ច​ប្រជុំ​រដ្ឋសភា​ដំបូង​នា​ថ្ងៃ​ទី​០៥ ​កញ្ញា ​កន្លង​ទៅ ​ស្ថានទូត​នៃ​ប្រទេស​លោក​ខាងលិច​ចំនួន​៩ ​បាន​អវត្តមាន​ពី​ការ​អញ្ជើញ​នេះ​ ក្នុង​នោះ​មាន​សហរដ្ឋអាមេរិក​ អូស្ត្រាលី ​និង​សហភាព​អឺរ៉ុប​ជា​ដើម ​ហើយ​ប្រទេស​ជប៉ុន​ បាន​ត្រឹម​បញ្ជូន ​តំណាង​បេសកកម្ម​ទូ​តទៅ​ចូលរួម​ប៉ុណ្ណោះ​។ ទោះយ៉ាងណា ​មន្ត្រី​រដ្ឋាភិបាល​កម្ពុជា ​មាន​ជំនឿ​ថា ​សារ​អបអរ​សាទរ ​ដល់​រដ្ឋាភិបាល​ថ្មី​របស់​កម្ពុជា​នឹង​មាន​ធ្លាក់​មក​ជា​បន្តបន្ទាប់​ទៀត​៕

ទាក់ទង​នឹង​ប្រធានបទ​នេះ
 
សូមអភ័យទោស យើងមិនអាច​ភ្ជាប់​ទៅ​ទំព័រ​ដែល​លោកអ្នក​ស្នើសុំ​បានទេ