ម្ចាស់ដើម អាចប្រឈមនឹងតុលាការ នៅពេលយានយន្តប្រព្រឹត្តិល្មើសច្បាប់ បើមិនទាន់កាត់ឈ្មោះឲ្យអ្នកប្រើប្រាស់
មានប្រតិកម្មជាច្រើន នៅលើបណ្តាញសង្គមហ្វេសប៊ុក បន្ទាប់ពី គេហទំព័រ អគ្គស្នងការនគរបាលជាតិ កាលពីថ្ងៃពុធ ទី២៩ ខែមីនា បានស្រង់ប្រសាសន៍ លោក ហ៊ឹម យ៉ាន អគ្គស្នងការរងនគរបាលជាតិ ដែលប្រកាសព្រមានថា នៅពេលខាងមុខ ម្ចាស់យានយន្តទាំងអស់ដែលមិនទាន់កាត់ឈ្មោះកម្មសិទ្ធិ នឹងត្រូវផាកពិន័យ ហើយនឹងត្រូវបញ្ជូនទៅតុលាការបើមិនទាន់កាត់ឈ្មោះ។ លោក ហ៊ឹម យ៉ាន បានបញ្ជាក់ប្រាប់វិទ្យុបារាំង RFI នៅថ្ងៃព្រហស្បតិ៍នេះថា វាជាការយល់ច្រលំមួយរបស់អ្នកប្រើប្រាស់បណ្តាញសង្គម ហើយ ផ្ទុយទៅវិញទេ គឺ ម្ចាស់ដើមនៃរថយន្តដែលបានចុះបញ្ជីនៅក្រសួងសាធារណការ នោះទៅវិញទេ ដែលអាចនឹងរងការពិន័យ ឬឡើងដល់តុលាការ នៅពេលយានយន្តនោះបានប្រព្រឹត្តិល្មើសច្បាប់។
ចុះផ្សាយនៅថ្ងៃ៖
ស្តាប់ - ០៣:០៣
អគ្គស្នងការរងនគរបាលជាតិ លោកឧត្តមសេនីយ៍ឯក ហ៊ឹម យ៉ាន បានថ្លែងថា បើទោះបីជា រាជរដ្ឋាភិបាលកម្ពុជា មិនទាន់ចាប់បង្ខំឲ្យ អ្នកប្រើប្រាស់យានយន្តលើដងផ្លូវ ត្រូវតែកាត់ឈ្មោះពី ម្ចាស់កម្មសិទ្ធិក៏ដោយ តែផ្ទុយទៅវិញ ម្ចាស់ដើមនៃរថយន្តដែលបានចុះបញ្ជីនៅក្រសួងសាធារណការ អាចនឹងរងការពិន័យ ឬប្រឈមនឹងតុលាការ នៅពេលយានយន្តនោះបានប្រព្រឹត្តិល្មើសច្បាប់។ លោកបន្ថែមថា ក្នុងការផាកពិន័យអ្នកបើកបរល្មើសល្បឿនកំណត់ អ្នកប្រព្រឹត្តិល្មើស មិនត្រូវបានបញ្ឈប់នៅលើដងផ្លូវ តែ បណ្ណផាកពិន័យ រួមនឹងរូបថតយានយន្តល្មើសល្បឿន នឹងត្រូវផ្ញើទៅកាន់ អាសយដ្ឋានយានយន្តដែលចុះបញ្ជីនៅក្រសួងសាធារណការ។ ប្រសិនបើ ម្ចាស់កម្មសិទ្ធិយានយន្ត មិនបានមកបង់ប្រាក់ពិន័យក្នុងរយះពេល ៩០ថ្ងៃ នោះ នគរបាលជាតិ នឹងបញ្ជូនសំណុំរឿងនេះទៅតុលាការ។ ករណី កម្មសិទ្ធិករ មានអំណះអំណាងថា គាត់បានលក់យានយន្តទៅឲ្យអ្នកដទៃទៀតហើយ នោះសមត្ថកិច្ចនឹងបន្តស្វែងរកអ្នកប្រើប្រាស់ ដែលប្រព្រឹត្តិល្មើសច្បាប់ឲ្យមកទទួលខុសត្រូវជាបន្តទៅទៀត។
ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ លោកឧត្តមសេនីយឯក រុន រ័ត្នវាសនា បានបញ្ជាក់ថា តាមផ្លូវច្បាប់ បើមានគ្រោះថ្នាក់ចរាចរណ៍ កម្មសិទ្ធិករនៃយានយន្ត ត្រូវទទួលរងសំណងរដ្ឋប្បវេណីចំពោះជនរងគ្រោះ ចំណែក អ្នកបើកបរល្មើស ត្រូវទទួលកំហុសព្រហ្មទណ្ឌ បើករណីបើកបរបណ្តាលឲ្យអ្នកដទៃស្លាប់ ឬរបួស។ បើតាម មាត្រា ៨៥នៃ ច្បាប់ចរាចរណ៍ផ្លូវគោក ជនបើកបរ ដោយធ្វេសប្រហែស ខ្ជីខ្ជា មិនប្រុងប្រយ័ត្ន បណ្តាលឲ្យស្លាប់អ្នកដទៃ ត្រូវផ្តន្ទាទោសដាក់ពន្ធនាគារពី មួយឆ្នាំ ទៅ បីឆ្នាំ និងពិន័យជាប្រាក់ពី បួនលានរៀល ទៅ ដប់ប្រាំលានរៀល និងអាចផ្តន្ទាទោសបន្ថែមមួយ ឬច្រើនទៀត។ លោក រុន រ័ត្នវាសនា បន្ថែមថា ម្ចាស់ដើម ត្រូវមានសំអាងថា គាត់បានលក់យានយន្តទៅឲ្យអ្នកដទៃហើយ ទើបអាចរួចពីការទទួលខុសត្រូវ។
នាយកវិទ្យាស្ថានសុវត្ថិភាពចរាចរណ៍ លោក អ៊ា ចរិយា យល់ថា ការទិញ-លក់យានយន្ត គួរតែមានការផ្ទេរម្ចាស់កម្មសិទ្ធិ ភ្លាមៗទើបជាការប្រសើរ សម្រាប់ការគ្រប់គ្រងប្រព័ន្ធទិន្នន័យយានយន្ត និងការផាកពិន័យ។ តែនៅកម្ពុជា ការផ្ទេរកម្មសិទ្ធិយានយន្ត ហាក់ចំណាយពេលយូរ និងនីតិវិធីស្មុគស្មាញពេក ដែលជាឧបសគ្គដល់ផ្ទេរកម្មសិទ្ធិនៅពេលទិញលក់ ទើបវាបានក្លាយជាបញ្ហាមួយសម្រាប់ម្ចាស់យានយន្ត ដែលទិញបន្តគ្នាច្រើនជុំ។
គួរជម្រាបថា បើតាម ការសម្រេចរបស់លោកនាយករដ្ឋមន្រ្តី ហ៊ុន សែន និង សេចក្តីជូនដំណឹង របស់ គណៈកម្មាធិការជាតិសុវត្ថិភាពចរាចរណ៍ផ្លូវគោក កាលពីដើមខែមករា ឆ្នាំ២០១៦ រាជរដ្ឋាភិបាលកម្ពុជា បានទទួលស្គាល់ការកាន់កាប់ជាក់ស្តែងនូវយានយន្តគ្រប់ប្រភេទដែលពលរដ្ឋកំពុងមាន ពោលគឺ ពលរដ្ឋដែលកំពុងប្រើប្រាស់យានយន្តទិញតពីគេ មិនបាច់កាត់ឈ្មោះ និងមិនត្រូវបង់សេវាអ្វីទាំងអស់ គឺពលរដ្ឋអាចបន្តប្រើឯកសារ និងផ្លាកលេខយានយន្តដែលកំពុងមានស្រាប់ជាបន្តទៀត។ តាមរបាយការណ៍ របស់ក្រសួងសាធារណការ និងដឹកជញ្ជូន គិតពីឆ្នាំ១៩៩០ ដល់ឆ្នាំ២០១៦ នៅ កម្ពុជា មានយានយន្តបានចុះបញ្ជីសរុប ចំនួន ៣.៦៦៨.៨២០គ្រឿង (ក្នុងនោះ ម៉ូតូ មាន ៣.១៣២.៣៦១ គ្រឿង និងរថយន្ត ៥៣៧.៤៥៩គ្រឿង)។ ការចុះបញ្ជី រថយន្ត ធុនតូច មានសុពលភាព អចិន្រ្តៃយ៍ រយះពេល ១០ថ្ងៃ តម្លៃ ១២ម៉ឺន៥ពាន់រៀល (១២៥.០០០រៀល) ឬផ្ទេរកម្មសិទ្ធិ រថយន្តធុនតូច ក្នុងរាជធានី ខេត្ត ៤ម៉ឺន៨ពាន់រៀល (៤៨០០០រៀល) ខណៈផ្ទេរកម្មសិទ្ធិរថយន្តធុនតូច ឆ្លងរាជធានី ខេត្ត មានតម្លៃ ១០ម៉ឺន១ពាន់រៀល (១០១០០០រៀល)។ ចំណែក ការចុះបញ្ជី ឬផ្ទេរកម្មសិទ្ធិ ម៉ូតូ តម្លៃ ៤ម៉ឺនរៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ