សង្គមស៊ីវិលជម្រុញឲ្យរដ្ឋាភិបាលបន្តស្វែងរកយុត្តិធម៌ឲ្យជនរងគ្រោះព្រោះអាស៊ីត
ចុះផ្សាយនៅថ្ងៃ៖
ស្តាប់ - ១០:១៥
មន្ត្រីអង្គការសង្គមស៊ីវិលមួយចំនួនបានជម្រុញឲ្យរដ្ឋាភិបាលបន្តស្វែងរកយុត្តិធម៌ជូនជនរងគ្រោះព្រោះទឹកអាស៊ីត។ ការផ្ដល់យុត្តិធម៌តាមរយៈ ការចាប់ជនដៃដល់មកទទួលខុសត្រូវ, ការព្យាបាលដល់ជនរងគ្រោះ និងការប៉ះប៉ូវនូវសំណងសម្រាប់ជនរងគ្រោះ។ ការជម្រុញរបស់សង្គមស៊ីវិលទាំងនេះធ្វើឡើងបន្ទាប់ពីអង្គការឃ្លាំមើលសិទ្ធិមនុស្ស (HRW) នៅថ្ងៃទី០៤ ខែកុម្ភៈ លើកឡើងថា ការវាយប្រហារដោយទឹកអាស៊ីដនៅក្នុងប្រទេសកម្ពុជាបានថយចុះ បន្ទាប់ពីរដ្ឋាភិបាលបានអនុម័តច្បាប់គ្រប់គ្រងអាស៊ីដខ្លាំង។ ប៉ុន្តែអង្គការឃ្លាំមើលសិទ្ធិមនុស្សនេះរកឃើញថារដ្ឋាភិបាលបរាជ័យក្នុងការផ្តល់ជំនួយដល់ជនរងគ្រោះ។ ប៉ុន្តែយ៉ាងណាក៏ដោយ រដ្ឋាភិបាលបានច្រានចោលជុំវិញការថ្លែងអង្គការឃ្លាំមើលសិទ្ធិមនុស្សស្ដីពីអាស៊ីត ដោយងាកមកឆ្លើយតបជាមួយអង្គការសង្គមស៊ីវិលនៅក្នុងស្រុកថា កន្លងមកអាជ្ញាធរមិនដែលបន្ថូរបន្ថយចំពោះជនល្មើសនៅក្នុងសំណុំរឿងទឹកអាស៊ីតឡើយ។ សូមបញ្ជាក់ថា នៅកម្ពុជាករណីវាយប្រហារដោយទឹកអាស៊ីដ ដែលត្រូវបានរាយការណ៍មានចំនួន៤០ករណី ដែលជាចំនួនខ្ពស់បំផុតនៅឆ្នាំ២០០០ ហើយនៅឆ្នាំ២០១០ មានរលកនៃការវាយប្រហារមួយទៀត ដែលមានជនរងគ្រោះសរុបចំនួន៣៦នាក់។ ដូច្នេះយុត្តិធម៌បែបណាដែលជនរងគ្រោះព្រោះទឹកអាស៊ីតត្រូវទទួលបាន ?