១៧មេសា៤៤ឆ្នាំមុន៖ ភ្នំពេញក្លាយជាទីក្រុងស្ងាត់សូន្យ នៅគ្រាប្រជាជនត្រូវបានបណ្តេញចេញទាំងបង្ខំ
ថ្ងៃទី១៧ ខែមេសា ឆ្នាំ២០១៩នេះ គឺជាខួបលើកទី៤៤ឆ្នាំ នៃការឡើងកាន់អំណាចរបស់ពួកខ្មែរក្រហម។ ពួកខ្មែរក្រហមដែលបានបណ្តេញប្រជាពលរដ្ឋខ្មែរឲ្យចាកចេញពីទីក្រុងភ្នំពេញ ទៅកាន់ទីជនបទ ធ្វើស្រែចំការ។ ៣ឆ្នាំ៨ខែនិង២០ថ្ងៃ នៃការគ្រប់គ្រងដោយរបបអាវខ្មៅនេះ ធ្វើឲ្យប្រជាជនស្លាប់ជាង១.៧លាននាក់ ដោយសារ ការសម្លាប់ ការបង្អត់អាហារ និងអំពើឃោរឃៅផ្សេងៗទៀត។
ចុះផ្សាយនៅថ្ងៃ៖
ស្តាប់ - ០៣:៣៨
ថ្ងៃនេះ កាលពី៤៤ឆ្នាំមុន ទីក្រុងភ្នំពេញត្រូវបានក្លាយជាទីក្រុងស្ងាត់សូន្យ ក៏ព្រោះតែកងទ័ពរបស់ខ្មែរក្រហម បានរាំងខ្ទប់មិនឲ្យប្រជាជនដែលទៅលេងស្រុកកំណើតក្នុងឱកាលបុណ្យចូលឆ្នាំថ្មី វិលចូលទីក្រុងភ្នំពេញវិញ។ នៅគ្រានោះហើយ ដែលកងទ័ពខ្មែរក្រហមបានប្រកាសពីជ័យជំនះរបស់ខ្លួនលើរបបសាធារណៈ លន់ នល់ ដែលគាំទ្រ ដោយសហរដ្ឋអាមេរិក។
ឧបករណ៍បំពងសំឡេងរបស់ពួកខ្មែរក្រហម ត្រូវបានចាក់យ៉ាងកងរំពងពេញទីក្រុងនិងទីប្រជុំជន ដែលស្ថានីយវិទ្យុនិងទូរទស្សន៍របស់រដ្ឋត្រូវបានខ្មែរក្រហមចូលកាន់កាប់។
១៧មេសា ឆ្នាំ១៩៧៥ គឺជាថ្ងៃដែលកងទ័ពសាធារណរដ្ឋខ្មែររបស់ សេនាប្រមុខ លន់ នល់ លើកទង់ជ័យស ព្រមចុះចាញ់ពួកខ្មែរក្រហម។ រីឯប្រជាជនដែលនៅសេសសល់ក្នុងទីក្រុងទាំងអស់ត្រូវបានបញ្ជាឲ្យចេញមកស្វាគមន៍ការចូលមកដល់របស់កងទ័ពខ្មែរក្រហមដែលពាក់ឈុតខ្មៅ អាយុត្រឹម១៦ ទៅដល់១៧ឆ្នាំ ដៃកាន់អាវុធ អាកា ៤៧ គ្រាប់បែក និង ស្ពាយ បេ មានទឹកមុខមាំបានប្រកាសឲ្យប្រជាជនចេញពីទីក្រុង ២ ទៅ៣ថ្ងៃ និងមិនឲ្យយកសម្ភារៈទៅតាមខ្លួនច្រើនប៉ុន្មានទេ។ ពេលនោះ ប្រជាជនខ្មែរជាច្រើនមានសង្ឃឹមថា ប្រទេសជាតិនឹងមានសុខសន្តិភាព ព្រោះកងទ័ពខ្មែរក្រហមកាលណោះស្ថិតក្រោមរដ្ឋាភិបាលដែលមានសម្តេចសីហនុជាប្រមុខ។
ប៉ុន្តែមិនយូរប៉ុន្មានក្តីសង្ឃឹមមួយនេះបានរលាយសូន្យសុង នៅគ្រាដែលប្រជាជនក្នុងទីក្រុង ត្រូវបានពួកខ្មែរក្រហមបណ្តេញចេញទាំងបង្ខំទៅកាន់ទីជនបទឲ្យធ្វើស្រែចំការដោយប្រើជាកំលាំងអូសទាញដូចសត្វពាហនៈ។
ពីមួយថ្ងៃទៅមួយថ្ងៃ ក្តីរំពឹងចំពោះរបបថ្មីដែលកើតចេញពីបដិវត្តរបស់ខ្មែរក្រហមថា នឹងនាំឱ្យពួកគេទទួលបានការរីកចម្រើនមហាលោតផ្លោះនោះ បានប្រែក្លាយទៅជារលាយសូន្យសុង និងមានការកាប់សម្លាប់យ៉ាងរង្គាល។ ជាបន្តបន្ទាប់ ប្រជាជនណាដែលដើរចេញពីទីក្រុងភ្នំពេញយឺតត្រូវកងទ័ពខ្មែរក្រហាមបាញ់សម្លាប់ចោលនៅតាមផ្លូវ។ ប្រជាជនខ្លះដែលចាស់ជរាបានដួលឈឺដេករណូករណែលតាមផ្លូវ សូម្បីអ្នកជំងឺដែលដើរមិនរួចនោះក៏ត្រូវបង្ខំចិត្តលួនចេញពីមន្ទីរពេទ្យផងដែរ។
ក្រៅពីជម្លៀសមនុស្សចេញពីក្រុង ខ្មែរក្រហមបានលុបចោលរាល់កម្មសិទ្ធិឯកជន ហើយរូបីយវត្ថុជាតិត្រូវគេបោះបង់ ធនាគារជាតិរងការបំផ្លិចបំផ្លាញមិនដំណើការឡើយ។ ទីតាំងរោងចក្រឧស្សាហកម្មវិញនោះត្រូវគេបោះបង់ចោល គ្មានឡើយកម្មសិទ្ធឯកជន ព្រោះគ្រប់យ៉ាងស្ថិតក្រោមការគ្រប់គ្រងរបស់រដ្ឋ។ វត្តអារ៉ាមដែលធ្លាប់ជាកន្លែងសក្ការៈបូជាតាមបែបព្រះពុទ្ធសាសនានោះត្រលប់ទៅកន្លែងចិញ្ចឹមជ្រូក ហើយព្រះសង្ឃត្រូវខ្មែរក្រហមចាប់ផ្សឹកនិងធ្វើទុក្ខបុកម្នេញឬសម្លាប់ផងក៏មាន។
តុល្យការនៃការកាន់អំណាចរយៈពេល៣ឆ្នាំ ៨ខែ និង២០ថ្ងៃរបស់ខ្មែរក្រហម គឺបានធ្វើឲ្យស្លាប់ប្រជាជនខ្មែរជាង១.៧លាននាក់ ទៅ២.២លាននាក់ ដោយការសម្លាប់ ការបង្អត់អាហារ ជំងឺ និងអំពើ ឃោឃៅផ្សេងៗទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ