ពលករបរទេសខុសច្បាប់ត្រូវបានផ្តល់ការងារក្នុងប្រទេសកម្ពុជាលាយឡំពលករស្របច្បាប់
ចុះផ្សាយនៅថ្ងៃ៖
ស្តាប់ - ០៥:២៣
ភាពធូររលុងនៃមន្ត្រីអនុវត្តច្បាប់អន្តោប្រវេសន៍កន្លងមក បានធ្វើឲ្យកំលាំងពលកម្មបរទេសខុសច្បាប់មានឱកាសចូលមកទឹកដីខ្មែរ តាំងទីលំនៅនិងប្រជែងបានការងារជាច្រើនជាមួយកំលាំងពលកម្មក្នុងស្រុកនៅតាមក្រុមហ៊ុន សហគ្រាស និងសិប្បកម្មនានា។ កំលាំងពលកម្មខ្មែរនឹងរងនូវការបាត់បង់ឱកាសការងារសំខាន់ៗ ប្រសិនបើមិនមានការយកចិត្តទុកដាក់បង្កើនជំនាញខណៈដែលពលករបរទេសនឹងចូលលុកលុយទីផ្សារការងារខ្មែរតាមរយៈសមាហរណ កម្ម អាស៊ាននាពេលខាងមុខ។
ការរកឃើញជនបរទេសនៅកន្លែងធ្វើការងារឯកណ្តាលក្រុងភ្នំពេញ និងកន្លែងដទៃទៀតនៃប្រទេសកម្ពុជា បង្ហាញថាការប្រើប្រាស់ពលករបរទេសនៅក្នុងការដ្ឋាននានាកន្លងមកក៏ដូចជាបច្ចុប្បន្នមិនមានការត្រួតពិនិត្យត្រឹមត្រូវនោះទេ។ តាមរយៈយុទ្ធនាការលុបបំបាត់ជនបរទេសខុសច្បាប់នៅកម្ពុជា មានជនជាតិវៀតណាមនិងជនជាតិចិនជាច្រើនកំពុងតែធ្វើការងារ លាយឡំគ្នាជាមួយជនជាតិខ្មែរ ដោយកន្លែងខ្លះពលករបរទេសទាំងមានជំនាញនិងមិនជំនាញត្រូវបានអនុញ្ញាតឲ្យធ្វើច្រើនជាងពលករខ្មែរម្ចាស់ស្រុក។
ការបណ្តែតបណ្តោយឲ្យមានជនបរទេសខុសច្បាប់ធ្វើការនៅក្នុងប្រទេសកម្ពុជា តើអ្វីទៅជាដើមហេតុដែលនាំឲ្យពួកគេអាចចូលមកធ្វើការបានដោយងាយៗដូច្នេះ?
មុននឹងនិយាយពីវត្តមានរបស់ពលករបរទេសខុសច្បាប់ នៅកណ្តាលបេះដូងប្រទេស គេគួរតែតាមមើលពីដំណើរនៃការបំលាស់ទីរបស់ពលករទាំងនោះ។ យើងអាចចែកជាដំណាក់កាលនៃការវិវត្តន៍ទាំងនេះ ដោយគិតជាកងព័ន្ធដូចជាការប្រណាំងទូកងដូច្នោះដែរ ពោលគឺកងព័ន្ធទី១ ពាក់ព័ន្ធទៅនឹងមន្ត្រីអន្តោប្រវេសន៍និងមន្ត្រីមានសមត្ថកិច្ចនានានៅតាមព្រំដែន ប្រសិនបើគេដាក់សំណួរថាចូលដោយរបៀបណា?
លុះឆ្លងផុតកងព័ន្ធទី១ហើយ ជនអន្តោប្រវេសន៍ខុសច្បាប់បានមកដល់កងព័ន្ធទី២ គឺកន្លែង ស្នាក់នៅ។ កន្លែងស្នាក់នៅនេះ វាពាក់ព័ន្ធទៅនឹងមន្ត្រីអាជ្ញាធរមូលដ្ឋាន។ ជាទូទៅមន្ត្រីអាជ្ញាធរមូលដ្ឋានតែងវាងវៃណាស់ចំពោះការស្នាក់នៅដែលមិនមានឯកសារត្រឹមត្រូវ មិនថាជនជាតិខ្មែរ ឬជនបរទេសទេ។ ក៏ប៉ុន្តែការស្នាក់នៅនិងធ្វើការបែបពលករខុសច្បាប់ ដូចដែលបានរកឃើញជាបន្តបន្ទាប់នេះ ចេះតែអាចទៅរួច ហើយបើកុំតែមានយុទ្ធនាការវែករក កុំអីពាក្យសាមញ្ញគេច្រើននិយាយថា៖ «ស្នាក់នៅនិងធ្វើការដោយខុសច្បាប់លើទឹកដីរំដួល ដោយរៀបរយ»។
នៅមិនទាន់អស់ទេគោលដៅចុងក្រោយរបស់ពួកពលករបរទេសនខុសច្បាប់ គឺកន្លែងធ្វើការមួយដែលជាទូទៅនិយមប្រើប្រាស់កំលាំងពលកម្មបរទេសជាងកំលាំងពលកម្មក្នុងស្រុក នោះហើយគឺជាកងព័ន្ធទី៣ ដែលជាកងព័ន្ធចុងក្រោយ ដោយមានទូងស្គរជ័យ។
នៅត្រង់ចំណុចនេះ អ្នកទទួលខុសត្រូវលើវត្តមានពលករបរទេសខុសច្បាប់កាន់តែច្រើន ដោយសារតែការបើកការដ្ឋានមួយ ឬបើកក្រុមហ៊ុនមួយ ចាំបាច់ត្រូវតែសុំការអនុញ្ញាត និងរាយការណ៍ទៅផ្នែកពាក់ព័ន្ធនានា ជាពិសេសក្រសួងការងារដែលត្រូវតែដឹងពីការប្រើប្រាស់បរិមាណ និងសមត្ថភាពកំលាំងពលកម្មទាំងខ្មែរនិងបរទេស។
ក៏ប៉ុន្តែមិនមានការហាមឃាត់ណាមួយមិនឲ្យក្រុមហ៊ុន សហគ្រាស ប្រើប្រាស់កម្លាំងពលកម្មបរទេសនោះទេ ឲ្យតែមានភាពស្របច្បាប់។ លើសពីនេះក៏មានការធ្វើអធិការកិច្ចជាប្រចាំដែរនៅតាមក្រុមហ៊ុន សហគ្រាសនីមួយៗ យ៉ាងហោចណាស់ក៏បានម្តងដែរក្នុងមួយខែ។
មួយវិញទៀតក្នុងករណីដែលប្រទេសកម្ពុជានិងប្រទេសវៀតណាម ឬប្រទេសចិន នៅមិនទាន់ចុះកិច្ចព្រមព្រៀងបញ្ជូននិងទទួលពលករជាមួយគ្នានោះទេ ពលករនៃប្រទេសទាំងនោះមិនអាចស្វែងរកការងារធ្វើនៅក្នុងប្រទេសកម្ពុជាបានទេបើទោះណាជាពលករទំាំងនោះខុសច្បាប់ក្តី ត្រូវច្បាប់ក្តី។ ហើយប្រសិនបើអាចជួលបានតាមកិច្ចព្រមព្រៀង នោះកំលាំងពលកម្មបរទេស ក៏ត្រូវធ្វើឡើងតាមចំនួនកំណត់មួយធៀបទៅនឹងកំលាំងពលកម្មក្នុងស្រុក។
ទោះយ៉ាងនេះក្តីយើងមិនអាចបន្ទោសជាទូទៅបានទេ ដោយសារទីមួយក្រុមហ៊ុន ឬសហគ្រាសមួយចំនួនភាគច្រើនសហគ្រាសបរទេសចូលចិត្តប្រើកំលាំងពលកម្មបរទេសដូចគ្នា។ ទី២ ធនធានកំលាំងពលកម្មខ្មែរនៅមានកំរិត ពោលគឺអ្នកមានជំនាញនៅមិនសូវសំបូរនៅឡើយ។
ហេតុនេះ ក្នុងន័យទីផ្សារការងារ គេមិនអាចនិយាយថាកំលាំងពលកម្មបរទេសចូលមកជ្រៀតជ្រែក ឬដណ្តើមការងារពីពលរដ្ឋខ្មែរបានទេ បើទោះណាជាមិនមានតួលេខណាមួយបង្ហាញពីចំនួនជនបរទេសស្របច្បាប់ចូលមកធ្វើការនៅក្នុងប្រទេសកម្ពុជានៅឡើយ។ រឿងនេះវាមិនខុសគ្នាទេ ពលករខ្មែរចូលទៅធ្វើការនៅប្រទេសថៃនិងម៉ាឡេស៊ីនោះឡើយ។
សម្រាប់បរិបទការងារបច្ចុប្បន្ន កម្ពុជាចាំបាច់ត្រូវបង្កើនជំនាញការងារដល់ពលរដ្ឋខ្មែរខណៈដែលមើលទៅហាក់ដូចជាយឺតពេលបន្តិចហើយក្នុងការច្របាច់ទីផ្សារការងារចូលគ្នានៃសហគមន៍អាស៊ាន នៅឆ្នាំ២០១៥នេះ។
គេគួរតែមានភាពម៉ឺងម៉ាត់ក្នុងការអនុវត្តច្បាប់អន្តោប្រវេសន៍ ដើម្បីទប់ស្កាត់ពលករខុសច្បាប់ ចូលមកកម្ពុជាប្រជែងទីផ្សារការងារខ្មែរ ដែលកំពុងតែមានស្ថានភាពលំបាកស្រាប់ ក្នុងការពង្រឹងសមត្ថភាពរបស់ខ្លួនលើជំនាញជីវៈ ដែលរដ្ឋត្រូវជួយជម្រុញបន្ថែមទៀត។ ជាពិសេសត្រៀមលក្ខណៈរួចជាស្រេចដើម្បីមានកំលាំងពលកម្មចាំទទួលវិនិយោគិន ចៀសវាងគេជួលកំលាំងពលកម្មបរទេសដែលមានតម្លៃថ្លៃជាងកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ