អគ្គនាយកដ្ឋានអន្តោប្រវេសន៍បង្កើនការត្រួតពិនិត្យលើកម្មករបរទេសចូលមកធ្វើការនៅកម្ពុជា
អគ្គនាយកដ្ឋានអន្តោប្រវេសន៍របស់ក្រសួងមហាផ្ទៃ បានឃាត់ខ្លួនជនជាតិវៀតណាមចំនួន៩៤នាក់ បន្ទាប់ពីរកឃើញថាពួកគេមិនមានលិខិតឆ្លងដែន និងឯកសារសម្រាប់បំពេញការងារនៅកម្ពុជា។ ការឃាត់ខ្លួននេះត្រូវបានធ្វើឡើងនៅថ្ងៃទី ២៣ មិថុនាម្សិលមិញ នៅពេលដែលអគ្គនាយកដ្ឋានអន្តោប្រវេសន៍កម្ពុជាចុះត្រួតពិនិត្យរកឯកសាររបស់កម្មករបរទេសជាង ២០០នាក់នៅឯការដ្ឋានសំណង់នៅកោះពេជ្រ ក្នុងរាជធានីភ្នំពេញ។
ចុះផ្សាយនៅថ្ងៃ៖
ស្តាប់ - ០១:១៩
ជនអន្តោប្រវេសន៍វៀតណាមចំនួន ៩៤នាក់កំពុងតែត្រូវបានឃាត់ខ្លួននៅឯអគ្គនាយកដ្ឋានអន្តោប្រវេសន៍កម្ពុជាដើម្បីធ្វើការសាកសួរ និងបញ្ជូនត្រឡប់ទៅកាន់ប្រទេសកំណើតរបស់ពួកគេវិញ ក្នុងរយៈពេលយ៉ាងយូរមួយសប្តាហ៍ បន្ទាប់ពីត្រួតពិនិត្យឃើញថា ពួកគេមិនមានលិខិតឆ្លងដែន និងសៀវភៅការងារនោះ។
លោកឧត្តមសេនីយ៍ទោអ៊ុក ហៃសីឡា ប្រធាននាយកដ្ឋានស៊ើបអង្កេតនិងអនុវត្តនិតិវិធី នៃអគ្គនាយកដ្ឋានអន្តោប្រវេសន៍កម្ពុជាបានប្រាប់វិទ្យុបារាំងថា ជនអន្តោប្រវេសន៍ទាំងជាង ២០០នាក់ ដែលអគ្គនាយកដ្ឋានចុះទៅត្រួតពិនិត្យនៅថ្ងៃទី២៣ មិថុនានោះ មានជនជាតិចិនចំនួន ៨៤នាក់ ជនជាតិវៀតណាមចំនួន ១៣១នាក់។
ដោយឡែកជនជាតិវៀតណាមចំនួន ៣៧នាក់ផ្សេងទៀតមានលិខិតឆ្លងដែន ប៉ុន្តែគ្មានឯកសារដើម្បីបំពេញការងារនៅកម្ពុជានោះ នឹងត្រូវយកទៅផាកពិន័យ។ ហើយជនជាតិចិនទាំង៨៤នាក់ក៏ត្រូវផាកពិន័យជាប្រាក់ក្នុងម្នាក់ ៥០ម៉ឺនរៀលផងដែរ ដោយសារតែពួកគេមានតែលិខិតឆ្លងដែន ទិដ្ឋាការស្នាក់នៅក្នុងរយៈពេលយូរ ប៉ុន្តែគ្មានសៀវភៅការងារ។
សូមជម្រាបជូនថា ចាប់តាំងពីខែមេសា ឆ្នាំ ២០១៤មក រហូតមកដល់បច្ចុប្បន្ននេះ អគ្គនាយកដ្ឋានអន្តោប្រវេសន៍កម្ពុជាបានចាប់ខ្លួននិងបញ្ជូនជនអន្តោប្រវេសន៍ខុសច្បាប់បានចំនួនជាង ២ពាន់នាក់ ឲ្យត្រឡប់ទៅកាន់ប្រទេសកំណើតរបស់ពួកគេវិញ ហើយក្នុងនោះមាន៤៣សញ្ជាតិ ហើយក្នុងនោះមានជនជាតិវៀតណាមច្រើនជាងគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ