តើ “បញ្ហាវៀតណាម” នៅតែជាប្រធានបទសម្រាប់ការឃោសនាបោះឆ្នោត?
ចុះផ្សាយនៅថ្ងៃ៖
ស្តាប់ - ០៤:៤៦
ការប្រឡែងលេងជាមួយនឹងបញ្ហាវៀតណាម គឺជារឿងរសើបដ៏សែនគ្រោះថ្នាក់។ នេះគឺជាការដាស់តឿនរបស់រដ្ឋាភិបាលកម្ពុជា ដែលអះអាងថា បញ្ហាវៀតណាម គឺជាសំណុំរឿងដែលត្រូវអ្នកនយោបាយ ជ្រុលនិយម និង រើសអើងជាតិសាសាន៍ យកធ្វើជាចំណាប់ខ្មាំង ដើម្បីកៀងគររកការគាំទ្រសំឡេងឆ្នោត។ ដូច្នេះ នៅពេលបោះឆ្នោតខាងមុខនេះ, តើ “បញ្ហាវៀតណាម” នៅតែជាប្រធានបទសម្រាប់ការឃោសនា? ហើយតើគេត្រូវដោះស្រាយបញ្ហាជនជាតិវៀតណាមដោយរបៀបណា?
បញ្ហាជាតិសាសន៍របស់វៀតណាម និងកម្ពុជា គឺជាជម្លោះប្រវត្តិសាស្ត្រ ដែលបានកកើតមានឡើងរាប់សិបជំនាន់មកហើយ។ ប្រជាជាតិទាំងពីរ បានកាប់សម្លាប់សងសឹកគ្នាទៅវិញទៅមក ហើយតមកទល់សព្វថ្ងៃ ក៏នៅតែមើលមុខគ្នាមិនត្រង់ ក្នុងចំណោមប្រជាជនមួយចំនួន។
ប៉ុន្មានទសវត្សរ៍ចុងក្រោយនេះ ចំពោះអ្នកនយោបាយជាន់ថ្មី ក៏នៅតែបន្តជីកកកាយដំបៅចាស់។ ការណ៍ដែលអ្នកនយោបាយខ្មែរ តែងយករឿងនេះសម្រាប់ឃោសនា គឺដើម្បីទាក់ទាញប្រជាប្រិយភាព និងស្តែងឲ្យឃើញថា ពួកគេគិតគូរស្នេហាជាតិ និងស្នេហាទឹកដី។
ក៏ប៉ុន្តែ រឿងជាតិសាសន៍ និងរឿងទឹកដីវៀតណាម-កម្ពុជា គឺជាបញ្ហាដ៏រសើបណាស់ ព្រោះវាបង្កការស្អប់ខ្ពើមជាតិសាសន៍ និងញុះញង់ឲ្យមានភាពចលាចល ហិង្សាក្នុងសង្គម ហើយដែលជានិច្ចកាលតែងតែនាំទៅរកភាពតានតឹង និងអសណ្ដាប់ធ្នាប់សាធារណៈ។ ចំពោះរដ្ឋាភិបាលខ្មែរ, ការប្រឡែងលេងជាមួយនឹងបញ្ហាវៀតណាម ដើម្បីតែចំណេញសំឡេងឆ្នោត គឺជាកង្វះការទទួលខុសត្រូវដ៏សែនគ្រោះថ្នាក់។ នេះជាខ្លឹមសារជាសារវ័ន្តក្នុងសេចក្តីបកស្រាយបំភ្លឺ របស់ក្រសួងការបរទេស កម្រាស់ ១៧ទំព័រ ចុះផ្សាយពីម្សិលមិញ។
សេចក្តីស្រាយបំភ្លឺរបស់ក្រសួងការបរទេស ក៏បញ្ជាក់សឲ្យឃើញដែរថា នៅស្ទើរតែគ្រប់ការឃោសនាបោះឆ្នោត តាំងតែពីឆ្នាំ ១៩៩៣មក អ្នកនយោបាយមួយចំនួនដែលប្រឆាំងរដ្ឋាភិបាល គឺតែងតែថ្លែងសាររើសអើងជាតិសាសន៍ ជាពិសេសចំពោះវៀតណាម។ នៅពេលយុទ្ធនាការបោះឆ្នោតឆ្នាំ ១៩៩៨ គឺមានបញ្ឆេះកំហឹងរើសអើងជាតិសាសន៍ ប្រឆាំងវៀតណាម រហូតវាយប្រហារសម្លាប់ជនជាតិវៀតណាម និងដុតស្តូបមិត្តភាពកម្ពុជា - វៀតណាម ថែមទៀត។ ក្រោយមក ក៏មានការញុះញង់ នាំប្រជាជនសាមញ្ញទៅដកបង្គោលព្រំដែនកម្ពុជាវៀតណាម ហើយក៏មានផងដែរ នៅក្រោយមកទៀត ការដុតទង់ជាតិវៀតណាមនៅកណ្តាលក្រុងភ្នំពេញ។ ចំណែកការក្នុងការបោះឆ្នោតជាតិឆ្នាំ ២០១៣កន្លងទៅ សុន្ទរកថារបស់អ្នកនយោបាយខ្លះដែលដៀមដាមពលរដ្ឋវៀតណាម ក៏នៅតែជាទីពេញនិយម។
ត្រង់ចំណុចនេះ ចំពោះអ្នកវិភាគនយោបាយមួយចំនួន គិតថា ប្រសិនបើ អ្នកនយោបាយខ្មែរ ដែលនៅតែប្រកាន់គំនិតជាតិនិយមជ្រុល រើសអើងប្រកាន់ជាតិសាសន៍ទៀតនោះ ការបោះឆ្នោតឃុំសង្កាត់នាពេលខាងមុខ និងការបោះឆ្នោតជាតិនៅឆ្នាំក្រោយ ក៏នឹងនៅតែអាចមានការឃោសនា ដែលនាំឲ្យស្អប់ខ្ពើមជាតិសាសន៍ដដែល។ យ៉ាងណាមិញ អ្នកនយោបាយ នឹងនៅតែយករឿងនេះ ជាប្រធានបទសំខាន់សម្រាប់ការឃោសនារបស់ខ្លួន ប្រសិនបើអ្នកគាំទ្រនៅតែនិយមចង់ស្តាប់ និងប្រសិនបើពួកគេនៅតែមិនទាន់លាងជម្រះគំនិតជ្រុលនិយម ប្រកាន់ជាតិសាសន៍នោះទេ។
យ៉ាងណាក៏ដោយ ការដោះស្រាយបញ្ហាវៀតណាមលើទឹកដីខ្មែរ ក៏ជាបញ្ហារសើបនិងស្មុគស្មាញណាស់ដែរ។ ស្មុគស្មាញ ក៏ព្រោះថាវៀតណាម មានតាំងពីសម័យអាណានិគមបារាំង សម័យសង្គមរាស្ត្រនិយម ហើយរឹងរឹតតែកើនឡើងថែមទៀត ក្រោយការដួលរលំនៃរបបខ្មែរក្រហម។ ចូលកុំភ្លេចថា រដ្ឋាភិបាលសាធារណៈប្រជាមានិតកម្ពុជា ក្រោយមក រដ្ឋកម្ពុជា មានទំនាក់ទំនងជិតស្និទជាមួយរដ្ឋាភិបាលសង្គមនិយមវៀតណាម។ ស្របពេលដែលមានសកលភាវូបនីយកម្មនិងសេរីកម្មសេដ្ឋកិច្ច, ការធ្វើដំណើរចេញចូលទៅមក ស្នាក់នៅ និងធ្វើការងារ គឺជារឿងចៀសមិនផុត។
អាស្រ័យហេតុនេះ បើគ្រាន់តែការកំណត់អត្តសញ្ញាណ និងជំរឿនរបាយប្រជាសាស្ត្រ ក៏ជារឿងស្មុគស្មាញមួយណាស់ទៅហើយ ព្រោះថា ជាតិសាសន៍បានចាក់ឫសគល់ក្នុងសង្គមយ៉ាងជ្រៅណាស់ទៅហើយ ក្នុងសហគមខ្មែរ ហើយទំនងជាមានក្នុងប្រព័ន្ធរដ្ឋបាលខ្លះផង។ ក៏ប៉ុន្តែ គេពុំអាចចាប់គ្រប់មនុស្ស ឲ្យតែសម្គាល់សង្ស័យថា វៀតណាម ហើយបញ្ជូនទៅស្រុកដើមវិញ ឬបាញ់សម្លាប់ ទម្លាក់ទឹកទន្លេ ដូចជំនាន់ លន់ នល់ បាននោះទេ ព្រោះជាការរំលោភសិទ្ធមនុស្ស និងគោលការណ៍មនុស្សធម៌ផង។
ផ្ទុយទៅវិញ បញ្ហាជាតិសាសន៍បរទេស រស់នៅលើទឹកដីខ្មែរ គឺជាបញ្ហារួមរបស់ជាតិ ហើយដែលត្រូវតែដោះស្រាយដោយមានយុទ្ធសាស្ត្រច្បាស់លាស់ និងយ៉ាងប្រយ័ត្នប្រយែងបំផុត ហើយវាត្រូវកើតចេញពីឆន្ទៈរួមគ្នារបស់អ្នកនយោបាយខ្មែរគ្រប់ភាគី។ ការមានឆន្ទៈដោះស្រាយបញ្ហារួមគ្នានេះ គឺមិនគ្រាន់តែចាត់ចែងពីពលរដ្ឋបរទេសនៅក្នុងផ្ទៃប្រទេសឲ្យស្រួលបួលប៉ុណ្ណោះទេ តែក៏នឹងកាន់តែរឹងបន្តឹងតាមច្រកព្រំដែន និងការអនុវត្តច្បាប់សញ្ជាតិថែមទៀត។
ទន្ទឹមនេះ ការផ្តើមកែប្រែផ្នត់គំនិតពលរដ្ឋខ្មែរម្ចាស់ស្រុក ក៏សំខាន់ណាស់ដែរ ក្នុងការបើកចំហចិត្តគំនិតចង្អៀតចង្អល់ប្រកាន់ពូជាសាសន៍និយម។ ព្រោះថា ប្រទេសទាំងពីរ នៅជិតខាងរបងជាមួយគ្នា និងក្នុងតំបន់អាស៊ានដូចគ្នា ដូច្នេះពលរដ្ឋទាំងពីរ គួរតែរស់នៅដោយមានរបងសន្តិភាពជាមួយគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ