ក្នុងរយៈពេល៧ខែ រដ្ឋាភិបាលរកឃើញជនអន្តោប្រវេសន៍ខុសច្បាប់វៀតណាម១៥០០នាក់
អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ បានបើកយុទ្ធនាការជាបន្តបន្ទាប់ស្វែងរកចាប់ខ្លួនជនអន្តោប្រវេសន៍ខុសច្បាប់នៅកម្ពុជា។ ក្នុងរយៈពេល៧ខែដើមឆ្នាំ២០១៥ ជនអន្តោប្រវេសន៍ខុសច្បាប់មានប្រមាណជាង១៥០០នាក់ ដែលសុទ្ធតែជាជនជាតិវៀតណាម។
ចុះផ្សាយនៅថ្ងៃ៖
ស្តាប់ - ០២:០៣
ក្នុងរយៈពេល៧ខែដើមឆ្នាំ២០១៥ ជនអន្តោប្រវេសន៍វៀតណាមចំនួន១៥០០នាក់ ត្រូវបានរកឃើញកំពុងរស់នៅដោយខុសច្បាប់ក្នុងប្រទេសកម្ពុជា។ នេះគឺជាការបញ្ជាក់ឱ្យដឹងពីលោក អ៊ុក ហៃសីឡា។ ប្រធាននាយកដ្ឋានអន្តោប្រវេសន៍នៃក្រសួងមហាផ្ទៃ បានអះអាងថា ជនអន្តោប្រវេសន៍ទាំងនេះ គឺបានមករស់នៅដោយខុសច្បាប់នៅតាមអាជីវកម្មនានាក្នុងប្រទេសកម្ពុជា។
លោក អ៊ុក ហៃសីឡា បានបញ្ជាក់ថា ក្រសួងមហាផ្ទៃនឹងចាត់វិធានការផ្លូវច្បាប់ទៅលើក្រុមអាជីវកម្មណាដែលនៅបន្តជួល ឬប្រើប្រាស់ជនអន្តោប្រវេសន៍ខុសច្បាប់។ វិធានការទាំងនោះគឺនឹងអាចប្តឹងទៅកាន់តុលាការតែម្តងប្រសិន ម្ចាស់អាជីវកម្មទាំងនោះមិនរៀងចាលនោះទេ។ យ៉ាងណាក៏ដោយ លោកប្រធាននាយកដ្ឋានបានលើកឡើងថា ក្នុងពេលអនុវត្តបច្ចុប្បន្ននេះ គឺស្ថិតក្នុងដំណាក់កាលអនុគ្រោះនៅឡើយ។
សូមកត់សំគាល់ថា ក្នុងរយៈពេលពីរថ្ងៃពីថ្ងៃទី២៩ និង ថ្ងៃទី៣០ កក្កដានេះ ជនអន្តោប្រវេសន៍វៀតណាមចំនួន៦៤នាក់ត្រូវឃាត់ខ្លួន នៅក្នុងបេសកម្មចុះត្រួតពិនិត្យក្នុងការដ្ឋានសំណង់បូរីអង្គរភ្នំពេញ និងនៅក្នុងសង្កាត់ស្រះចក រាជធានីភ្នំពេញ។ អគ្គនាយករងអន្តោប្រវេសន៍នៃក្រសួងមហាផ្ទៃ បានឱ្យដឹងថា អាជ្ញាធរបានប្រតបត្តិការស្វែងរកជនអន្តោប្រវេសន៍ខុសច្បាប់នៅទូទាំងប្រទេស។
សូមបញ្ជាក់ថា វិធានការស្វែងរកជនអន្តោប្រវេសន៍ខុសច្បាប់នៅក្នុងសង្គមកម្ពុជានេះ គឺបានធ្វើឡើងនៅក្នុងអាណត្តិទី៥នេះ បន្ទាប់ពីបញ្ហាអន្តោប្រវេសន៍ជនជាតិវៀតណាម គឺជាប្រធានក្តៅក្នុងសង្គមនយោបាយកម្ពុជា។ ហើយបញ្ហាជនអន្តោប្រវេសន៍ខុសច្បាប់នេះដែរ បានធ្វើឱ្យគណបក្សកាន់អំណាចបានអន់ប្រជាប្រិយភាពក្នុងការបោះឆ្នោតផងដែរ។ ក្រសួងមហាផ្ទៃ បានបង្កើតបង្កើតផ្នែកអន្តោប្រវេសន៍ចំនួន៨៩ ចំណុះអធិកាដ្ឋាននគរបាល ស្រុក ខណ្ឌចំនួន ១៩៧នៃស្នងការដ្ឋាននគរបាលរាជធានី-ខេត្ត។
សង្គមស៊ីវិល បានគាំទ្រចំពោះវិធានការផ្លូវច្បាប់របស់អាជ្ញាធរកម្ពុជាក្នុងការបណ្តេញចេញជនបរទេសខុសច្បាប់នៅកម្ពុជា។ ប៉ុន្តែយ៉ាងណាក៏ដោយ សង្គមស៊ីវិលបានអះអាងថារដ្ឋាភិបាលនៃគណបក្សប្រជាជនកម្ពុជាកំពុងស្តាប្រជាប្រិយភាពរប់សខ្លួនទាក់ទងនឹងបញ្ហាជនអន្តោប្រវេសន៍វៀតណាមនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ