អភិបាលខេត្តស្វាយរៀងបញ្ជាក់ថា រកមិនឃើញដីខ្មែរត្រូវបានជួលឲ្យវៀតណាមនៅក្នុងខេត្តនេះទេ
ជាការឆ្លើយតបនឹងការលើកឡើងរបស់ក្រុមតំណាងរាស្រ្តគណបក្សប្រឆាំង ដែលថាការជួលដីឲ្យជនជាតិវៀតណាមនៅក្នុងខេត្តស្វាយរៀងនៅតែបន្តកើតមាននោះ រដ្ឋបាលខេត្តនេះបានបង្កើតគណៈកម្មការមួយជាបន្ទាន់ ដើម្បីចុះទៅត្រួតពិនិត្យនៅសង្កាត់ប្រាសាទ ឃុំចន្ទ្រា ហើយនៅព្រឹកនេះបានចុះកាន់ឃុំទួលស្តីទៀត។ សង្កាត់និងឃុំទាំងបីនេះហើយ ដែលត្រូវបានចោទប្រកាន់ថាមានការបន្តដីជួលឲ្យវៀតណាម។ បើតាមអភិបាលខេត្តស្វាយ រៀង សង្កាត់ប្រាសាទ ឃុំចន្ទ្រា គឺគេរកមិនឃើញទាល់តែសោះពីការជួលដីឲ្យជនជាតិវៀតណាម។
ចុះផ្សាយនៅថ្ងៃ៖
ស្តាប់ - ០២:២៥
លោកម៉ែន វិបុល អភិបាលខេត្តស្វាយរៀង បានគូសបញ្ជាក់ថា នៅក្នុងសង្កាត់ប្រាសាទ ក្រុងបាវិត និងឃុំចន្ទា្រ ស្រុកចន្ទ្រា ខេត្តស្វាយរៀង គឺមិនមានការជួលដីឲ្យជនជាតិវៀតណាមដូចការចោទប្រកាន់របស់ក្រុមតំណាងរាស្រ្តគណបក្សប្រឆាំងនោះឡើយ។ ផ្ទុយមកវិញ គឺមានតែជនជាតិខ្មែររស់នៅតាមព្រំដែនទេ ដែលកំពុងធ្វើស្រែនៅទីនោះ ហើយក្នុងនោះទៀតឃុំចន្ទ្រា គឺមានតែពលរដ្ឋខ្មែរបីគ្រួសារប៉ុណ្ណោះ ដែលកំពុងធ្វើស្រែលើដីរបស់ពួកគេប្រមាណ១០ហិកតា។ ចំណែកដីជាច្រើនហិកតាផ្សេងទៀត មិនមានការជួល ឫក៏ធ្វើស្រែអ្វីទេ ព្រោះសុទ្ធតែមានស្មៅដុះច្រើន។
ការគូសបញ្ជាក់របស់លោកអភិបាលខេត្តស្វាយរៀងនៅពេលនេះ គឺធ្វើឡើងក្រោយពីតំណាងរាស្រ្តគណបក្សសង្រ្គោះជាតិមួយក្រុមកាលពីថ្ងៃទី២៣ សីហា បានសរសេរលិខិតមួយទៅកាន់លោកស ខេង រដ្ឋមន្ត្រីក្រសួងមហាផ្ទៃតាមរយៈប្រធានរដ្ឋសភាដោយស្នើសុំចាត់វិធានការបញ្ឈប់ការជួលដីខ្មែរនៅតាមបណ្តោយព្រំដែនកម្ពុជា-វៀតណាមនៅក្នុងខេត្តស្វាយរៀងឲ្យទៅជនជាតិវៀតណាមធ្វើស្រែ។ នៅក្នុងលិខិតដែលត្រូវបានប្រធានរដ្ឋសភាបញ្ជូនបន្តទៅកាន់លោកស ខេង កាលពីថ្ងៃទី២៥ សីហា បានសរសេរថា សកម្មភាពជួលដីស្រែទៅឲ្យជនជាតិវៀតណាមនៅតាមព្រំដែនកម្ពុជា-វៀតណាម នាខេត្តស្វាយរៀង នៅតែបន្តមានតាមរូបភាពឲ្យជនជាតិខ្មែរធ្វើជាតំណាង ដែលមានអាជ្ញាធរមូលដ្ឋានជួយបិទបាំងផង។ ក្រុមតំណាងរាស្រ្តបានបង្ហាញនៅក្នុងលិខិតនេះថា នៅឃុំទួលស្តី និងឃុំចន្ទ្រា ស្រុកចន្ទ្រា មានការជួលដីឱ្យប្រជាពលរដ្ឋវៀតណាម ធ្វើស្រែចំនួន១៩៦ហិកតា (ឃុំទួលស្តី) និងចំនួន២០០ហិកតា (ឃុំចន្ទ្រា)។ ចំណែកនៅសង្កាត់ប្រាសាទ ក្រុងបាវិតវិញ មានចំនួន៤០ហិកតា។
ចំពោះលោកអភិបាលខេត្តស្វាយរៀង ការលើកឡើងនេះ លោកមិនដឹងថា ក្រុមតំណាងរាស្រ្តគណបក្សប្រឆាំងបានទិន្នន័យទាំងនេះពីណាមកនោះទេ ហើយលោកក៏បានច្រានចោលចំពោះការចោទប្រកាន់ថាអាជ្ញាធរមូលដ្ឋានជួយបិទបាំងនៅក្នុងរឿងទាំងនេះផងដែរ។
គួរជម្រាបថា កាលពីថ្ងៃទី១៦ នៅក្នុងខែនេះ លោកនាយករដ្ឋមន្ត្រីហ៊ុន សែន បានរំលឹកជាថ្មីដល់មន្រ្តីនៅតាមបណ្តាខេត្តជាប់ព្រំដែនប្រទេសវៀតណាម ត្រូវទប់ស្កាត់ និងរារាំងកុំឲ្យមានការជួលដីទៅឲ្យជនជាតិវៀតណាមជាដាច់ខាត។ ហើយកាលពីចុងឆ្នាំ២០១៥ កន្លងទៅ លោកប្រមុខរដ្ឋាភិបាលខ្មែរ ក៏ធ្លាប់បានចេញសារាចរមួយដោយណែនាំឲ្យអភិបាលខេត្តនៅជាប់ព្រំដែនវៀតណាម ថៃ និងឡាវ ឲ្យបញ្ឈប់សកម្មភាពជួលដីទៅឲ្យប្រជាពលរដ្ឋនៃប្រទេសជាប់ព្រំដែនទាំងនេះ។
យ៉ាងណាក៏ដោយ ការជួលដីឲ្យជនជាតិវៀតណាម គឺជាបញ្ហាចោទជាងគេសម្រាប់កម្ពុជា។ ដូច្នេះហើយទើប ក្រុមតំណាងរាស្រ្តគណបក្សសង្រ្គោះជាតិបានស្នើឲ្យលោកស ខេង រដ្ឋមន្ត្រីក្រសួងមហាផ្ទៃចាត់វិធានការបញ្ឈប់ការជួលដីខ្មែរនៅក្នុងខេត្តស្វាយរៀងឲ្យទៅជនជាតិវៀតណាម។ មូលហេតុ គឺដើម្បីការពារបូរណភាពទឹកដីកម្ពុជាកុំឲ្យមានការបាត់បង់ដោយសារតែការជួលដីស្រែទាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ