លោកហ៊ុន សែន ស្នើឲ្យវៀតណាមចែករំលែកបទពិសោធន៍លើការប្រយុទ្ធប្រឆាំងនឹងបដិវត្តន៍ពណ៌
អនុរដ្ឋមន្រ្តីការពារជាតិវៀតណាម លោក ង្វៀន ជីវិញ (Nguyen Chivinh) កំពុងបំពេញទស្សនកិច្ចរយៈពេល៣ថ្ងៃនៅកម្ពុជា ចាប់ពីថ្ងៃទី ២០ ដល់ថ្ងៃទី ២២ ធ្នូ ឆ្នាំ២០១៧នេះ។ នៅព្រឹកមិញនេះ លោកអនុរដ្ឋមន្រ្តីការពារជាតិវៀតណាម បានចូលជួបលោកនាយករដ្ឋមន្រ្តី ហ៊ុន សែន ដោយបានលើកឡើងពីកិច្ចសហប្រតិបត្តិការរវាងប្រទេសទាំងពីរ។ ក្រៅពីនេះ ប្រមុខរដ្ឋាភិបាលកម្ពុជា បានស្នើឲ្យភាគីវៀតណាម និងកម្ពុជា ចែករំលែកគ្នាទៅវិញទៅមក ទាក់ទងនឹងបទពិសោធន៍នៃការប្រយុទ្ធប្រឆាំងនឹងចលនាបដិវត្តន៍ពណ៌។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
សំណើនេះ បានធ្វើឡើងក្នុងពេលដែលប្រមុខរដ្ឋាភិបាលកម្ពុជា លោក ហ៊ុន សែន បានអនុញ្ញាតឲ្យអនុរដ្ឋមន្រ្តីការពារជាតិវៀតណាម លោក ង្វៀន ជីវិញ (Nguyen Chivinh) ចូលជួប ជាផ្លូវការនៅឯវិមានសន្តិភាព កាលពីព្រឹកថ្ងៃទី ២១ ធ្នូនេះ។ នៅក្នុងជំនួបនោះ ប្រមុខរដ្ឋាភិបាលកម្ពុជាលោក ហ៊ុន សែន បានស្នើសុំត្រង់ៗ ឲ្យសមភាគីវៀតណាម និងប្រមុខយោធាកម្ពុជា ចែករំលែកបទពិសោធន៍គ្នាទៅវិញទៅមក ទាក់ទងនឹងការប្រយុទ្ធប្រឆាំងនឹងចលនាបដិវត្តន៍ពណ៌រវាងប្រទេសទាំងពីរ។ ការចែករំលែកបទពិសោធន៍គ្នានេះ គ្រោងនឹងធ្វើ នៅក្នុងកិច្ចពិភាក្សាគ្នាមួយ ដោយមានការចូលរួមពីរដ្ឋមន្រ្តីការពារជាតិកម្ពុជាលោក ទៀ បាញ់ នៅល្ងាចថ្ងៃទី ២១ ធ្នូ។ ក្រៅពីនេះ ភាគីទាំងពីរ ក៏នឹងលើកឡើងផងដែរ ទាក់ទងនឹងការបណ្តុះបណ្តាលធនធានមនុស្ស, កិច្ចសហប្រតិបត្តិការវិស័យយោធា, កិច្ចសហប្រតិបត្តិការល្បាតលើដែនសមុទ្រ, កិច្ចសហប្រតិបត្តិការលើការការពារនៅតាមព្រំដែន, ព្រមទាំងជំរុញនូវកិច្ចសហប្របតិបត្តិការលើវិស័យវប្បធម៌ និងសេដ្ឋកិច្ចរវាងប្រទេសទាំង៤ រួមមាន កម្ពុជា ឡាវ វៀតណាម និងប្រទេសចិន។
គួរជំរាបជូនថា លោកឧត្តមសេនីយ៍ឯកបម្រុង ង្វៀន ជីវិញ (Nguyen Chivinh) អនុរដ្ឋមន្ត្រី ក្រសួងការពារជាតិវៀតណាម បច្ចុប្បន្នមានអាយុ៦០ផ្លាយឆ្នាំ បានដឹកនាំគណៈប្រតិភូយោធាវៀតណាម មកបំពេញទស្សនកិច្ចរយៈពេល៣ថ្ងៃនៅកម្ពុជា ចាប់តាំងពីថ្ងៃទី ២០ ដល់ថ្ងៃទី ២២ ធ្នូ ដោយបានជួបជាមួយមន្រ្តី យោធាជាន់ខ្ពស់កម្ពុជាជាបន្តបន្ទាប់។ តាមរយៈសេចក្តីប្រកាសព័ត៌មានរបស់ក្រសួងការពារជាតិកម្ពុជា ចុះថ្ងៃទី ១៩ ធ្នូ នៅក្នុងដំណើរទស្សនកិច្ចនេះ លោកឧត្តមសេនីយ៍ឯកវៀតណាម បានចូលរួមក្នុងកិច្ចសន្ទនានយោបាយការពារជាតិ ថ្នាក់អនុរដ្ឋមន្រ្តី កម្ពុជា-វៀតណាម លើកទី៣ ដោយមានការចូលរួមពីលោកនាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិកម្ពុជា។ កិច្ចសន្ទនាគ្នានោះ បានធ្វើឡើងក្នុងគោលបំណង ដើម្បីជម្រុញឲ្យមានកិច្ចសហប្រតិបត្តិការល្អលើគ្រប់វិស័យ។
សូមបញ្ជាក់ដែរថា ក្រោយពីកិច្ចពិភាក្សាដែលធ្វើឡើងនៅឯវិមានសន្តិភាពនៅថ្ងៃនេះ ប្រមុខរដ្ឋាភិបាលកម្ពុជា និងសមភាគីវៀតណាម ក៏បានទស្សនារួមគ្នានូវខ្សែភាពយន្តឯកសារមួយ ស្តីអំពី “ការរស់ឡើងវិញនៃកម្ពុជាក្រោយរបបវាលពិឃាត”។ ខ្សែភាពយន្តឯកសារនេះ គ្រោងនឹងត្រូវដាក់បញ្ចាំងនៅតាមស្ថានីយ៍ទូរទស្សន៍និងហ្វេសប៊ុកផ្ទាល់របស់លោកនាយករដ្ឋមន្រ្តី ហ៊ុន សែន នៅមុនថ្ងៃទី ៧ មករា ឆ្នាំ ២០១៨ ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ