Walmart សង្ឃឹមថានឹងមានការបញ្ជាទិញពីកម្ពុជានៅឆ្នាំក្រោយដោយភ្ជាប់លក្ខខណ្ឌការងារ
ក្រុមហ៊ុនបញ្ជាទិញដ៏ធំមួយរបស់សហរដ្ឋអាមេរិកឈ្មោះ Walmart បានផ្ញើលិខិតមួយមកកាន់រដ្ឋាភិបាលកម្ពុជាកាលពីថ្ងៃទី៧ខែធ្នូនេះ ប៉ុន្តែទើបតែត្រូវបានគេបញ្ចេញនៅពេលថ្មីៗនេះ។ រដ្ឋាភិបាលកម្ពុជា ចាត់ទុកលិខិតរបស់ក្រុមហ៊ុនបញ្ជាទិញមួយនេះថាការបរាជ័យរបស់ក្រុមអតីតបក្សប្រឆាំងចំពោះការជំរុញឲ្យផ្អាកការបញ្ជាទិញ។ ប៉ុន្តែមន្រ្តីអតីតបក្សសង្រ្គោះជាតិ អះអាងថា លិខិត របស់ក្រុមហ៊ុន Walmartគឺជាការព្រមានរដ្ឋាភិបាលកម្ពុជាច្រើនជាងការសរសើរ។
ចុះផ្សាយនៅថ្ងៃ៖
ស្តាប់ - ០១:៥៧
អត្ថបទដោយ៖ អ៊ឹង ប៊ុនថន
នៅក្នុងលិខិតរបស់ក្រុមហ៊ុនWalmart ជាក្រុមហ៊ុនយក្សលំដាប់ទី២ក្នុងការបញ្ជាទិញទំនិញពីកម្ពុជានេះ បានគូសបញ្ជាក់ទាំងបញ្ហាវិជ្ជមានរបស់រដ្ឋាភិបាលកម្ពុជា លាយឡំនឹងការជំរុញឲ្យគោរពនូវលក្ខខណ្ឌការងារដល់កម្មករ។
ដោយសង្ឃឹមថា ក្រុមហ៊ុននេះនឹងធ្វើការបញ្ជាទិញទំនិញកាត់ដេរពីកម្ពុជានៅឆ្នាំ២០១៨ ខាងមុខទៀតនោះ Walmart ក៏បានស្នើឲ្យរដ្ឋាភិបាលកម្ពុជាគោរពសិទ្ធិការងាររបស់កម្មករ ការប្រព្រឹត្តិដោយយុត្តិធម៌ជាមួយរដ្ឋាភិបាលអាមេរិកនិងសង្គមស៊ីវិលអាមេរិក ដោយស្របតាមស្តង់ដានិងនិយាមអន្តរជាតិ ដើម្បីការវិនិយោគយូរអង្វែងជាមួយទីផ្សារមួយនេះ។
ផ្អែកលើចំណុចនេះ កញ្ញា កឹម មនោវិទ្យា កូនស្រី លោក កឹម សុខា បានប្រាប់វិទ្យុបារាំងRFIថា លិខិតរបស់ Walmart គឺមានខ្លឹមសារព្រមានរដ្ឋាភិបាលកម្ពុជា ឲ្យគោរពតាមអ្វីដែលបានលើកឡើងនោះ។ហើយថាបើសិនជារដ្ឋាភិបាលកម្ពុជាមិនធ្វើតាមទេគេនឹងបញ្ឈប់ការបញ្ជាទិញ។
បើតាមអគ្គនាយិការរងអតីតគណបក្សសង្រ្គោះជាតិរូបនេះ គឺអាចមានក្រុមហ៊ុនបញ្ជាទិញ H&M របស់ប្រទេសស៊ុយអែត និងក្រុមធំៗមួយចំនួនទៀតក៏នឹងមានចំណាត់ការដូចគ្នានេះដែរ ។
ប៉ុន្តែលោក ហេង សួរ អ្នកនាំពាក្យក្រសួងការងារ បានបកស្រាយថា អ្វីដែលបានលើកឡើងក្នុងលិខិតនោះ គ្រាន់តែជាផ្នែកមួយក្នុងជំនួបជាងមួយម៉ោងរវាងតំណាងក្រុមហ៊ុន Walmartជាមួយរដ្ឋមន្រ្តីក្រសួងការងារតាំងពីថ្ងៃទី៧ខែវិច្ឆិកា។លោកថា Walmart បានសំដែងគំនិតសុទិដ្ឋិនិយម និងការបញ្ជាទិញពីកម្ពុជានៅឆ្នាំ២០១៨ តាមរយៈការគោរពលក្ខខណ្ឌការងារ។
សម្រាប់ លោក អាត់ ធន់ ប្រធានសហភាពការងារកម្ពុជា ក្រុមហ៊ុន Walmart នេះមិនសូវជាខ្វល់នឹងការគោរពសិទ្ធិមនុស្ស និងលក្ខខណ្ឌការងារប៉ុន្មានទេ។ ប៉ុន្តែលោកយល់ថា នៅពេលដែល Walmart ដាក់លិខិតមកក្រសួងការងារហើយសន្យាបញ្ជាទិញ ដោយភ្ជាប់នឹងលក្ខខណ្ឌការងារផងនោះ គឺជារឿងមួយដែលគួរមានការចាប់អារម្មណ៍ ពិសេសត្រង់ចំណុចមួយដែលស្នើឲ្យការគោរពគោលការណ៍អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ