ការចោលសំរាមក្រៅធុងនៅតែកើតមានឡើងពេលបុណ្យអុំទូក
ការចោលសំរាមពាសវាលពាសកាលនៅក្រៅធុងសំរាមនៅតែជាទម្លាប់មិនល្អរបស់ពលរដ្ឋមួយចំនួនដែលមកលេងបុណ្យអុំទូកនៅឆ្នាំនេះ បើទោះជាបីអាជ្ញាធរបានអះអាងថា បានដាក់ធុងសំរាមរហូតដល់២ពាន់ធុង និងមានពង្រាយបុគ្គលិកសំអាតទីក្រុងរាប់រយនាក់ក៏ដោយ។ បញ្ហានេះត្រូវបានគេបន្ទោសទៅលើទម្លាប់មិនល្អរបស់ប្រជាជនមួយចំនួន និងការអនុវត្តច្បាប់នៅមានកម្រិត។
ចុះផ្សាយនៅថ្ងៃ៖
ស្តាប់ - ០១:៤២
អត្ថបទដោយ៖ អ៊ឹង ប៊ុនថន
ការចោលសំរាមគ្មានសណ្តាប់ធ្នាប់ភាគច្រើនគឺនៅតាមច្រាំងទន្លេ និងនៅលើសួនច្បារដែលសំបូរទៅដោយកញ្ចប់ចំណីអាហារ និងខិតប័ណ្ណផ្សព្វផ្សាយពាណិជ្ជកម្មនានា។ នេះជាការកត់សំគាល់របស់តំណាងក្រុមហ៊ុនប្រមូលសំរាម សិនទ្រី។
លោក ងួន ស៊ីផេង ប្រធានការិយាល័យបោសសំអាតនៃក្រុមហ៊ុន សិនទ្រី ប្រាប់វិទ្យុបារាំងRFIថាការចោលសំរាមក្រៅធុងភាគច្រើនគឺជាខិតប័ណ្ណដែលក្រុមហ៊ុនអាជីវកម្មនានាចែកឲ្យពលរដ្ឋ ហើយពួកគេបោះចោលនៅតាមដងផ្លូវ។ មួយវិញទៀត ការដែលអាជ្ញាធរអនុញ្ញាតឲ្យមានការលក់ដូរចំណីអាហារនៅលើសួនច្បារលោកថាជាការលំបាកខ្លាំងក្នុងការបោសសំអាតសំរាម។
យ៉ាងណាក៏ដោយ បើនិយាយជារួម លោក ងួន ស៊ីផែង ថាការចោលសំរាម ថ្វីត្បិតនៅកើតមានពាសវាលពាសកាលមែនប៉ុន្តែលោកថាមានភាពប្រសើរជាងឆ្នាំមុនបន្តិច។
សាលារាជធានីភ្នំពេញ បានឲ្យដឹងថា ខ្លួនបានរៀបចំកញ្ឆេចំនួន១ពាន់ និងធុងសំរាមចំនួន១ពាន់ ព្រមទាំងដាក់ពង្រាយអ្នកបោសសំអាតចំនួន៦៧០នាក់ និងបង្គន់អនាម័យ២៧កន្លែង សរុបមាន៤៧៤បន្ទប់ ដើម្បីធ្វើយ៉ាងណាថែរក្សាអនាម័យ និងការពារបរិស្ថានស្អាតល្អ នៅក្នុងឱកាសបុណ្យអុំទូកនេះ។
លោក យឿង សុធារ៉ា មន្រ្តីសង្គមស៊ីវិលម្នាក់ ដែលបានចាប់អារម្មណ៍ពីបញ្ហាសំរាមនៅពេលបុណ្យអុំទូកនេះ បញ្ចេញយោបល់ថា ការយល់ដឹងរបស់ប្រជាពលរដ្ឋនៅមានកម្រិតទាបជាបញ្ហាចម្បងដែលនាំឲ្យមានការចោលសំរាមពាសវាលពាសកាលនៅពេលមានបុណ្យទានធំៗ។ លោកបន្ថែមថាការអនុវត្តច្បាប់នៅធូរលុងក៏ជាផ្នែកមួយពលរដ្ឋមិនខ្លាចនឹងការចោលសំរាមក្រៅធុង។
សម្រាប់ លោក សន ជ័យ ជាអ្នកឃ្លាំមើលសង្គមមួយរូបទៀត ក៏យល់ឃើញប្រហាក់ប្រហែលគ្នានេះដែរ។
បើតាមលោក សន ជ័យ អ្នកដែលចោលសំរាមក្រៅធុងនោះ មិនមែនតែពលរដ្ឋមកពីតាមខេត្តបណ្តាលចូលមកលេងទីក្រុងនោះទេ សូម្បីតែអ្នករស់នៅភ្នំពេញខ្លះក៏មានទំលាប់មិនល្អបែបនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ