ពលរដ្ឋប៊ូឌីញ«ស» ផ្តើមរើចេញពីលំនៅដ្ឋានជាបណ្តើរៗ
ពលរដ្ឋអគារប៊ូឌីញ«ស» នៅថ្ងៃនេះ បានផ្តើមរើចេញពីលំនៅដ្ឋានរបស់ខ្លួនជាបណ្តើរៗហើយ ទៅរស់នៅលំនៅដ្ឋានថ្មីៗរៀងខ្លួន ក្រោយយល់ព្រមទទួលសំណងទឹកប្រាក់តម្លៃ ១៤០០ ដុល្លារ ក្នុងមួយម៉ែត្រការ៉េ ពីក្រុមហ៊ុនអភិវឌ្ឍន៍ជប៉ុនអារ៉ាខាវ៉ា។ គិតត្រឹមម៉ោង ១១ព្រឹក នេះ ប្រជាពលរដ្ឋអគារប៊ូឌីញ ស ចំនួន ១០បន្ទប់ហើយ ដែលបានមកទទួលប្រាក់ទូទាត់រួចរាល់ពីក្រុមហ៊ុន ។
ចុះផ្សាយនៅថ្ងៃ៖
ស្តាប់ - ០១:២៣
តាមគម្រោងដំបូង ក្រុមហ៊ុនជប៉ុន តម្រូវឲ្យប្រជាពលរដ្ឋ រើចេញពីអគារប៊ូឌីញស ក្នុងថ្ងៃតែមួយដោយចាប់ផ្ដើមពីថ្ងៃទី៦ ខែមិថុនា រហូតដល់ថ្ងៃទី៦ ខែកក្កដា ។ ក៏ប៉ុន្តែអ្នកស្រី ឌី សុផាណា ម៉ារីណា ពលរដ្ឋអគារប៊ូឌីញ ស បានបញ្ជាក់ប្រាប់វិទ្យុបារាំងថា ក្រុមហ៊ុនជប៉ុនបានពន្យាពេលឲ្យពលរដ្ឋ ដើម្បីរើចេញរហូតដល់ថ្ងៃទី ១៥ ខែកក្កដា ឯណោះ។
បន្ថែមលើសំណងដែលប្រជាពលរដ្ឋនឹងត្រូវទទួលបានទៅតាមទំហំបន្ទប់របស់ខ្លួន ក្រុមហ៊ុនជប៉ុនអារ៉ាកាវ៉ា ក៏នឹងឧបត្ថម្ភទឹកប្រាក់ ១០០ ដុល្លារបន្ថែមសម្រាប់ការដឹកជញ្ជូន។
លោក សៀ ភារម្យ នាយកលេខាធិការដ្ឋានក្រុមការងារពិសេសសិទ្ធិលំនៅដ្ឋាន បានបញ្ជាក់ថា ជុំវិញនីតិវិធីនៃការប្រគល់លុយទៅឲ្យប្រជាពលរដ្ឋ គឺលុះត្រាតែប្រជាពលរដ្ឋរើសម្ភារៈចេញពីលំនៅដ្ឋានរួចរាល់ បន្ទាប់មកផ្តល់ដំណឹងមកក្រសួងរៀបចំដែនដី និងតំណាងក្រុមហ៊ុនជប៉ុន។
គិតត្រឹមថ្ងៃទី៣០ ឧសភា ពលរដ្ឋរស់នៅអគារប៊ូឌីញស សរុប ៤៦៤បន្ទប់ ស្មើនឹង ៩៤% នៃ ចំនួនសរុប ៤៩២បន្ទប់ បានចុះកិច្ចសន្យាលក់ ទិញ បន្ទប់របស់ខ្លួន ហើយពលរដ្ឋដែលចាកចេញ បានព្រមលក់បន្ទប់របស់ខ្លួន ក្នុងតម្លៃ ១៤០០ដុល្លារក្នុងមួយម៉ែត្រការ៉េ ទៅឲ្យក្រុមហ៊ុនជប៉ុន Arakawa ធ្វើការអភិវឌ្ឍន៍ ។
សូមបញ្ជាក់ឡើងវិញថា អគារប៊ូឌីញ ត្រូវបានកសាងឡើងនៅឆ្នាំ១៩៦៣។ ជាមួយនឹងអាយុកាលច្រើនបែបនេះក្រសួងដែនដីគ្រោងនឹងធ្វើការអភិវឌ្ឍឡើងវិញជាមួយនឹងក្រុមហ៊ុនជប៉ុន Arakawa ក្នុងតម្លៃ៨០លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ