គ្រោះថ្នាក់ចរាចរណ៍លើកម្មករឆ្នាំ២០១៧មានការថយចុះ តែនៅតែប្រឈមសម្រាប់ឆ្នាំថ្មី

កម្មករកាត់ដេរប្រមាណជាង១០នាក់ បានរងរបួសធ្ងន់ស្រាល បន្ទាប់ពីរថយន្តដែលពួកគេជិះទៅមកដើម្បីបំរើការងារនៅរោងចក្របានក្រឡាប់កាលពីថ្ងៃអង្គារមិ្សលមិញ នៅស្រុកឧត្តុង្គខេត្តកំពង់ស្ពឺ។ គ្រោះថ្នាក់ចរាចរណ៍ ដែលបណ្តាលមកពីការវ៉ាជែងហើយជះមនុស្សទៅលើផ្លូវថ្នល់នោះ គឺជាករណីដំបូងហើយនៅឆ្នាំ២០១៨នេះ ខណៈដែលហេតុការណ៍ដូចគ្នានេះ បានកើតឡើងជាង១០ករណីកាលពីឆ្នាំចាស់។

ចុះផ្សាយនៅថ្ងៃ៖ 10/01/2018 - 08:04

រូបភាពតំណាង៖ កម្មករកម្មការិនីកម្ពុជា ញឹម សុផល

ដោយ៖ ញឹម សុផល

ផ្សាយពាណិជ្ជកម្ម

បើទោះជាពុំមានកម្មករណាម្នាក់បាត់បង់ជីវិតក្នុងចំណោមកម្មករប្រមាណ៥០នាក់ ដែលបានជួបគ្រោះថ្នាក់ចរាចរណ៍កាលពីម្សិលមិញ ដោយសារតែរថយន្តដឹកកម្មករដែលមានសភាពចាស់ទ្រុឌទ្រោមបានក្រឡាប់ធ្វើឲ្យរងរបួសក៏ដោយ ក៏ប៉ុន្តែករណីរថយន្តដឹកកម្មករនេះ ត្រូវគេមើលឃើញថានៅតែជាបញ្ហាប្រឈមសម្រាប់ការធ្វើដំណើររបស់កម្មករនៅឆ្នាំថ្មីនេះដដែល។

កាលពីឆ្នាំចាស់២០១៧ គ្រោះថ្នាក់ចរាចណ៍ដែលបានកើតឡើងចំពោះកម្មករ នៃវិស័យកាត់ដេរ តាមរយៈរថយន្តដឹកជញ្ជូនកម្មករ បុក ប៉ះពារ និងក្រឡាប់ មានចំនួន១១ករណី ដែលបានកើតមានពេញមួយឆ្នាំចាប់ពីខែមករា រហូតដល់ខែធ្នូ។ នេះបើតាមសេចក្តីប្រកាសព័ត៌មាន ដែលបានចុះផ្សាយដោយក្រសួងការងារ។ តាមតួលេខមិនទាន់ផ្លូវការ យ៉ាងហោចមានកម្មកររប្រមាណជា៣០០នាក់ បានរងរបួសធ្ងន់ ស្រាល និងស្លាប់២នាក់។ ចំនួនគ្រោះថ្នាក់ចរាចរណ៍ ចំនួនកម្មករស្លាប់និងរបួស មានការថយចុះជាងឆ្នាំ២០១៦ ដែលមានគ្រោះថ្នាក់ជិត២០លើក កម្មករស្លាប់ជាង១០នាក់ និងរបួសជាច្រើនរយនាក់។

កាលពីឆ្នាំកន្លងទៅ បញ្ហាគ្រោះថ្នាក់ចរាចរណ៍ចំពោះកម្មករនេះ ត្រូវបានក្រសួងការងារ រួមនឹងអ្នកពាក់ព័ន្ធដទៃទៀត ដូចជាក្រសួងមហាផ្ទៃ ភាគីនិយោជកនិងសហជីពនិយោជិក ក៏បានជជែកគ្នាស្វែងរកយន្តការសមស្របណាមួយដែលអាចបញ្ចៀសកម្មករពីគ្រោះថ្នាក់នៅពេលដែលពួកគេធ្វើដំណើរទៅធ្វើការនិងត្រលប់ទៅផ្ទះវិញផងដែរ។ ក៏ប៉ុន្តែផែនការនានានៅមិនទាន់អនុវត្តបាននៅឡើយ។

អ្វីដែលជាដំណោះស្រាយទាំងនោះរួមមាន ការកាត់បន្ថយការផ្ទុកកម្មករលើសចំណុះ ជាមួយនឹងរថយន្តកែច្នៃ។ ការផ្លាស់ប្តូរពីរថយន្តដឹកទំនិញកូរ៉េ ទៅជារថយន្តក្រុង ឬរថយន្តដែលមានឃ្លុប។ ការឧបត្ថម្ភធន់ដល់អ្នកប្រកបរបរដឹកជញ្ជូនកម្មករ នៅពេលដែលមានការកែសម្រួលឲ្យមានការដឹកជញ្ជូនតាមលក្ខណៈបច្ចេកទេសនិងការបង្កើនសមត្ថភាពដល់អ្នកបើកបរជាដើម។

សូមបញ្ជាក់ថា កម្មករប្រមាណ៧០ម៉ឺននាក់ នៅក្នុងវិស័យកាត់ដេរ មួយផ្នែកបានស្នាក់នៅផ្ទះជួលក្បែររោងចក្ររបស់ពួកគេធ្វើការនិងមួយចំនួនទៀតត្រូវធ្វើដំណើរតាមរថយន្តឈ្នួលប្រមាណជាជាង៥ពាន់គ្រឿង ដែលជារថយន្តដឹកទំនិញ មិនត្រឹមត្រូវតាមស្តង់ដាដឹកមនុស្ស៕