ធនាគារពិភពលោក៖ កំណើនសេដ្ឋកិច្ចកម្ពុជាឆ្នាំ២០១៩ ស្ថិតនៅក្នុងរង្វង់៧%
ដូចការព្យាករណ៍! ធនាគារពិភពលោក (World Bank) នៅថ្ងៃទី ២៧ វិច្ឆិកា នេះ បានចេញផ្សាយរបាយការណ៍ «បច្ចុប្បន្នភាពសេដ្ឋកិច្ចកម្ពុជា» សម្រាប់ខែតុលា ឆ្នាំ២០១៩ថា កំណើនសេដ្ឋកិច្ចកម្ពុជាក្នុងឆ្នាំ២០១៩ គឺស្ថិតនៅក្នុងខ្ទង់៧%។ អត្រាកំណើន៧% គឺបានធ្លាក់ចុះ០.៥% បើធៀបនឹងឆ្នាំ២០១៨។ យ៉ាងណាក្តី របាយការណ៍របស់ធនាគារពិភពលោកបានអះអាងថា សេដ្ឋកិច្ចកម្ពុជានៅឆ្នាំ២០១៩នេះ នៅតែស្ថិតនៅក្នុងភាពស្វាហាប់ ប៉ុន្តែនឹងធ្លាក់ចុះនៅពីរឆ្នាំបន្តបន្ទាប់ទៀត នោះប្រសិនបើសហភាពអឺរ៉ុបដកប្រព័ន្ធអនុគ្រោះពន្ធ EBA និងការធ្លាក់ចុះយ៉ាងគំហុកណាមួយនៃសេដ្ឋកិច្ចរបស់ចិន។
ចុះផ្សាយនៅថ្ងៃ៖
ស្តាប់ - ០៣:២២
ការវាយតម្លៃនេះ គឺមិនខុសពីការព្យាករណ៍ទុកជាមុនរបស់ធនាគារពិភពលោកនិងស្ថាប័នអ្នកវាយតម្លៃសេដ្ឋកិច្ចធំៗជាច្រើនទៀតនោះទេ។ កាលពីខែតុលា ធនាគារពិភពលោកបានព្យាករណ៍ថា បន្ទាប់ពីទទួលបានកំណើនខ្ពស់ជាងការរំពឹងទុកកាលពីឆ្នាំ២០១៨ក្នុងអត្រា៧.៥% កំណើនសេដ្ឋកិច្ចកម្ពុជានៅឆ្នាំ២០១៩ នឹងថមថយមកនៅត្រឹម៧%។ ប៉ុន្តែវានឹងបន្តថយចុះបន្ថែមទៀតនៅត្រឹម ៦.៨% នៅឆ្នាំ២០២០និងឆ្នាំ២០២១ខាងមុខ។ ចំណែកមូលនិធិរូបិយវត្ថុអន្ដរជាតិ IMF ធនាគារអភិវឌ្ឍន៍អាស៊ី (ADB) សុទ្ធតែបានព្យាករណ៍ដែរថា កំណើនសេដ្ឋកិច្ចកម្ពុជាដែលមានអត្រា៧%ក្នុងឆ្នាំ២០១៩នេះ នឹងធ្លាក់មកនៅត្រឹម ៦.៨% នៅឆ្នាំ២០២០ ស្របពេលដែលរដ្ឋាភិបាលកម្ពុជាខ្លួនឯងបានព្យាករណ៍ថា កំណើនសេដ្ឋកិច្ចកម្ពុជានៅឆ្នាំក្រោយនឹងមានត្រឹមតែ ៦.៥% ប៉ុណ្ណោះ។ នោះប្រសិនបើ សហភាពអឺរ៉ុប ដកប្រព័ន្ធអនុគ្រោះពន្ធ EBA ពីកម្ពុជា។
របាយការណ៍ដែលបានចេញផ្សាយដោយធនាគារពិភពលោកនៅថ្ងៃនេះបានឲ្យដឹងថា ការនាំចេញផលិតផលសម្លៀកបំពាក់ និងស្បែកជើង ដែលមានទំហំប្រហែល៧០%នៃទំនិញនាំចេញគ្រប់មុខ បានកើនចំនួន ១៧.៧% ក្នុងឆ្នាំ២០១៨ ប៉ុន្តែស្រុតចុះបន្តិចវិញមកនៅត្រឹម ១៥.៣% នៅត្រឹមខែមិថុនា ឆ្នាំ ២០១៩។ វិស័យសំណង់ដែលជាសរសរស្តម្ភស្នូលនៃការជំរុញកំណើនសេដ្ឋកិច្ចកម្ពុជា នៅតែបន្តសកម្មភាពគគ្រឹកគគ្រែង ដែលឆ្លុះបញ្ចាំងឲ្យឃើញថា មិនទាន់មានភាពនឿយណាយនៃការវិនិយោគលើវិស័យនេះនៅឡើយទេ។ ហើយជាលទ្ធផល ការនាំចូលដែកសំណង់បានស្ទុះឡើងយ៉ាងគំហុក ពី២៧.៧% នៅឆ្នាំ ២០១៨ ដល់ទៅ ៦៣.៥% នៅត្រឹមខែមិថុនា ឆ្នាំ២០១៩។ ប៉ុន្តែរបាយការណ៍បានលើកឡើងពីហានិភ័យដែលបន្តកើនឡើងសម្រាប់វិស័យហិរញ្ញវត្ថុ ដោយសារតែមានការពាក់ព័ន្ធច្រើនជាមួយវិស័យសំណង់ និងអចលនទ្រព្យ អមដោយការពូនគររបស់បំណុលផងដែរ។ បន្ថែមលើនេះ លទ្ធភាពនៃការដកចេញនូវប្រព័ន្ធអនុគ្រោះពន្ធ EBA ពីសហភាពអឺរ៉ុប និងការធ្លាក់ចុះយ៉ាងគំហុកណាមួយនៃសេដ្ឋកិច្ចរបស់ប្រទេសចិន អាចបង្កផលប៉ះពាល់យ៉ាងខ្លាំងទៅលើទស្សនវិស័យកំណើនសេដ្ឋកិច្ចរបស់កម្ពុជា។
ទោះជាយ៉ាងនេះក្តី របាយការណ៍របស់ធនាគារពិភពលោក បានកត់សំគាល់ថា ដើម្បីពង្រឹងសមត្ថភាពប្រកួតប្រជែងក្រៅប្រទេស ថ្មីៗនេះ រដ្ឋាភិបាលកម្ពុជាបានដាក់ចេញនូវវិធានការមួយចំនួន សំដៅជួយសម្រួលដល់ការធ្វើពាណិជ្ជកម្ម តួយ៉ាងការបន្ទាបថ្លៃចំណាយលើការដឹកជញ្ជូន ការកាត់បន្ថយការិយាធិបតេយ្យ និងការជួយដល់ធុរកិច្ចដោយកាត់បន្ថយថ្ងៃឈប់សម្រាកផ្លូវការចំនួន៦ថ្ងៃនៅក្នុងឆ្នាំ ២០២០ជាដើម។ បន្ថែមលើនេះ ការចូលរួមរបស់កម្ពុជានៅក្នុងសេដ្ឋកិច្ចសាកលតាមរយៈខ្សែចង្វាក់តម្លៃសាកល (GVCs) ការហូរចូលនៃការវិនិយោគផ្ទាល់ពីបរទេស (FDI) ភាពសម្បូរនៃពលកម្មមានជំនាញទាប និងពលកម្មមានប្រាក់ឈ្នួលទាប និងលទ្ធភាពទទួលបានភាពអនុគ្រោះនាំទំនិញចេញទៅកាន់ទីផ្សារធំៗ សុទ្ធតែជាកត្តានៅពីក្រោយនៃការជំរុញសមាហរណកម្មយ៉ាងលឿនរបស់កម្ពុជា ចូលទៅក្នុងខ្សែចង្វាក់តម្លៃសាកល នៅតាមផ្នែកផលិតកម្មមួយចំនួន។
សូមបញ្ជាក់ថា របាយការណ៍ «បច្ចុប្បន្នភាពសេដ្ឋកិច្ចកម្ពុជា» ចេញផ្សាយដោយធនាគារពិភពលោក នៅថ្ងៃទី ២៧ វិច្ឆិកានេះ គឺជារបាយការណ៍ចុងក្រោយ ចេញផ្សាយពីរដងក្នុងមួយឆ្នាំ ដើម្បីផ្តល់ព័ត៌មានថ្មីៗបំផុត ស្តីពីការវិវត្តរបស់ស្ថានភាពម៉ាក្រូសេដ្ឋកិច្ចរបស់កម្ពុជា ក្នុងរយៈពេលខ្លីនិងមធ្យម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ