ធនាគារពិភពលោក ៖ ការបោះឆ្នោតខាងមុខ អាចនាំហានិភ័យដល់សេដ្ឋកិច្ចកម្ពុជា
ធនាគារពិភពលោក នៅថ្ងៃពុធនេះ បានប៉ាន់ស្មានថា នៅពីរឆ្នាំខាងមុខ សេដ្ឋកិច្ចកម្ពុជា នឹងមានកំណើនត្រឹម ៦.៩% ដែលជម្រុញដោយសារការនាំចេញ សំណង់ និងការចំណាយរបស់រដ្ឋាភិបាល។ តួលេខនេះ ថយចុះបន្តិចពីឆ្នាំ២០១៦ ដែលមានកំណើន ៧.០%។ ថយចុះ ០.១% ដោយសារ ការបោះឆ្នោតក្នុងឆ្នាំ២០១៧ និង២០១៨ ឥទ្ធិពលអវិជ្ជមានពីកំណើនអត្រាការប្រាក់សហរដ្ឋអាមេរិក និងការថយចុះនៃកំណើនរបស់សេដ្ឋកិច្ចពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
នៅថ្ងៃទី០៥ ខែតុលា នេះ ធនាគារពិភពលោក បានប៉ានស្មានថា សេដ្ឋកិច្ចកម្ពុជា នៅឆ្នាំ២០១៦នេះ កើនដល់ ៧% ដោយសារការនាំចេញសម្លៀកបំពាក់ខ្លាំងក្លា និងសកម្មភាពសាងសង់នៅតែមាន។ បើតាមរបាយការណ៍ របស់ ធនាគារពិភពលោក ការនាំចេញសម្លៀកបំពាក់កម្ពុជា កើនឡើង ១០.៥% បើគិតជាទឹកប្រាក់ ធៀបនឹងឆ្នាំមុន រយះពេលដូចគ្នា មានត្រឹម ៧.៨%។ បន្ថែមពីនេះទៀត ចំណូលចិត្តវិនិយោគិន ក្នុងវិស័យសំណង់ មានទឹកប្រាក់កើនឡើង ដល់ ៦.៨ពាន់លានដុល្លារអាមេរិក ធៀបនឹងឆ្នាំមុន។ ជាមួយគ្នានេះដែរ ការប្រមូលចំណូលរបស់រដ្ឋាភិបាលកម្ពុជា បានកើនដល់ ១៨.៥% នៃ ផលិតផលក្នុងស្រុកសរុប ឆ្នាំ២០១៥ ធៀបនឹង ១៨.១% នៅឆ្នាំ២០១៤។
ធនាគារពិភពលោក ក៏បានបន្តព្យាករណ៍ទុកថា កំណើនសេដ្ឋកិច្ចកម្ពុជា ក្នុងពីរឆ្នាំខាងមុខនឹងមានកំណើនត្រឹម ៦.៩% ដែលជម្រុញដោយសារការនាំចេញ សំណង់ និងការចំណាយរបស់រដ្ឋាភិបាល។ ទោះបីជាយ៉ាងនេះក្តី ភាពមិនប្រាកដប្រជាទាក់ទងនឹងការបោះឆ្នោតឆ្នាំ២០១៧ និង២០១៨ ការថយចុះនៃកំណើនអត្រាការប្រាក់សហរដ្ឋអាមេរិក សម្ពាធនានាក្នុងតំបន់ និងកំណើនទាបនៅលើពិភពលោក អាចជាហានិភ័យ ដល់សេដ្ឋកិច្ចកម្ពុជា។
សេដ្ឋវិទូ ជាន់ខ្ពស់ នៃ ធនាគារពិភពលោក លោក លី សូដេត បានបញ្ជាក់ថា ទោះបីជា ការបោះឆ្នោតមិនអាចទាយទុកជាមុន តែកាលពីឆ្នាំ២០០៨ អ្នកវិនិយោគ មានអារម្មណ៍ មិនច្បាស់លាស់ ស្ទាក់ស្ទើរ ក្នុងការវិនិយោគ ទើបលំហូរវិនិយោទុននៅកម្ពុជា មានការអាក់ខាន ឬនៅទ្រឹងបន្តិច ដោយសារវិនិយោគិន រងចាំមើលស្ថានភាពក្រោយការបោះឆ្នោត។
គួរជម្រាបថា ធនាគារអភិវឌ្ឍន៍អាស៊ី (ADB) កាលពីថ្ងៃទី ២៧ ខែកញ្ញា បានចេញផ្សាយរបាយការណ៍មួយ បង្ហាញថា កំណើនសេដ្ឋកិច្ចកម្ពុជា មាន អាត្រា ៧ % នៅឆ្នាំ ២០១៦ និង បន្តកើនឡើង ៧.១% នៅក្នុងឆ្នាំ ២០១៧។ សេដ្ឋកិច្ចរឹងមាំ ដោយសារ ការនាំចេញពីឧស្សាហកម្មសម្លៀកបំពាក់ ការចំណាយរបស់រដ្ឋាភិបាល កំណើននៃបៀរវត្សរ៍សេវាសាធារណៈ និង ប្រាក់ចំណូលកើនឡើង បន្ទាប់ពីការកែលម្អប្រព័ន្ធប្រមូលពន្ធរបស់រដ្ឋាភិបាលកម្ពុជា។ ភាពខុសគ្នានៃការព្យាករណ៍ពីសេដ្ឋកិច្ចកម្ពុជា រវាង ធនាគារពិភពលោក និងធនាគារអភិវឌ្ឍន៍អាស៊ី នេះ ត្រូវបាន សេដ្ឋវិទូ ជាន់ខ្ពស់ នៃធនាគារពិភពលោក បញ្ជាក់ថា បើទោះបីជា អាចមានសំអាងលក្ខខណ្ឌព្យាករណ៍សេដ្ឋកិច្ចផ្សេងគ្នានាំឲ្យតួលេខល្អៀងគ្នា តែនិន្នាការសេដ្ឋកិច្ចកម្ពុជា នាពេលអនាគត គឺល្អជាងមុនដូចគ្នា។
សូមបញ្ជាក់ថា កាលពីឆ្នាំ ២០១៥ ធនាគារពិភពលោក កំណត់កំណើនសេដ្ឋកិច្ចកម្ពុជា ក៏មានអត្រាចំនួន ៧% ដែរ តែទាបជាង ឆ្នាំ២០១៤ មាន ៧.១ % និងឆ្នាំ២០១៣ មាន ៧.៤%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ