ទិវាសេរីភាពសារព័ត៌មាន៖ អ្នកកាសែតបារម្ភពីព័ត៌មានក្លែងក្លាយនិងចង់ឲ្យរួមគ្នាលើកកម្ពស់សន្តិភាព
ថ្ងៃទី ៣ឧសភានេះ គឺជាទិវាសេរីភាពសារព័ត៌មាន។ អង្គការយូណេស្កូ ការិយាល័យសិទ្ធិមនុស្សនៃអង្គការសហប្រជាជាតិ ក្រសួងព័ត៌មាន ក្លិបអ្នកកាសែតកម្ពុជា និងស្ថាប័នដែលធ្វើការពាក់ព័ន្ធនឹងសារព័ត៌មានមួយចំនួនទៀត បានប្រារព្ធពិធីអបអរទិវា ៣ឧសភានេះ ក្រោមប្រធានបទ ប្រព័ន្ធផ្សព្វផ្សាយបែបថ្មី ឱកាសថ្មី និងការប្រឈមថ្មី។ ការប្រឈមថ្មីគឺ ព័ត៌មានក្លែងក្លាយ ដែលអ្នកសារព័ត៌មានយល់ឃើញស្របគ្នាថា ជាបញ្ហាដែលត្រូវរួមគ្នាប្រយុទ្ធប្រឆាំង។ ក្រៅពីបញ្ហានេះ ក៏មានការជជែកគ្នាផងដែរអំពីតួនាទីប្រព័ន្ធផ្សព្វផ្សាយក្នុងការលើកកម្ពស់សន្តិភាព។
ចុះផ្សាយនៅថ្ងៃ៖
ស្តាប់ - ០២:០១
វិស័យប្រព័ន្ធផ្សព្វផ្សាយនៅកម្ពុជាកំពុងតែឈានចូលដល់សករាជថ្មី នៅពេលដែលសារព័ត៌មានបែបថ្មី ដោយចំពោះបណ្ដាញសង្គមតែម្ដង កំពុងតែរីកលូតលាស់យ៉ាងខ្លាំង។ នេះគឺជាការកត់សម្គាល់របស់លោក ប៉ែន បូណា ប្រធានក្លិបអ្នកកាសែតកម្ពុជា និងជានិពន្ធនាយកទូរទស្សន៍ PNN។ បើតាមលោក ប៉ែន បូណា ការមកដល់នៃបណ្ដាញសង្គម បាននាំមកនូវឱកាសនៃការប្រមូល និងផ្សព្វផ្សាយព័ត៌មានបានលឿនរហ័ស ប៉ុន្តែវាក៏បាននាំមកនូវការប្រឈមថ្មីផងដែរ។ នោះគឺ ព័ត៌មានក្លែងក្លាយ។
ប្រធានក្លិបអ្នកកាសែតកម្ពុជា រូបនេះ សង្កេតឃើញថា ការលូតលាស់នៃបណ្ដាញសង្គម បានក្លាយទៅជាវេទិកាមួយដ៏សម្បូរបែប សម្រាប់ដំណឹងគ្រប់ប្រភេទ ទាំងដំណឹងពិតនិងមិនពិត។ ចង់ឬមិនចង់ ការណ៍នេះបានធ្វើឲ្យពលរដ្ឋទូទៅ ពិបាកបែងចែកថា មួយណាជាការពិត និងមួយណាជាដំណឹងក្លែងក្លាយ។ ក្នុងន័យនេះ លោកបានលើកឡើងពីតួនាទីដ៏សំខាន់របស់ អ្នកសារព័ត៌មានអាជីព ដែលត្រូវប្រើជំនាញវិជ្ជាជីវៈរបស់ខ្លួនឲ្យអស់ពីលទ្ធភាព ដើម្បីប្រយុទ្ធប្រឆាំង នឹងព័ត៌មានក្លែងក្លាយ។
រដ្ឋមន្ដ្រីក្រសួងព័ត៌មាន លោក ខៀវ កាញារីទ្ធ បានលើកឡើងថា វិធីតែមួយគត់ដើម្បីប្រយុទ្ធប្រឆាំងព័ត៌មាន ក្លែងក្លាយ គឺអ្នកសារព័ត៌មានត្រូវផ្សាយព័ត៌មានពិត កែតម្រូវលើព័ត៌មានមិនពិត។ ប៉ុន្តែធ្វើដូចម្ដេចទើប អ្នកសារព័ត៌មានដឹងថា ព័ត៌មានណាពិត ហើយមួយណាមិនពិត?
លោកស្រី Jodie De Jonge និពន្ធនាយកកាសែតកម្ពុជាដេលី បានចែករំលែកបទពិសោធផ្ទាល់ថា នៅស្ថាប័នលោកស្រី ដំណឹងខ្លះត្រូវបានតាមដាន ពិនិត្យនិងផ្ទៀងផ្ទាត់រាប់សប្ដាហ៍ ដើម្បីបញ្ជាក់ពីការពិត ជាមុនសិន ទើបចេញផ្សាយជាក្រោយ។
ជាការពិតហើយថា តួនាទីរបស់អ្នកសារព័ត៌មាន គឺត្រូវបង្ហាញពីការពិត ប៉ុន្តែមិនមែនការពិតទាំងអស់គួរ តែត្រូវបានផ្សព្វផ្សាយជាសាធារណៈទេ។ លោក ឆាយ សុផល មន្ដ្រីគម្រោងថ្នាក់ជាតិនៃអង្គការយូណេស្កូ បានសង្កត់ធ្ងន់ថា ការពិតមួយចំនួនមិនអាចផ្សាយបានព្រោះវាត្រូវចងនៅក្នុងច្បាប់ ហើយការពិតមួយចំនួនទៀត អាចបង្កជាជម្លោះ។ ដូច្នេះ បើតាមលោក ឆាយ សុផល អ្នកកាសែតគួរតែចៀសវាងសរសេរការពិតណាដែលបង្កជម្លោះ ហើយផ្សព្វផ្សាយតែការពិតដែលលើកកម្ពស់សន្តិភាពទើបប្រសើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ