ទិវាវិទ្យុពិភពលោកៈ អ្នកជំនាញខាងប្រព័ន្ធផ្សព្វផ្សាយបង្ហាញថាវិទ្យុនៅកម្ពុជាដើរតួនាទីកាន់តែសំខាន់
នៅថ្ងៃចន្ទទី ១៣ កុម្ភៈនេះ គឺជាទិវាពិភពលោកនៃប្រព័ន្ធផ្សព្វផ្សាយតាមវិទ្យុ។ អង្គការ UNESCO បានចាត់ចែង និងដឹកនាំប្រារព្ធពិធីនេះឡើង ដោយអំពាវនាវឲ្យស្ថានីយ៍ផ្សាយវិទ្យុនានា និងអង្គការក្រៅរដ្ឋាភិបាលទាំងឡាយចូលរួមអបអរទិវាវិទ្យុពិភពលោកឆ្នាំ ២០១៧នេះ។ ដោយឡែក វិទ្យុផ្សាយសម្លេងនៅក្នុងប្រទេសកម្ពុជាវិញ នៅពេលនេះត្រូវគេមើលឃើញថាក៏កំពុងដើរតួនាទីកាន់តែសំខាន់ទៅៗសំខាន់ទៅ ចំពោះស្ថានីយ៍វិទ្យុមួយចំនួន ដែលបានប្រកាន់ខ្ជាប់ តាមក្រមសីលធម៌វិជ្ជាជីវៈ។
ចុះផ្សាយនៅថ្ងៃ៖
ស្តាប់ - ០១:៥៦
តាមក្រសួងព័ត៌មាន វិទ្យុនៅក្នុងប្រទេសកម្ពុជាបច្ចុប្បន្នមានប្រមាណជាជាង ១០០ ស្ថានីយ៍ ទាំងនៅតាមខេត្ត និងនៅរាជធានីភ្នំពេញ។ វឌ្ឍនភាពនៃប្រព័ន្ធផ្សព្វផ្សាយតាមវិទ្យុនៅក្នុងប្រទេសកម្ពុជាពេលនេះ ត្រូវបានគេមើលឃើញថាមានសន្ទុះខ្លាំងក្លាក៏ប៉ុន្តែ មានវិទ្យុតិចតួចប៉ុណ្ណោះ ដែលបានបំរើការផ្សាយព័ត៌មានជាអចិន្ត្រៃយ៍តាមបែបវិជ្ជាជីវៈ។
ប្រធានក្លឹបអ្នកកាសែតកម្ពុជាលោកប៉ែន បូណា កត់សម្គាល់ថា វិទ្យុបានដើរតួនាទីសំខាន់នៅក្នុងប្រទេសកម្ពុជា ដោយសារមានភាពងាយស្រួលទទួលបានព័ត៌មានទោះជាប្រជាពលរដ្ឋក្រីក្រក៏ដោយ ដោយគ្រាន់តែមានកូនវិទ្យុមួយនៅនឹងដៃប៉ុណ្ណោះ។ ដោយមានហ្វេ្រកង់ជាប់គ្នារដឹក លោកប៉ែន បូណា បន្ថែមថាវិទ្យុមានភាពសកម្មរីកចំរើនច្រើនក្នុងការផ្សព្វផ្សាយនៅកម្ពុជា ក៏ប៉ុន្តែមានតែបរិមាណ តែវិទ្យុដែលមានគុណភាពព័ត៌មានមិនច្រើនប៉ុន្មានទេ។
ដោយឡែកលោក មឿន ឈានណារិទ្ធិ នាយកវិទ្យាស្ថានកម្ពុជាសម្រាប់ការសិក្សាផ្នែកព័ត៌មានបញ្ជាក់ថា តាមការស្រាវជ្រាវរបស់លោក វិទ្យុមានផលប្រយោជន៍ច្រើនជាងប្រព័ន្ធផ្សព្វផ្សាយដទៃទៀត រួមមានកាសែត កាសែតអនឡាញ និងទូរទស្សន៍ជាដើម។ លោកណារិទ្ធិ បញ្ជាក់ថាអ្នកមិនចេះអក្សរ អ្នកពិការភ្នែក អ្នកមមាញឹកក្នុងការងារសុទ្ធតែអាចស្តាប់វិទ្យុ ដែលមានការផ្សព្វផ្សាយទូលាយ ដោយមិនបង់ថ្លៃបាន ដោយមានតែកូនវិទ្យុមួយក្នុងដៃ ខុសពីប្រព័ន្ធផ្សព្វផ្សាយផ្សេងៗទៀត។
ជាមួយគ្នានេះ លោក អ៊ុក គឹមសេង អ្នកនាំពាក្យក្រសួងព័ត៌មានក៏បានទទួលស្គាល់ដែរថា វិទ្យុនៅក្នុងប្រទេសកម្ពុជាមានសារៈសំខាន់ជាងគេ ក្នុងការផ្តល់សារដល់ប្រជាពលរដ្ឋនៅគ្រប់ទិសទី។ អ្វីដែលជាការកត់សម្គាល់នៅដំណាក់កាលចុងក្រោយនេះគឺ វិទ្យុកាន់តែដើរតួនាទីសំខាន់បន្ថែមទៀតក្នុងការចែកចាយព័ត៌មានទៅកាន់សាធារណៈជន តាមរយៈការផ្សាយផ្ទាល់តាមបណ្តាញសង្គម ពីលើអ្វីដែលមានការផ្សាយតាមរលកធាតុអាកាសស្រាប់នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ