ប្រធានបក្សយុវជនកម្ពុជា ប្តឹងលោក កឹម សុខា ទាមទាររកសេចក្តីថ្លៃថ្នូរ
លោក ពេជ្រ ស្រស់ ប្រធានគណបក្សយុវជនកម្ពុជា នៅថ្ងៃទី២០ មិថុនានេះ បានដាក់ពាក្យប្តឹងលោក កឹម សុខា ប្រធានគណបក្សសង្រ្គោះជាតិជាផ្លូវការ ពីបទរើសអើងមកលើគណបក្សនយោបាយតូចៗ។ បើតាមពាក្យបណ្តឹងដែលដាក់ទៅកាន់អយ្យការអមតុលាការក្រុងភ្នំពេញនៅថ្ងៃនេះ លោក ពេជ្រ ស្រស់ មិនបានទាមទារសំណងអ្វីនោះទេ តែកម្មវត្ថុនៃពាក្យបណ្តឹង គឺ ចង់ទាមទាររកសេចក្តីថ្លៃថ្នូរជូនគណបក្សនយោបាយតូចៗ។
ចុះផ្សាយនៅថ្ងៃ៖
ស្តាប់ - ០៣:១៧
ពាក្យបណ្តឹងរបស់ប្រធានគណបក្សយុវជនកម្ពុជា បានដាក់ទៅកាន់អយ្យការអមតុលាការក្រុងភ្នំពេញនៅព្រឹកថ្ងៃទី២០មិថុនា ដោយមានកម្មវត្ថុចំនួនពីរ។ ទី១. គឺប្តឹងលោក កឹម សុខា ពីបទញុះញង់ឲ្យប្រជាពលរដ្ឋមានការរើសអើងចំពោះគណបក្សនយោបាយ និងទី២. គឺប្តឹងពីបទរំលោភសិទ្ធិប្រជាពលរដ្ឋក្នុងការជ្រើសរើសមេដឹកនាំរបស់ខ្លួន។ បើតាមការបញ្ជាក់ពីប្រធានគណបក្សយុវជនកម្ពុជារូបនេះ ពាក្យបណ្តឹងរបស់ខ្លួន មិនបានទាមទារសំណងអ្វីពីលោក កឹម សុខា នោះទេ ប៉ុន្តែគឺចង់ទាមទារស្វែងរកសេចក្តីថ្លៃថ្នូរជូនគណបក្សរបស់ខ្លួន ព្រមទាំងឱ្យ លោក កឹម សុខា ទទួលខុសត្រូវចំពោះមុខច្បាប់។ ប៉ុន្តែលោក យឹម សុវណ្ណ អ្នកនាំពាក្យគណបក្សសង្រ្គោះជាតិអះអាងថា គណបក្សសង្រ្គោះជាតិមិនចាប់អារម្មណ៍នឹងពាក្យបណ្តឹងនេះទេ។
បើតាមការបញ្ជាក់ពីលោក ពេជ្រ ស្រស់ ការឈានទៅដល់ដាក់ពាក្យបណ្តឹងនៅក្នុងតុលាការនេះ គឺដោយសារតែប្រធានគណបក្សប្រឆាំងលោក កឹម សុខា បានប្រើប្រាស់សារនយោបាយរើសអើងចំពោះគណបក្សនយោបាយតូចៗ ដោយលោក កឹម សុខា បានអំពាវនាវកាលពីថ្ងៃទី ១២ មិថុនា នៅឯស្រុកបារាយខេត្តកំពង់ធំ កុំឲ្យប្រជាពលរដ្ឋបង្ហិនសន្លឹកឆ្នោតរបស់ខ្លួន តាមរយៈបោះឆ្នោតឲ្យគណបក្សនយោបាយតូចៗ។ លោក ពេជ្រ ស្រស់ បានចាត់ទុកសារនយោបាយនេះថា នាំឱ្យមានការរើសអើងចំពោះគណបក្សនយោបាយតូចៗ។
គួរជំរាបជូនថា នៅក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីថ្ងៃទី៤ មិថុនា កន្លងទៅ មានគណបក្សនយោបាយចំនួន១២បានចូលរួម ហើយក្នុងនោះគណបក្សយុវជនកម្ពុជារបស់លោក ពេជ្រ ស្រស់ ទទួលបានសម្លេងឆ្នោតគាំទ្រតែជាង១៥០០សម្លេងប៉ុណ្ណោះ។
លោក ពេជ្រ ស្រស់ ប្រធានគណបក្សយុវជនកម្ពុជា ត្រូវបានគេស្គាល់ថា គឺជាអតីតនិស្សិតច្បាប់ម្នាក់នៅក្នុងទីក្រុងភ្នំពេញ។ កាលពីឆ្នាំ២០០៦ លោកធ្លាប់ជាប្រធានចលនាយុវជនគណបក្សសិទ្ធិមនុស្សរបស់លោក កឹម សុខា ប្រចាំនៅក្នុងទីក្រុងភ្នំពេញ និងធ្លាប់ជាប្រធានអង្គការសង្គមស៊ីវិលដែលធ្វើការលើវិស័យច្បាប់ និងបន្ទាប់មកជាសកម្មជននយោបាយ ដែលធ្លាប់ដើរភ្លក់រសជាតិជាមួយគណបក្សនយោបាយជាច្រើន មុនចេញមកបង្កើតគណបក្សយុវជនកម្ពុជានេះ។
ទោះជាយ៉ាងនេះក្តី លោក សូ ចន្ថា សាស្រ្តាចារ្យផ្នែកវិទ្យាសាស្រ្តនយោបាយបានចាត់ទុកពាក្យបណ្តឹងរបស់លោក ពេជ្រ ស្រស់នេះថា គឺគ្រាន់តែជាល្បែងនយោបាយដែលគ្មានប្រយោជន៍ដល់ជាតិទាល់តែសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ