និន្នាការនយោបាយកម្ពុជាកំពុងដើរទៅរកគន្លងនយោបាយអន្តរជាតិ
កាលពីអាណត្តិទី១ មានគណបក្សនយោបាយចំនួន៤៣បានចូលរួមការបោះឆ្នោតតំណាងរាស្រ្ត។ ប៉ុន្តែសម្រាប់អាណត្តិទី៥នេះ មានគណបក្សនយោបាយចំនួនតែ៨ប៉ុណ្ណោះគ្រោងនឹងចូលរួមការបោះឆ្នោត។ មិនត្រឹមតែប៉ុណ្ណោះ សម្រាប់អាណត្តិនេះ ចលនាគណបក្សនយោបាយធំពីរនឹងប្រកួតប្រជែងគ្នា ហើយនេះគឺជានិន្នាការថ្មីដែលកំពុងដើរទៅរកគន្លងនយោបាយអន្តជាតិ។
ចុះផ្សាយនៅថ្ងៃ៖
ស្តាប់ - ០២:២៧
លោក ហង្ស ពុទ្ធា នាយកប្រតិបត្តិនៃអង្គការសង្កេតការណ៍បោះឆ្នោត និកហ្វិក បានអត្ថាធិប្បាយ នៅថ្ងៃអាទិត្យនេះថា និន្នាការនយោបាយ នៅក្នុងប្រទេសកម្ពុជា បាននិងកំពុងដើរទៅរកគន្លងនយោបាយនៃប្រទេសជឿនលឿនមួយចំនួនធំនៅលើពិភពលោក។
អត្ថាធិប្បាយរបស់លោក ហង្ស ពុទ្ធា បានធ្វើឡើងយ៉ាងដូច្នេះ ដោយសង្កេតឃើញថា នៅក្នុងការបោះឆ្នោតអាណត្តិទី៥នេះ មានគណបក្សនយោបាយធំតែពីរប៉ុណ្ណោះនៅក្នុងប្រទេសកម្ពុជាដែលនឹងត្រូវប្រកួតប្រជែងគ្នា នៅខែកក្កដាឆ្នាំ២០១៣ខាងមុខនេះ។ គណបក្សទាំងពីរនោះ គឺគណបក្សប្រជាជនកម្ពុជា និងគណបក្សសង្រ្គោះជាតិ។
កាលពីអាណត្តិទី១ និងអាណត្តិបន្តបន្ទាប់ គេសង្កេតឃើញថា គណបក្សនយោបាយជាច្រើនត្រូវបានបង្កើតឡើងដើម្បីចូលរួមការបោះឆ្នោត។ ប៉ុន្តែពីអាណត្តិមួយ ទៅអាណត្តិមួយ ចំនួនគណបក្សនយោបាយកាន់តែថយចុះជាលំដាប់ ជាក់ស្តែង នៅឆ្នាំ២០១៣នេះ មានគណបក្សនយោបាយតែ៨ប៉ុណ្ណោះត្រៀមចូលរួមការប្រកួតប្រជែង ផ្ទុយពី ៤៣ គណបក្សនយោបាយ កាលពីការបោះឆ្នោតនៅឆ្នាំ១៩៩៣កន្លងមក។
លោក ហង្ស ពុទ្ធា អ្នកជំនាញតាមដានការបោះឆ្នោត បានពន្យល់ថា នៅពេលដែលមានគណបក្សនយោបាយកាន់តែតិច អ្នកបោះឆ្នោតកាន់តែងាយស្រួលក្នុងការសម្រេចចិត្ត។ នៅក្នុងប្រទេសថៃ ប្រទេសម៉ាឡេស៊ី ប្រទេសបារាំង ប្រទេសអាមេរិក និងប្រទេសជឿនលឿនមួយចំនួនផ្សេងទៀត ចំនួនគណបក្សនយោបាយកាន់តែថយចុះ។ ម៉្យាងវិញទៀត គណបក្សនយោបាយធំៗភាគច្រើននៅសល់តែពីរប៉ុណ្ណោះដែលត្រូវប្រកួតប្រជែងគ្នាជារៀងរាល់អាណត្តិ។
លោក កែម ឡី អ្នកវិភាគនយោបាយឯករាជ្យនៅក្នុងប្រទេសកម្ពុជាបាននិយាយនៅថ្ងៃអាទិត្យនេះថា ដំណើរការនយោបាយនៅក្នុងប្រទេសកម្ពុជាកំពុងឈានទៅរកតុល្យភាពអំណាចរវាងគណបក្សប្រឆាំង និងគណបក្សកាន់អំណាច។ បើយោងតាមលោក កែម ឡី កាលណាអំណាចរវាងបក្សប្រឆាំង និងបក្សកាន់អំណាចកាន់តែប្រកិតគ្នា ពេលនោះ ការកសាងជាតិកាន់រីកចម្រើនទៅមុខយ៉ាងលឿន មានន័យថា គណបក្សនីមួយៗមិនជិះសេះលែងដៃទៀតឡើយ។
លោក កែម ឡី បានបន្តទៀតថា ការច្របាច់បញ្ចូលគ្នារវាងគណបក្សនឹងគណបក្សអនុញ្ញាតអោយពួកគេអាចប្រមូលបានបន្ថែមនូវកម្លាំងកាយ កម្លាំងចិត្ត កម្លាំងបញ្ញា និងធនធានហិរញ្ញវត្ថុកាន់តែច្រើនជាងការនៅបែកខ្ញែកគ្នា។ ម៉្យាងវិញទៀត ការបញ្ចូលគណបក្សគ្នាកាន់តែច្រើនអនុញ្ញាតអោយគណបក្សនោះ ប្រមូលសំឡេងបានច្រើនជាងមុន និងមានឳកាសនិយាយកាន់តែច្រើននៅក្នុងរដ្ឋសភាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ