លោកហ៊ុនសែនសន្យាធ្វើការស្និទ្ធជាមួយលោកស្រីប៉ាក់ គុនហឺ
ក្រោយពីសាធារណៈរដ្ឋកូរ៉េប្រកាសសមាសភាពប្រធានាធិបតីថ្មីរបស់ខ្លួនគឺលោកស្រី ប៉ាក គុនហឺ (Park Geun-Hye) លោកនាយករដ្ឋមន្ត្រីហ៊ុន សែនក៏បានផ្ញើលិខិតអបអរជ័យជំនះរបស់លោកស្រីប្រធានាធិបតីភ្លាមដែរ។ នៅក្នុងលិខិតដែលត្រូវបានផ្ញើទៅកាន់រដ្ឋាភិបាលកូរ៉េកាលពីថ្ងៃម្សិលមិញ ប្រមុខរដ្ឋាភិបាលកម្ពុជា បានសន្យានិងសម្តែងក្តីសង្ឃឹមថា ថ្នាក់ដឹកនាំប្រទេសទាំងពីរ កម្ពុជា-កូរ៉េខាងត្បូងនឹងពង្រីកកិច្ចសហប្រតិបត្តិការទ្វេភាគីអោយកាន់តែស៊ីជម្រៅថែមទៀត។
ចុះផ្សាយនៅថ្ងៃ៖
ស្តាប់ - ០២:១៦
លោកនាយករដ្ឋមន្ត្រីខ្មែរហ៊ុន សែន បានសម្តែងការសាទរចំពោះលោកស្រីប៉ាក់ គុនហឺដែលបានទទួលការគាំទ្រពីប្រជាពលរដ្ឋកូរ៉េ អោយលោកស្រីក្លាយជាប្រធានាធិបតីស្ត្រីលើកដំបូងនៅក្នុងប្រវត្តិសាស្ត្រនៃប្រទេសកូរ៉េខាងត្បូងនោះ។
ប៉ុន្តែភ្ជាប់ជាមួយការអបអរ ប្រមុខរដ្ឋាភិបាលកម្ពុជាក៏បានរម្លឹកអំពីចំណងសហប្រតិបត្តិការទ្វេភាគីរវាងកម្ពុជានិងកូរ៉េខាងត្បូង ចំពោះលោកស្រីប្រធានាធិបតីដែរ។ នៅក្នុងលិខិតនោះ លោកនាយករដ្ឋមន្ត្រីបានសម្តែងក្តីសង្ឃឹមថា ក្រោមការដឹកនាំរបស់លោកស្រី ប៉ាក គុនហឺ ទំនាក់ទំនងមិត្តភាព និងសហប្រតិបត្តិការដ៏មានផ្លែផ្កាក្នុងពេលកន្លងមក ពិតជានឹងត្រូវបន្តពង្រឹងនិងពង្រីកថែមទៀតដើម្បីជាផលប្រយោជន៍ទៅវិញទៅមកនៃប្រទេសទាំងពីរ។
លោកនាយករដ្ឋមន្ត្រីបានសរសេរបន្តយ៉ាងដូច្នេះថា ខ្ញុំសង្ឃឹមថា នឹងធ្វើការយ៉ាងជិតស្និទ្ធិជាមួយលោកជំទាវ ដើម្បីធ្វើអោយចំណងទាក់ទងរវាងប្រជាជនយើង កាន់តែមានភាពស្អិតល្មួត និងជំរុញសហប្រតិបត្តិការរវាងប្រទេសយើងទាំងពីរអោយកាន់តែរីកចម្រើនគ្រប់វិស័យទាំងអស់។
លោកនាយករដ្ឋមន្ត្រីកម្ពុជាបានផ្ញើសារអបអរលោកស្រីប្រធានាធិបតីថ្មីរបស់កូរ៉េខាងត្បូងដោយបង្ហាញភាពជិតស្និទ្ធិ ខណៈដែលវិនិយោគិន និងជំនួយរបស់កូរ៉េខាងត្បូងយ៉ាងច្រើនកំពុងមានវត្តមាននៅកម្ពុជា។ វិនិយោគ និងជំនួយទាំងនោះបានមកដល់កម្ពុជា ក្រោមអណត្តិដឹកនាំរបស់អតីតប្រធានាធិបតី លី ម្ញុងបាក់ ដែលធ្លាប់ជាទីប្រឹក្សាសេដ្ឋកិច្ចរបស់លោកនាយករដ្ឋមន្ត្រីហ៊ុន សែន។ ថ្វីដ្បិតតែជាបុគ្គលប្រធានាធិបតីថ្មី លោកស្រីប៉ាក គុនហឺគឺជាបេក្ខភាពមកពីគណបក្សអភិរក្សរបស់អតីតប្រធានាធិបតីលី ម្ញុងបាក់។
អត្ថាធិប្បាយទៅលើអនាគតនៃទំនាក់ទំនងរវាងមេដឹកនាំទាំងពីរ គឺលោកស្រីប្រធានាធិបតីកូរ៉េខាងត្បូង និងលោកនាយករដ្ឋមន្ត្រីកម្ពុជា លោក ឯម វណ្ណារ៉ា ប្រធានផ្នែកសន្តិសុខ និងទំនាក់ទំនងអន្តរជាតិ នៃរាជបណ្ឌិតសភាកម្ពុជាបានពន្យល់ថា ថ្វីដ្បិតអាកប្បកិរិយារបស់មេដឹកនាំគឺជាផ្នែកសំខាន់មួយនៅក្នុងការងារទំនាក់ទំនងអន្តរជាតិ ប៉ុន្តែតាមច្បាប់អន្តរជាតិនោះ មេដឹកនាំថ្មីមិនដែលបោះបង់ចោលការងារ ឬមរតដែលមេដឹកនាំចាស់បានបន្សល់ទុកនោះឡើយ។
ម្យ៉ាងវិញទៀត អ្នកតាមដានផ្នែកនយោបាយរូបនេះ បានបង្ហាញការជឿជាក់ថា ទំនាក់ទំនងរវាងទីក្រុងសេអ៊ូល និងភ្នំពេញនឹងនៅតែល្អ ដោយសារតែផលប្រយោជន៍របស់កូរ៉េខាងត្បូង ពិសេសវិនិយោគ កំពុងមានច្រើននៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ