តើចិននិងរុស្ស៊ីអាចយកអង្គការសហប្រតិបត្តិការសៀងហៃធ្វើជាបក្សសម្ព័ន្ធប្រឆាំងលោកខាងលិចបានដែរឬទេ?
ចុះផ្សាយនៅថ្ងៃ៖
ស្តាប់ - ០៣:៥៥
ចិន និងរុស្ស៊ី កំពុងតែព្យាយាមជំរុញអង្គការសហប្រតិបត្តិការសៀងហៃ ដែលប្រមូលផ្តុំប្រទេសជាសមាជិកមកពីអាស៊ីកណ្តាលឲ្យមានតួនាទីកាន់តែសំខាន់ឡើងថែមទៀត នៅលើឆាកអន្តរជាតិ ក្នុងពេលដែលអាមេរិកកំពុងតែព្យាយាមបង្កើនឥទ្ធិពលនៅអាស៊ី។ ក៏ប៉ុន្តែ សំណួរសួរថា តើចិន និងរុស្ស៊ី ដែលជាអតីតគូប្រជែងក្នុងសង្រ្គាមត្រជាក់នេះ អាចធ្វើឲ្យអង្គការសហប្រតិបត្តិការសៀងហៃក្លាយជាបក្សសម្ព័ន្ធរឹងមាំមួយ ដើម្បីទប់ទល់នឹងលោកខាងលិចបានដែរឬទេ?
ចាប់តាំងពីបង្កើតឡើង នៅឆ្នាំ២០០១មក អង្គការសហប្រតិបត្តិការសៀងហៃ (OCS) តែងតែត្រូវបានប្រទេសលោកខាងលិចមើលឃើញថា ជាបក្សសម្ព័ន្ធផ្នែកសន្តិសុខ ដែលចិន និងរុស្ស៊ីបង្កើតឡើង ដើម្បីទប់ទល់នឹងបក្សសម្ព័ន្ធអូតង់។ ជាង ១០ឆ្នាំក្រោយមក នៅពេលដែលអាមេរិកកំពុងបង្កើនឥទ្ធិពលនៅក្នុងតំបន់អាស៊ី ចិន និងរុស្ស៊ី ក៏កំពុងតែព្យាយាមពង្រឹងអង្គការសហប្រតិបត្តិការសៀងហៃផងដែរ ដើម្បីបង្កើនតួនាទីនៅលើឆាកអន្តរជាតិ។
ក៏ប៉ុន្តែ មុននឹងអាចក្លាយជាបក្សសម្ព័ន្ធរឹងមាំមួយ ដើម្បីទប់ទល់នឹងលោកខាងលិច គេត្រូវមើលសិនថា តើប្រទេសជាសមាជិកអង្គការសហប្រតិបត្តិការសៀងហៃអាចបង្កើនទំនុកចិត្តរវាងគ្នាឯងបានដែរឬទេ ជាពិសេស រវាងចិន និងរុស្ស៊ី ដែលជាក្បាលម៉ាស៊ីនដ៏សំខាន់របស់អង្គការនេះ?
ដើម្បីទប់ទល់នឹងអាមេរិក រុស្ស៊ី និងចិនបានព្យាយាមបង្ហាញនូវជំហររួបរួមគ្នាជាធ្លុងមួយ ចំពោះសំណុំរឿងសំខាន់ៗ ដូចជា វិបត្តិនៅស៊ីរី សំណុំរឿងនុយក្លេអ៊ែរអ៊ីរ៉ង់ និងអនាគតរបស់អាហ្វហ្កានីស្ថាន ក្រោយការដកកងទ័ពរបស់អាមេរិក ជាដើម។ ក៏ប៉ុន្តែ នៅពីក្រោយការរួបរួមគ្នានេះ អតីតគូសត្រូវសង្រ្គាមត្រជាក់ទាំងពីរនៅតែបន្តសម្លឹងមើលគ្នា ដោយការមិនទុកចិត្ត និងដោយមន្ទិលសង្ស័យអំពីគោលដៅជាយុទ្ធសាស្រ្តចំពោះគ្នាទៅវិញទៅមក។
សម្រាប់រុស្ស៊ី ការដែលចិនកំពុងតែមានកម្លាំងខ្លាំងឡើង ទាំងផ្នែកសេដ្ឋកិច្ច យោធា និងនយោបាយអន្តរជាតិ អាចនឹងក្លាយជាការគំរាមកំហែងដ៏ធំមួយ ដល់អំណាចរបស់រុស្ស៊ីនៅក្នុងតំបន់ និងនៅលើពិភពលោក។
មជ្ឈដ្ឋានទូទៅនៅរុស្ស៊ីក៏បង្ហាញនូវការបារម្ភថា នៅពេលដែលចិនមានកម្លាំងកាន់តែខ្លាំង រុស្ស៊ីអាចនឹងត្រូវបាត់បង់ការគ្រប់គ្រងលើតំបន់ស៊ីបេរី ដែលជាតំបន់ស្ថិតក្នុងទឹកដីរុស្ស៊ី ហើយជាប់នឹងព្រំដែនចិន។ ស៊ីបេរី ជាតំបន់សម្បូរទៅដោយធនធានធម្មជាតិ ប៉ុន្តែ មិនសូវមានមនុស្សរស់នៅ ដោយសារតែលក្ខខណ្ឌអាកាសធាតុមិនអំណោយផល។ រុស្ស៊ីបារម្ភថា ទៅថ្ងៃអនាគត រុស្ស៊ីខ្លួនឯងដែលជាម្ចាស់ស្រុកមិនអាចប្រជែងជាមួយចិនបាន ក្នុងការធ្វើអាជីវកម្មលើធនធានធម្មជាតិនៅស៊ីបេរី។
ចំពោះយុទ្ធសាស្រ្តរយៈពេលវែងវិញ ការបារម្ភរបស់រុស្ស៊ី គឺនៅត្រង់ថា លំនឹងនៃមហាអំណាចពិភពលោក នឹងត្រូវស្ថិតនៅលើអាមេរិក និងចិន ដែលជាតួឯក ចំណែករុស្ស៊ីនឹងត្រូវក្លាយជាតួរង។
បច្ចុប្បន្ននេះ គ្រាន់តែនៅក្នុងអង្គការប្រតិបត្តិការសៀងហៃ ក៏ចិន និងរុស្ស៊ី កំពុងតែប្រជែងគ្នាធ្វើជាមេដឹកនាំដែរ។ រុស្ស៊ីអាចរំពឹងលើទំនាក់ទំនងជាប្រវត្តិសាស្រ្តជាមួយប្រទេសអាស៊ីកណ្តាល ដែលធ្លាប់នៅក្នុងសហភាពសូវៀតជាមួយគ្នា។ ក៏ប៉ុន្តែ ចិន គឺជាប្រទេសសម្បូរលុយ ដែលអាចទាក់ទាញប្រទេសទាំងនេះបាន។ នៅក្នុងជំនួបកំពូលកាលពីថ្ងៃពុធម្សិលមិញនេះ លោកហ៊ូ ជិនតាវ ប្រធានាធិបតីចិន បានប្រកាសសន្យាថា នឹងផ្តល់កម្ចីចំនួន ១០ពាន់លានដុល្លារ ដើម្បីជួយដល់ការអភិវឌ្ឍសេដ្ឋកិច្ចប្រទេសជាសមាជិកអង្គការសហប្រតិបត្តិការសៀងហៃ។
កែវភ្នែករបស់ចិនកំពុងតែសម្លឹងទៅតំបន់អាស៊ីកណ្តាល ដែលជាតំបន់សម្បូរទៅដោយប្រេង និងឧស្ម័ន ដែលចិនកំពុងត្រូវការខ្លាំង។ ក៏ប៉ុន្តែ វត្តមានរបស់ចិន នៅអាស៊ីកណ្តាល ប្រាកដជានឹងត្រូវប៉ះទង្គិចជាមួយរុស្ស៊ី ពីព្រោះ រុស្ស៊ីតែងតែចាត់ទុកតំបន់នេះជាដែនឥទ្ធិពលរបស់ខ្លួន មិនអាចឲ្យមហាអំណាចណាមួយឈានជើងចូលមកប្រជែងបានទេ។
បញ្ហាមួយទៀត ដែលអាចបង្កភាពចម្រូងចម្រាស នៅក្នុងអង្គការសហប្រតិបត្តិការសៀងហៃ គឺវត្តមានរបស់ឥណ្ឌា និងប៉ាគីស្ថាន។ ឥណ្ឌា និងប៉ាគីស្ថាន គឺជាគូសត្រូវនឹងគ្នា។ បច្ចុប្បន្ន ប្រទេសទាំងពីរនេះចូលរួមក្នុងជំនួបកំពូលរបស់អង្គការសហប្រតិបត្តិការសៀងហៃ ក្នុងឋានៈជាសមាជិកសង្កេតការណ៍ប៉ុណ្ណោះ ហើយកំពុងតែសុំចូលជាសមាជិកពេញសិទ្ធិ។ រុស្ស៊ីគាំទ្រឲ្យឥណ្ឌាចូលជាសមាជិកពេញសិទ្ធិរបស់អង្គការសហប្រតិបត្តិការសៀងហៃ ក៏ប៉ុន្តែ ចិនជំទាស់។ ប្រសិនបើរុស្ស៊ីនៅតែទទូចចង់ឲ្យឥណ្ឌាចូលជាសមាជិក ចិនប្រាកដជានឹងទាមទារឲ្យប៉ាគីស្ថានចូលជាសមាជិកដែរ។
ចិន រុស្ស៊ី ឥណ្ឌា និងប៉ាគីស្ថាន។ បើសិនជាប្រទេសទាំងបួននេះមានវត្តមានជាមួយគ្នា ជាសមាជិកពេញសិទ្ធិ អង្គការសហប្រតិបត្តិការសៀងហៃទំនងជានឹងត្រូវចំណាយពេលភាគច្រើន ទៅលើវិវាទផ្ទៃក្នុង ហើយពិបាកនឹងអាចរួបរួមគ្នាជាបក្សសម្ព័ន្ធរឹងមាំមួយ ដើម្បីទប់ទល់នឹងអាមេរិកបានណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ