តើការចរចារវាងថៃនិងក្រុមឧទ្ទាមអ៊ីស្លាមមានសង្ឃឹមទទួលជោគជ័យដែរឬទេ?
ចុះផ្សាយនៅថ្ងៃ៖
ស្តាប់ - ០៤:៤៥
កាលពីថ្ងៃព្រហស្បតិ៍ម្សិលមិញ រដ្ឋាភិបាលថៃ និងក្រុមឧទ្ទាមអ៊ីស្លាមបានចាប់ផ្តើមបើកការចរចា នៅក្នុងទីក្រុងគួឡាឡាំពួ ប្រទេសម៉ាឡេស៊ី ដើម្បីស្វែងរកដំណោះស្រាយបញ្ចប់អំពើហិង្សា នៅតាមខេត្តប៉ែកខាងត្បូងប្រទេសថៃ។ ការព្រមព្រៀងជួបចរចាគ្នារវាងរដ្ឋាភិបាលថៃ និងក្រុមឧទ្ទាមអ៊ីស្លាមនេះ ត្រូវបានគេមើលឃើញថា ជាការវិវឌ្ឍដ៏សំខាន់មួយ ក៏ប៉ុន្តែ ក្នុងពេលជាមួយគ្នា ក៏មានការចោទសួរថា តើការចរចានេះមានសង្ឃឹមថានឹងអាចទទួលបានជោគជ័យដែរឬទេ?
ជម្លោះនៅប៉ែកខាងត្បូងប្រទេសថៃ បានកើតឡើងជិត ១០ឆ្នាំមកហើយ។ វាគឺជាជម្លោះធ្ងន់ធ្ងរ បណ្តាលឲ្យមនុស្សស្លាប់រហូតដល់ទៅជាង ៥ពាន់នាក់ ក៏ប៉ុន្តែ គឺជាជម្លោះ ដែលមិនសូវមានអ្នកណាចាប់អារម្មណ៍ និងមិនសូវមានអ្នកណាយល់ ពីព្រោះ វាជាជម្លោះ ដែលពិបាកនឹងយល់!
គ្រប់គ្នាសុទ្ធតែបានដឹងហើយថា ប្រទេសថៃ គឺជាប្រទេសដែលមានប្រជាជនភាគច្រើនលើសលុប ជាអ្នកកាន់ពុទ្ធសាសនា។ ក៏ប៉ុន្តែ ប្រជាជននៅតាមបណ្តាខេត្តចំនួន ៣ គឺ យ៉ាឡា, ប៉ាតានី និងណារ៉ាធីវ៉ាត់ ដែលជាខេត្តនៅចុងខាងត្បូងជាប់នឹងប្រទេសម៉ាឡេស៊ី ភាគច្រើនបំផុតជាអ្នកកាន់សាសនាអ៊ីស្លាម និងនិយាយភាសាម៉ាឡេ។ គឺនៅតាមបណ្តាខេត្តអ៊ីស្លាមទាំង ៣នេះហើយ ដែលកើតមានអំពើបះបោរ ក្នុងទ្រង់ទ្រាយជាភេរវកម្មជីហាដ តាំងពីឆ្នាំ២០០៤មក។
សំណួរដែលគេតែងតែចោទឡើងនោះ គឺនៅត្រង់ថា តើអ្នកណាជាមេដឹកនាំក្រុមឧទ្ទាមអ៊ីស្លាមទាំងនេះ? តើពួកគេងើបឡើងធ្វើការបះបោរ ដើម្បីទាមទារចង់បានអ្វីពិតប្រាកដ? តើពួកគេមានចិត្តចង់ចរចាដែរឬទេ?
តាមពិត ចាប់តាំងពីមានអំពើបះបោរផ្ទុះឡើង នៅឆ្នាំ២០០៤មក ក៏ធ្លាប់មានការព្យាយាមស្វះស្វែងឲ្យមានការចរចាគ្នា រវាងអាជ្ញាធរថៃ និងក្រុមឧទ្ទាមអ៊ីស្លាមថៃនេះដែរ ក៏ប៉ុន្តែ មិនបានសម្រេច។ ទើបតែកាលពីខែកុម្ភៈថ្មីៗកន្លងទៅនេះ ដែលរដ្ឋាភិបាលថៃ និងក្រុមឧទ្ទាមអ៊ីស្លាម ដែលហៅខ្លួនឯងថា ជា “ក្រុមបដិវត្តន៍ជាតិបរិសាន្ត” បានសុខចិត្តបើកការចរចាជាមួយគ្នា ក្រោមការជួយសម្របសម្រួលពីសំណាក់ម៉ាឡេស៊ី។ ការចរចានេះ បានចាប់ផ្តើមបើកធ្វើ កាលពីថ្ងៃព្រហស្បតិ៍ ម្សិលមិញ នៅក្នុងទីក្រុងគួឡាឡាំពួ ប្រទេសម៉ាឡេស៊ី។
ការសុខចិត្តចរចាគ្នានេះ គឺជាជំហានដ៏សំខាន់មួយ ព្រោះវាមានន័យថា រដ្ឋាភិបាលថៃសុខចិត្តទទួលស្គាល់ជាផ្លូវការនូវក្រុមបះបោរអ៊ីស្លាមប៉ែកខាងត្បូងនេះថា មិនមែនគ្រាន់តែជាក្រុមឧក្រិដ្ឋជន ដូចដែលអាជ្ញាធរថៃ ជាពិសេស កងទ័ពថៃធ្លាប់បានចាត់ទុកកាលពីមុននោះទេ ប៉ុន្តែ ពួកគេគឺជាដៃគូចរចាមួយ ដែលមានការទាមទារផ្នែកនយោបាយ ដែលអាចជជែកគ្នាបាន។
ក៏ប៉ុន្តែ បញ្ហាដែលស្មុគស្មាញបំផុត នៅក្នុងដំណើរការចរចាស្វែងរកដំណោះស្រាយសន្តិភាព នៅប៉ែកខាងត្បូងប្រទេសថៃនេះ គឺស្ថិតនៅត្រង់ថា តើក្រុមឧទ្ទាមបដិវត្តន៍ជាតិបរិសាន្ត ដែលមកចរចាជាមួយអាជ្ញាធរថៃនេះ តំណាងឲ្យអ្នកណាពិតប្រាកដ? តើក្រុមនេះមានអំណាចគ្រប់គ្រងលើក្រុមសកម្មជនអ៊ីស្លាមបានប៉ុណ្ណា?
បើតាមការសង្កេតមើលទៅ ក្រុមដែលមកចរចាជាមួយរដ្ឋាភិបាលថៃនៅពេលនេះ មិនមែនជាអ្នកតំណាងរួមរបស់ក្រុមបោះបោរអ៊ីស្លាមនៅប៉ែកខាងត្បូងនោះទេ ហើយក៏មិនមានអំណាច ឬឥទ្ធិពលអ្វីប៉ុន្មាន ទៅលើពួកជីហាដថៃនេះដែរ ជាពិសេស ចំពោះក្រុមជីហាដក្មេងៗជំនាន់ក្រោយ ដែលទីភ្នាក់ងារព័ត៌មានរ៉យទ័របានជួបសម្ភាសន៍ កាលពីប៉ុន្មានថ្ងៃមុននេះ បានបញ្ជាក់ច្បាស់ថា ពួកគេមិនគាំទ្រក្រុមបដិវត្តន៍ជាតិបរិសាន្ត ក្នុងការចរចាជាមួយអាជ្ញាធរថៃនៅពេលនេះទេ។
តាមស្ថានភាពជាក់ស្តែងវិញ គេក៏អាចមើលឃើញយ៉ាងច្បាស់ដែរថា ចាប់តាំងពីមានការព្រមព្រៀងចរចាគ្នាមក អំពើហិង្សានៅប៉ែកខាងត្បូងប្រទេសថៃ នៅតែបន្តកើតមានស្ទើរតែរៀងរាល់ថ្ងៃ។ កាលពីថ្ងៃព្រហស្បតិ៍ម្សិលមិញនេះទៀតសោត តែប៉ុន្មានម៉ោងប៉ុណ្ណោះ មុនបើកការចរចានៅម៉ាឡេស៊ី ការវាយប្រហារភេរវកម្មបានកើតមានឡើង នៅខេត្តណារ៉ាធីវ៉ាត់ ដែលបានបណ្តាលឲ្យទាហានថៃ ៣នាក់ ត្រូវស្លាប់។
តំណាងអាជ្ញាធរថៃ ដែលទៅចរចាជាមួយក្រុមឧទ្ទាមអ៊ីស្លាម ម្សិលមិញនេះ បានបញ្ជាក់យ៉ាងច្បាស់ថា អ្វីដែលថៃចង់បានជាជំហានដំបូង គឺទាមទារឲ្យក្រុមឧទ្ទាមអ៊ីស្លាមកាត់បន្ថយអំពើហិង្សា ជាពិសេស បញ្ឈប់ការវាយប្រហារទៅលើជនស៊ីវិល ដើម្បីជាភស្តុតាងបញ្ជាក់ថា ក្រុមបដិវត្តន៍ជាតិបរិសាន្ត ដែលមកចរចាជាមួយអាជ្ញាធរថៃនេះ ពិតជាមានឥទ្ធិពលអាចបញ្ជាទៅលើក្រុមសកម្មជនជីហាដបានមែន។ បើសិនជាអំពើហិង្សាមិនថយចុះទេ អាជ្ញាធរថៃនឹងអស់ជំនឿចិត្ត ហើយការចរចាអាចនឹងត្រូវបរាជ័យ។
បញ្ហាស្មុគស្មាញមួយទៀត នៅក្នុងការចរចានេះ គឺមកពីខាងភាគីថៃ។ គណៈប្រតិភូថៃ ដែលទៅចរចាជាមួយក្រុមឧទ្ទាមអ៊ីស្លាមពេលនេះ គឺចេញពីរដ្ឋាភិបាលស៊ីវិល ដោយគ្មានតំណាងរបស់មន្រ្តីយោធានោះទេ។
ចំណុចសំខាន់ៗ ដែលក្រុមឧទ្ទាមអ៊ីស្លាមទាមទារចង់បាន គឺឲ្យថៃដកកងទ័ពចេញពីខេត្តប៉ែកខាងត្បូងប្រទេស, លើកលែងទោសដល់មនុស្សទាំងអស់ ដែលចូលរួមក្នុងចលនាបះបោរ និងដាក់តំបន់ប៉ែកខាងត្បូងប្រទេសនេះ ជាតំបន់រដ្ឋបាលពិសេស។ បើតាមមើលទៅ ការទាមទារទាំងអស់នេះ ហាក់ដូចជាគ្មានចំណុចណាមួយ ដែលទំនងជាកងទ័ពថៃសុខចិត្តធ្វើតាមនោះទេ ពីព្រោះថា កន្លងមក យើងឃើញថា ជាទូទៅ គឺកងទ័ពថៃ ដែលជាអ្នកប្រកាន់ជំហរតឹងរ៉ឹង មិនចង់ឲ្យមានការធ្វើសម្បទានអ្វីទាំងអស់ ចំពោះក្រុមឧទ្ទាមអ៊ីស្លាម ហើយ ដូចជាយើងដឹងស្រាប់ហើយពីលក្ខណៈពិសេសនៅថៃ រដ្ឋាភិបាលស៊ីវិលមិនសូវជាមានអំណាចបញ្ជាទៅលើកងទ័ពនោះទេ។
ដូច្នេះ បើនិយាយសរុបជារួមមកវិញ ការចរចារវាងអាជ្ញាធរថៃ និងក្រុមឧទ្ទាមអ៊ីស្លាមចាប់ផ្តើមបើកធ្វើមែន ក៏ប៉ុន្តែ ក្តីរំពឹងថា នឹងទទួលបានជោគជ័យហាក់ដូចជាមិនតិចតួចបំផុត ពីព្រោះថា អ្នកដែលមកជាតំណាងក្នុងការចរចានេះ សុទ្ធតែជាអ្នកដែលមិនសូវមានអំណាចពេញលេញ ក្នុងការធ្វើសេចក្តីសម្រេចសំខាន់ៗ ដើម្បីឆ្លើយតបទៅតាមការទាមទាររបស់ដៃគូចរចា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ