បេក្ខជនតំណាងរាស្ត្រគណបក្សសង្គ្រោះជាតិត្រូវមានលទ្ធភាព សមត្ថភាព ឧមត្តគតិ
បេក្ខជនឈរឈ្មោះតំណាងរាស្រ្តគណបក្សសង្រ្គោះជាតិថ្មីដែលកើតចេញពីគណបក្សសមរង្ស៊ី និងគណបក្សសិទ្ធិមនុស្សត្រូវមានលទ្ធភាព សមត្ថភាព ឆន្ទៈ និងឧត្តមគតិ។ គណបក្សសង្រ្គោះជាតិគ្រោងនឹងធ្វើសមាជរបស់ខ្លួននៅខែមេសាខាងមុខ ដើម្បីបើកផ្លូវអោយអោយលោក កឹម សុខា ប្រធានគណបក្សសិទ្ធិមនុស្សបច្ចុប្បន្នក្លាយទៅជាអនុប្រធានគណបក្សសង្រ្គោះជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ស្លាកគណបក្សសង្គ្រោះជាតិដែលកើតចេញពីគណបក្សសមរង្ស៊ី និងគណបក្សសិទ្ធិមនុស្សត្រូវបានគេដំឡើងក្នុងខេត្តក្រុងចំនួន១៥ហើយរហូតមកដល់ពេលនេះ។ នេះបើយោងតាមការបញ្ជាក់របស់លោក ប៉ុល ហំម អ្នកនាំពាក្យនៃគណបក្សសង្គ្រោះជាតិនៅថ្ងៃសៅរ៍នេះ។ អ្នកនាំពាក្យរូបនេះបានបន្តទៀតថា ការដំឡើងស្លាកគណបក្សថ្មីបាននិងកំពុងបន្តធ្វើឡើងនៅក្នុងគ្រប់ទីកន្លែងដែលមានស្លាកគណបក្សសមរង្ស៊ី និងគណបក្សសិទ្ធិមនុស្សចាស់។ ក្រៅពីការដំឡើងស្លាកគណបក្សសង្រ្គោះជាតិ លោក ប៉ុល ហំមបានបញ្ជាក់ថា គណបក្សសង្គ្រោះជាតិគ្រោងនឹងធ្វើសមាជរបស់ខ្លួននៅថ្ងៃទី៧ ខែមេសាខាងមុននេះ ដើម្បីបើកផ្លូវអោយលោក កឹម សុខា មកធ្វើជាអនុប្រធានគណបក្សសង្រ្គោះជាតិ ដែលប្រធានរបស់គណបក្សគឺលោក សម រង្ស៊ី កំពុងនិរទេសខ្លួននៅក្រៅប្រទេស។
សូមបញ្ជាក់ថា មុនពេលដែលគណបក្សសង្រ្គោះជាតិធ្វើសមាជនៅថ្ងៃទី៧ ខែមេសាខាងមុខ គណបក្សសិទ្ធិមនុស្សត្រូវធ្វើសមាជជាមុនសិននៅថ្ងៃទី៣១ ខែមិនាឆ្នាំ២០១៣ដើម្បីអនុញ្ញតអោយលោក កឹម សុខាអាចចាកចេញពីប្រធានគណបក្សសិទ្ធិមនុស្ស។ រីឯកៅអីប្រធានគណបក្សសិទ្ធិមនុស្សអាចត្រូវគេប្រគល់ទៅលោក សឺន ស៊ូបែរិ៍ ជាកូនបង្កើតរបស់សម្តេចបវរសេដ្ឋាសឺនសាន។
គណបក្សសង្រ្គោះជាតិដែលកើតចេញពីការប្របាច់បញ្ចូលគ្នារវាងគណបក្សសិទ្ធិមនុស្ស និងគណបក្សសមរង្ស៊ីត្រូវបានគេមើលឃើញថា គឺជាគណបក្សប្រឆាំងធំមួយដែលត្រូវប្រកួតប្រជែងនៅខែកក្កដាឆ្នាំ២០១៣ខាងមុខនេះជាមួយគណបក្សប្រជាជនកម្ពុជាដែលកាន់កាប់អំណាចច្រើនអាណត្តិមកហើយនោះ។ លោកប៉ុល ហំម អ្នកនាំពាក្យគណបក្សសង្រ្គោះជាតិបាននិយាយថា គណបក្សថ្មីនេះមិនទាន់បានធ្វើបញ្ជីឈ្មោះសម្រាប់អ្នកឈរតំណាងរាស្ត្រគណបក្សថ្មីនៅឡើយទេ។ ប៉ុន្តែអ្នកឈរឈ្មោះត្រូវមានលក្ខខណ្ឌមួយចំនួន ដូចជា ត្រូវមានលទ្ធភាព សមត្ថភាព ឆន្ទៈ និងឧត្តមគតិ ទាំងសម្រាប់គណបក្ស និងសម្រាប់ជាតិ។
សូមរម្លឹកថា កាលពីអាណត្តិឆ្នាំ២០០៨ ២០១៣ គណបក្សប្រជាជនកម្ពុជាទទួលអាសនៈរដ្ឋសភាជាតិចំនួន ៩០កៅអី គណបក្សសមរង្ស៊ីទទួលបាន ២៦កៅអី គណបក្សហ្វ៊ុនស៊ិនប៉ិចទទួលបាន ២កៅអី និងគណបក្សនរោត្តមរណឫទ្ធិទទួលបាន ២កៅអី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ