កម្ពុជាប្រារព្ធខួប៦៣ឆ្នាំ នៃទិវាបុណ្យឯករាជ្យជាតិរយៈពេល ៣ថ្ងៃ
ថ្ងៃទី៩ វិច្ឆិកា១៩៥៣-៩ វិច្ឆិកា២០១៦នេះ គឺជាខួប៦៣ឆ្នាំ នៃទិវាបុណ្យឯករាជ្យជាតិរបស់កម្ពុជា។ នៅថ្ងៃនេះ ប្រជាពលរដ្ឋ សិស្សនិស្សិត និងមន្រ្តីរាជការទាំងអស់ ត្រូវបានអនុញ្ញាតឲ្យឈប់សម្រាកមួយថ្ងៃ ដើម្បីចូលរួមប្រារព្ធទិវានេះនៅទូទាំងប្រទេស។ នៅទីក្រុងភ្នំពេញ ពិធីត្រូវបានប្រារព្ធធ្វើជាផ្លូវការនៅឯវិមានឯករាជ្យ ក្រោមព្រះរាជាធិបតីភាពរបស់ព្រះមហាក្សត្រកម្ពុជា។ ពិធីបុណ្យឯករាជ្យជាតិ ៩វិច្ឆិកាត្រូវបានប្រារព្ធធ្វើឡើងរយៈពេល ៣ថ្ងៃ។
ចុះផ្សាយនៅថ្ងៃ៖
បុណ្យឯករាជ្យជាតិ ៩វិច្ឆិកា ១៩៥៣ ត្រូវបានប្រជាពលរដ្ឋកម្ពុជាប្រារព្ធធ្វើឡើងជារៀងរាល់ឆ្នាំដើម្បីរំលឹកទៅដល់ថ្ងៃដែលកម្ពុជាទទួលបានឯករាជ្យភាពពេញបរិបូណ៌ពីអាណានិគមនិយមបារាំងនៅថ្ងៃទី ៩វិច្ឆិកា ឆ្នាំ១៩៥៣ ក្រោមព្រះរាជបូនីយកិច្ចរបស់សម្តេចព្រះនរោត្តម សីហនុ អតីតព្រះមហាក្សត្រកម្ពុជា។ ដូចរាល់ឆ្នាំដែរ ពិធីបុណ្យឯករាជ្យជាតិខួប ៦៣ឆ្នាំនៅឆ្នាំ២០១៦នេះ ត្រូវបានប្រារព្ធធ្វើឡើងយ៉ាងមហោឡាប្ញក ក្រោមព្រះរាជាធិបតីភាពដ៏ខ្ពង់ខ្ពស់របស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។ ព្រះអង្គបានយាងប្រទានភ្លើងជ័យ ដើម្បីជានិមិត្តរូបនៃការចាប់ផ្តើមថ្ងៃដំបូងនៃព្រះរាជពិធីបុណ្យឯករាជ្យជាតិ ដែលមានរយៈពេល ៣ថ្ងៃ ចាប់ពីថ្ងៃទី ៩វិច្ឆិកា ដល់ថ្ងៃទី ១១វិច្ឆិកាឆ្នាំ២០១៦។
ដូចរាល់ដងដែរ ពិធីបុណ្យឯករាជ្យជាតិឆ្នាំនេះ មានការបង្ហោះប៉េងប៉ោង ពិធីដាក់កម្រងផ្កា និងការប្រទានភ្លើងជ័យដោយព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី និងការយាងសួរសុខទុក្ខ និងសំណេះសំណាលជាមួយប្រជាពលរដ្ឋ សិស្ស និស្សិត មន្រ្តីរាជការ និងកងកម្លាំងប្រដាប់អាវុធរាប់ពាន់នាក់។
សូមបញ្ជាក់ថា ក្នុងចំណោមអ្នកមុខអ្នកការ ដែលចូលរួមនៅក្នុងទិវាបុណ្យឯករាជ្យជាតិឆ្នាំនេះ មានស្ថាប័នចូលរួមចំនួន ៥៤ស្ថាប័ន ក្នុងនោះក៏មានឥស្សរជនជាន់ខ្ពស់មកពីគណបក្សកាន់អំណាច និងគណបក្សប្រឆាំងចូលរួមផងដែរ រួមមានលោកនាយករដ្ឋមន្រ្តីហ៊ុន សែន, លោក ហេង សំរិន ប្រធានរដ្ឋសភា, សម្តេចចៅហ្វាវំាង គង់ សំអុល ឧបនាយករដ្ឋមន្រ្តី រដ្ឋមន្រ្តីក្រសួងព្រះបរមរាជវាំង, លោក ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ, លោក ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ រួមទាំងមន្រ្តីរាជការ សមាជិករាជរដ្ឋាភិបាល ព្រឹទ្ធសភា រដ្ឋសភា ព្រះសង្ឃ និងប្រជាពលរដ្ឋរាប់ពាន់នាក់។ នៅក្នុងពិធីកាលពីព្រឹកមិញ ក៏មានវត្តមានរបស់ក្រុមសមាជិករដ្ឋសភាមកពីគណបក្សប្រឆាំងចូលរួមដែរ ប៉ុន្តែមិនមានវត្តមានរបស់លោក កឹម សុខា ដែលកំពុងលាក់ខ្លួននៅទីស្នាក់ការគណបក្ស និងលោក សម រង្ស៊ី ប្រធានគណបក្សប្រឆាំង ដែលកំពុងនិរទេសខ្លួននៅក្រៅប្រទេសនោះទេ។
បន្ទាប់ពីបានចូលរួមអបអរសាទរខួបទី ៦៣ឆ្នាំ នៃទិវាបុណ្យឯករាជ្យជាតិ ៩វិច្ឆិកា ១៩៥៣-៩វិច្ឆិកា ២០១៦នេះ លោកនាយករដ្ឋមន្រ្តី ហ៊ុន សែន បានសរសេរសារនៅលើទំព័រហ្វេសបុកផ្លូវការរបស់លោកថា “បើគ្មានការតស៊ូទាមទារឯករាជ្យពីព្រះបិតា អតីតព្រះមហាក្សត្រខ្មែរ សម្តេចព្រះ នរោត្តម សីហនុ ពីអាណានិគមបារាំងបានទេ កម្ពុជានឹងគ្មានឯករាជ្យឡើយ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ