កិច្ចព្រមព្រៀងសេដ្ឋកិច្ចនិងពាណិជ្ជកម្មរវាងកាណាដានិងអឺរ៉ុបជួបបរាជ័យ
ចុះផ្សាយនៅថ្ងៃ៖
ស្តាប់ - ០៤:៥៨
ថ្ងៃសុក្រម្សិលមិញ រដ្ឋមន្ត្រីពាណិជ្ជកម្មកាណាដា លោកស្រីគ្រីស្ទៀ ហ្វ្រីឡិន Chrystia Freeland បានសម្រេចចិត្តប្រកាសនូវបរាជ័យនៃកិច្ចព្រមព្រៀងសេដ្ឋកិច្ចនិងពាណិជ្ជកម្មរវាងកាណាដា និងសហភាពអឺរ៉ុប ដែលហៅកាត់ថា CETA។ មូលហេតុនៃបរាជ័យ គឺដោយសារសភាតំបន់វ៉ាឡូនី Wallonie ភាគខាងត្បូងបែលហ្ស៊ិកបានជំទាស់នឹងកិច្ចព្រមព្រៀងនេះ។
ប៉ុន្មានសប្តាហ៍មុននេះ គេមិនបានស្មានដល់ទេថា កិច្ចព្រមព្រៀងនេះអាចបរាជ័យ គេរឹតតែមិនស្មានដល់ទៀតថា គឺភាគីកាណាដាខ្លួនឯងជាអ្នកប្រកាសនូវការបរាជ័យនេះ។ ខាងកាណាដាសង្ឃឹមថា អាចនឹងមានការចរចាគ្នាឡើងវិញ។
សភាតំបន់វ៉ាឡូនី របស់បែលហ្ស៊ីក ជាប្រភពរាំងស្ទះដល់CETA
ដោយសារតែសភាតំបន់វ៉ាឡូនី ភាគខាងត្បូងបែលហ្ស៊ិក ជំទាស់កិច្ចព្រមព្រៀង សេដ្ឋកិច្ចនិងពាណិជ្ជកម្មរវាងកាណាដា និងអឺរ៉ុប ប្រទេសបែលហ្ស៊ិកទាំងមូលមិនអាចនិយាយថា យល់ព្រមទទួលយកកិច្ចព្រមព្រៀងនេះទេ។ នេះហើយជាបញ្ហាស្ថាប័ននយោបាយផ្ទៃក្នុងរបស់បែលហ្ស៊ិក។
ទាក់ទងប្រព័ន្ធសហព័ន្ធនៅបែលហ្ស៊ិក បើសិនសភាមួយ ក្នុងចំណោមសភាតំបន់ទាំង៣ ជំទាស់សន្ធិសញ្ញាអ្វីមួយ នោះសន្ធិសញ្ញានោះមិនអាចដំណើរការបានទេ ក្នុងកម្រិតថ្នាក់ជាតិ។ ដោយសារនយោបាយបែលហ្ស៊ិកនេះ ប្រទេសសហភាពអឺរ៉ុបផ្សេងៗ ដែលយល់ព្រមទទួលយកសន្ធិសញ្ញាផ្តោះប្តូរសេរី ជាមួយកាណាដា មិនអាចចុះហត្ថលេខាជាមួយកាណាដាទេ។ ប្រព័ន្ធនយោបាយបែលហ្ស៊ិកបែបនេះ អាចជាគុណវិបត្តិធ្វើអោយអឺរ៉ុបគ្មានសមត្ថភាពដោះស្រាយបញ្ហាផ្សេងៗ ក្នុងឆាកអន្តរជាតិបាន។
រដ្ឋមន្ត្រីពាណិជ្ជកម្មអន្តរជាតិកាណាដា លោកស្រីគ្រីស្ទៀ ហ្វ្រីឡិន ខកចិត្តខ្លាំងណាស់ ម្សិលមិញ ព្រោះខំធ្វើដំណើរមកចរចានៅអឺរ៉ុប មិនស្មានថា បែរជាអាចបរាជ័យដោយសារតែតំបន់វ៉ាឡូនីរបស់បែលហ្ស៊ិកនេះសោះ។ ឥឡូវនេះ អឺរ៉ុបត្រូវប្រឹងប្រែងនិយាយជាមួយលោក ប៉ូល ម៉ាញ៉ែត ជាថ្នាក់ដឹកនាំសភាតំបន់វ៉ាឡូនី របស់បែលហ្ស៊ិក ឡើងវិញ ដើម្បីរកច្រកចេញ។
ប្រធានគណៈកម្មការអឺរ៉ុប លោកហ្សង់ក្លូត យ៉ុងកឺ សង្ឃឹមថា អាចរកច្រកចេញបានឆាប់ៗ។ សភាអឺរ៉ុបប្រាប់ថា ជំនួបកំពូលរវាងកាណាដា និងអឺរ៉ុប ថ្ងៃព្រហស្បតិ៍សប្តាហ៍ក្រោយនេះ នៅតែរក្សាទុកដដែល។ តាមគំរោង បើកិច្ចព្រមព្រៀងចរចាទៅបានជោគជ័យ នាយករដ្ឋមន្ត្រីកាណាដានឹងមានវត្តមាន នៅក្រុងព្រុចសែល ថ្ងៃព្រហស្បតិ៍២៧តុលា នេះក្នុងពេលចុះហត្ថលេខា។
ខ្លឹមសារកិច្ចព្រមព្រៀងសេដ្ឋកិច្ចនិងពាណិជ្ជកម្មរវាងកាណាដា CETA
កិច្ចព្រមព្រៀងពាណិជ្ជកម្ម CETA រវាងកាណាដានិងអឺរ៉ុប មានទិសដៅកាត់បន្ថយសិទ្ធិពន្ធអាករផ្សេងៗ រវាងកាណាដា និងអឺរ៉ុប ដើម្បីបើកអោយមានការផ្តោះប្តូរគ្នាបានទូលំទូលាយ។
ស្របតាមកិច្ចព្រមព្រៀងនេះ ឧទាហរណ៍ខាងផ្នែកកសិកម្ម មួយឆ្នាំៗ កាណាដាអាចនាំចេញសាច់គោគ្មានជាតិអរម៉ូន ទៅអឺរ៉ុប បានជិត៤ម៉ឺន៦ពាន់តោន គឺ១ទ្វេជាជាង១០ដង ប្រៀបនឹងបរិមាណបច្ចុប្បន្ន។ បច្ចុប្បន្ន កាណាដានាំសាច់គោចូលអឺរ៉ុបត្រឹមតែជាង៤ពាន់តោនប៉ុណ្ណោះ។
ខាងសាច់ជ្រូកដូចគ្នាដែរ កាណាដាអាចនាំចេញសាច់ជ្រូក អោយអឺរ៉ុបបានដល់៧ម៉ឺន៥ពាន់តោន គឺមួយទ្វេជាជាង១០ដូចគ្នា។ នេះជាប្រយោជន៍ត្រួសៗ សម្រាប់កាណាដា។ ចំណែកប្រយោជន៍ខាងអឺរ៉ុបវិញ គឺថា កាណាដា បើកទីផ្សារសាធារណៈ៣០ភាគរយ អោយសហគ្រាសអឺរ៉ុប ធ្វើអោយសហគ្រាសអឺរ៉ុបទទួលបានផលចំណេញ១ទ្វេជា៣ដែរ។
CETA មិនបានលើកឡើងពីកិច្ចព្រមព្រៀងអាកាសធាតុក្រុងប៉ារីសCop21ទេ។ តែអឺរ៉ុបប្រាប់ថា CETA មិនបង្កការប៉ះពាល់បរិស្ថានទេ។
ចន្លោះប្រហោងនៃកិច្ចព្រមព្រៀង CETA
ប្រជាជនអឺរ៉ុប៥០០លាននាក់ ត្រូវការការធានាអះអាងត្រឹមត្រូវ នូវអត្ថប្រយោជន៍នៃការផ្តោះប្តូរពាណិជ្ជកម្មជាមួយកាណាដា។ គេមើលឃើញថា កិច្ចព្រមព្រៀង CETA នៅមានចន្លោះប្រហោងខ្លះនៅឡើយ។ ឧទាហរណ៍ កិច្ចព្រមព្រៀងមាន១៥០០ទំព័រ តែក្នុងចំណោម១៥០០ទំព័រនេះ មានតែ១៣ទំព័រទេ ដែលចែងពីការអភិវឌ្ឍន៍រយៈពេលយូរអង្វែង។ ក្រុមការពារបរិស្ថានខ្លះ ដូចជានៅបារាំង សង្ស័យថា វាអាចប៉ះពាល់បរិស្ថាន។
ជាមួយកិច្ចព្រមព្រៀងនេះ យើងឃើញថា កាណាដានាំចូលផលិតផលកសិកម្មសន្ធឹកសន្ធាប់មកអឺរ៉ុប។ អញ្ចឹងចង់មិនចង់ វាអាចប៉ះពាល់ដល់ការផលិត ប៉ះពាល់ផ្នែកកសិកម្មរបស់អឺរ៉ុប។ មើលទៅ កាណាដាដូចជាចំណេញលើអឺរ៉ុបទៅវិញទេ។ មួយវិញទៀត គេនៅសង្ស័យថា ផលិតផលយីហោផ្សេងៗ ដូចជា ផលិតផលធ្វើពីទឹកដោះបារាំង ដែលយើងហៅថា Chhese ជាភាសាអង់គ្លេសនោះ អាចនឹងត្រូវគេលួចយកទៅចម្លងនៅកាណាដាបាន បើទោះជាកិច្ចព្រមព្រៀង CETA ហាមឃាត់ការលួចចម្លងក្តី។
បញ្ហាជាក់ស្តែងមួយទៀត គឺផលិតផលអាហារ ផលិតដោយសហគ្រាសផ្សេងៗ ដែលនាំចូលមកអឺរ៉ុប។ ប្រជាជនអឺរ៉ុបនៅសង្ស៍យថា ដោយសារតែវាជាផលិតផលសហគ្រាស ដូច្នេះ វាអាច មានលាយជាតិគីមី ប៉ះពាល់សុខភាព។
បទពិសោធន៍មិនល្អមួយទៀតដែរ គឺថា កាណាដាធ្លាប់មានបញ្ហាក្នុងសន្ធិសញ្ញាផ្តោះប្តូរជាមួយសហរដ្ឋអាមេរិក។ ប៉ុន្មានឆ្នាំមុននេះ លោកអូបាម៉ាបានជំទាស់នឹងការសាងសង់បំពង់បង្ហូរខ្សាច់ នាំមកពីកាណាដា។ ដោយសារផ្អែកលើសន្ធិសញ្ញានេះ ក្រុមហ៊ុនកាណាដា ដែលទទួលបន្ទុកសាងសង់បំពង់បង្ហូរដីខ្សាច់នេះ បានទាមទារអោយអាមេរិកសងលុយ១៥ពាន់លានដុល្លារ គឺច្រើនណាស់។ អឺរ៉ុបមិនចង់មានបទពិសោធន៍បែបនេះ ជាមួយកាណាដាទេ។
អ្វីដែលបានលើកឡើងខាងលើ គឺសុទ្ធតែជាបញ្ហាដែលធ្វើអោយប្រជាជនអឺរ៉ុប ពិសេសក្រុមប្រឆាំង រឺក៏ក្រុមការពារបរិស្ថានផ្សេងៗ នៅមិនទាន់ទុកចិត្តសន្ធិសញ្ញាផ្តោះប្តូរជាមួយកាណាដានៅឡើយ។ ទោះយ៉ាងណាក៏ដោយ ក៏គេនៅសង្ឃឹមថា អឺរ៉ុបនឹងចរចាជាមួយកាណាដាឡើងវិញ ដើម្បីអោយកិច្ចព្រមព្រៀងនេះ សម្រេចឡើងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ