ទស្សនកិច្ចមួយជុំតំបន់មជ្ឈិមបូព៌ារបស់លោកប្រមុខការពារជាតិអាមេរិកឆាក់ ហាហ្គែល
ចុះផ្សាយនៅថ្ងៃ៖
ស្តាប់ - ០៤:៣៥
លោករដ្ឋមន្រ្តីក្រសួងការពារជាតិអាមេរិកឆាក់ ហាហ្គែល (Chuck Hagel) បានផ្តើមដំណើរទស្សនកិច្ចមួយជុំតំបន់ដើមបូព៌ា ដោយធ្វើដំណើរទៅកាន់ប្រទេសអារ៉ាប៊ីសាអូឌីត ហ៊្សកដានី និងប្រទេសអ៊ីស្រាអែល។ សំណុំរឿងនុយក្លេអ៊ែរអ៊ីរ៉ង់ និងសង្រ្គាមស៊ីវិលក្នុងប្រទេសស៊ីរី គឺជាប្រធានរឿងសំខាន់ដែលបណ្តាប្រទេសក្នុងតំបន់កំពុងព្រួយបារម្ភខ្លំាង និងដែលអាមេរិកត្រូវតែធានាដល់សម្ព័ន្ធរបស់ខ្លួន។
ខុសពីដំណើរទស្សនកិច្ចរបស់លោកប្រមុខការទូតអាមេរិកចន ឃ៊ែរីនៅក្នុងតំបន់ដែលមានគោលដៅស្វែងរកសន្តិភាពឲ្យប៉ាឡេស្ទីន និងអ៊ីស្រាអែល ដំណើរទស្សនកិច្ចរបស់លោកប្រមុខការពារជាតិអាមេរិកឆាក់ ហាហ្គែលមានកម្មវត្ថុធានាដល់សម្ព័ន្ធមិត្តរបស់អាមេរិកដែលកំពុងព្រួយបារម្ភខ្លំាងចំពោះសំណុំរឿងនុយក្លេអ៊ែរអ៊ីរ៉ង់ និងស្ថានការណ៍សង្រ្គាមស៊ីវិលនៅក្នុងប្រទេសស៊ីរី។ មានប្រទេសសម្ព័ន្ធមិត្តរបស់អាមេរិកចំនួន ៣ ដែលលោកឆាក់ ហាហ្គែលទៅបំពេញទស្សនកិច្ច គឺអារ៉ាប៊ីសាអូឌីត ហ្សកដានី និងប្រទេសអ៊ីស្រាអែល។ នៅក្នុងទីក្រុងយេដដាក្នុងប្រទេសអារ៉ាប៊ីសាអូឌីត លោកប្រមុខការពារជាតិអាមេរិកចូលរួមនៅក្នុងកិច្ចប្រជុំថ្នាក់រដ្ឋមន្រ្តីការពារជាតិនៃបណ្តាប្រទេសនៅក្នុងក្រុមប្រឹក្សានៃកិច្ចសហប្រតិបត្តិការឈូងសមុទ្រពែរ្សដែលមានសមាជិក ៦ប្រទេសគឺ អារ៉ាប៊ីសាអូឌីត កូវ៉ែត អូម៉ង់ កាតា បារ៉ែន និងអេមីរ៉ាតអារ៉ាប់រួម។
ប្រធានបទនៃការខ្វែងគំនិតគ្នាមានច្រើនរាប់មិនអស់រវាងអាមេរិក និងរាជាណាចក្រអារ៉ាប់អ្នកកាន់សាសនាអ៊ីកាយស៊ុយនីតនៅឈូងសមុទ្រពែរ្ស ពិសេសទាក់ទងនឹងបញ្ហានុយក្លេអ៊ែរអ៊ីរ៉ង់ សង្រ្គាមស៊ីវិលនៅស៊ីរី និងស្ថានការណ៍ស្រពិចស្រពិលនៅក្នុងប្រទេសអេហ្ស៊ីប។ អ្វីដែលសមាជិកនៃក្រុមប្រឹក្សាសហប្រតិបត្តិការឈូងសមុទ្រពែរ្សកំពុងបារម្ភខ្លំាងនោះ គឺផលវិបាកកើតចេញពីកិច្ចព្រមព្រៀងបឋមរវាងអ៊ីរ៉ង់ និងក្រុមប្រទេសលោកខាងលិចចុះហត្ថលេខាកាលពីខែវិច្ឆិកា ឆ្នំា ២០១៣។ កិច្ចព្រមព្រៀងដែលបស្ចិមលោកត្រៀមដោះដូរជាមួយអ៊ីរ៉ង់រវាងការរំសាយកម្មវិធីនុយក្លេអ៊ែរ ជាថ្នូរនឹងការបន្ធូរបន្ធយទ័ណ្ឌកម្មលើប្រទេសអ៊ីរ៉ង់។ ចូរកុំភ្លេចថា ក្រៅពីចំណោទជុំវិញរឿងនុយក្លេអ៊ែរអ៊ីរ៉ង រាជាណាចក្រអារ៉ាប់នៅឈូងសមុទ្រពែរ្សក៏កំពុងខ្វាយខ្វល់ពីឥទ្ធិពលរបស់អ្នកកាន់សាសនាអ៊ីស្លាមនិកាយឈីអ៊ីតដែលជាសត្រូវរបស់ខ្លួនមានភាគច្រើននៅអ៊ីរ៉ង់។
ទាក់ទងនឹងប្រទេសស៊ីរី រដ្ឋបាលអាមេរិកំាងបានទទួលរងការរិះគន់ ទិតៀនខ្លំាងពីបណ្តាប្រទេសអារ៉ាប់នៅក្នុងឈូងសមុទ្រពែរ្ស ពីបទរារែក អល់អែកក្នុងការជួយគំាទ្រក្រុមប្រឆំាងរដ្ឋាភិបាលស៊ីរី។ តែទន្ទឹមគ្នានេះ ទីក្រុងវ៉ាស៊ីនតោនក៏មិននឹងញញើតនឹងចោទបណ្តាប្រទេសអារ៉ាប់ទំាងនោះវិញថា បានជួយគំាទ្រទំាងផ្នែកស្មារតី និងសម្ភារៈចំពោះក្រុមប្រឆំាងរដ្ឋាភិបាលស៊ីរីមួយចំនួនដែលជាក្រុមជ្រុលនិយម មានចំណងទាក់ទងនឹងអង្គការភេរវនិយម។ ទំាងនេះ សុទ្ធសឹងជាសង្រ្គាមពាក្យសម្តីដែលលោកឆាក់ ហាហ្គែលគ្មានជម្រើសអ្វីក្រៅពីពន្យល់បំភ្លឺ និងធានាចំពោះសម្ព័ន្ធមិត្តរបស់អាមេរិកឡើយ។ បើពុំនោះសោតទេ ភាពមិនទុកចិត្តគ្នានឹងកាន់តែមានខ្លំាងឡើងជាមិនខាន។
យ៉ាងណាក៏ដោយ នេះគ្រាន់តែជាបញ្ហាមួយជ្រុងតូចប៉ុណ្ណោះ ព្រោះកម្មវត្ថុសំខាន់របស់លោកប្រមុខការពារជាតិអាមេរិក គឺពង្រឹងបន្ថែមនូវកិច្ចសហប្រតិបត្តិជាមួយប្រទេសសមាជិកនៃក្រុមប្រឹក្សាសហប្រតិបត្តិការឈូងសមុទ្រពែរ្សនៅក្នុងផ្នែកប្រព័ន្ធការពារផ្លូវអាកាស ប្រព័ន្ធមីស៊ីលប្រឆំាងមីស៊ីល សន្តិសុខផ្លូវសមុទ្រ និងសន្តិសុខអ៊ីនធឺណែត។ ក្នុងរយៈពេលប៉ុន្មានឆ្នំាចុងក្រោយនេះ អាមេរិកបានលក់ទៅឲ្យបណ្តាប្រទេសក្នុងតំបន់ឈូងសមុទ្រពែរ្សទំាងនោះនូវគ្រឿងបរិក្ខារយោធា និងប្រព័ន្ធមីស៊ីលប្រឆំាងមីស៊ីលជាច្រើនទុកសម្រាប់ប្រឈមទប់នឹងការបាញ់ផ្លោងគ្រាប់មីស៊ីលជាយថាហេតុណាមួយពីប្រទេសអ៊ីរ៉ង់។ តែអ្វីដែលលោកឆាក់ ហាហ្គែលចង់បាននោះ គឺការកម្ម៉ង់ទិញបញ្ចូលគ្នារបស់ប្រទេសទំាងនោះតាមរយៈក្រុមប្រឹក្សានៃកិច្ចសហប្រតិបត្តិការនៅឈូងសមុទ្រពែរ្ស។
ក៏ប៉ុន្តែ ការខិតខំប្រឹងប្រែងរបស់លោកឆាក់ ហាហ្គែលអាចនឹងពើបប្រទះនឹងការបែកបាក់ផ្ទៃក្នុងរបស់ក្រុមប្រឹក្សានៃកិច្ចសហប្រតិបត្តិការនៅឈូងសមុទ្រពែរ្ស។ ការប្រេះឆាផ្ទៃក្នុងដែលបានបង្កឡើងដោយប្រទេសអារ៉ាប៊ីសាអូឌីត អេមីរ៉ាអារ៉ាប់រួម និងប្រទេសបារ៉ែនប្រឆំាងនឹងប្រទេសកាតា។ ប្រទេសទំាង ៣ បានចោទប្រទេសកាតាពីបទបានគំាទ្រពួកអ៊ីស្លាមនិយមជ្រុលដែលស្និតនឹងពួកភាតរអ៊ីស្លាមនៅក្នុងប្រទេសមួយចំនួនក្នុងតំបន់ឈូងសមុទ្រពែរ្ស ដោយរាប់បញ្ចូលទំាងពួកភាតរអ៊ីស្លាមនៅក្នុងប្រទេសអេហ្ស៊ីបផងដែរ។ ទង្វើរបស់ប្រទេសកាតារបៀបនេះ គឺផ្ទុយទំាងស្រុងនឹងប្រទេសអារ៉ាប៊ីសាអូឌីត អេមីរ៉ាអារ៉ាប់រួម និងប្រទេសបារ៉ែនដែលគំាទ្រកងទ័ពអេហ្ស៊ីប។
បន្ទាប់ពីប្រទេសអារ៉ាប៊ីសាអូឌីត លោករដ្ឋមន្រ្តីការពារជាតិអាមេរិកឆាក់ ហាហ្គែលបន្តដំណើរទៅកាន់ប្រទេសហ៊្សកដានីដើម្បីជជែកពីស្ថានការណ៍សង្រ្គាមស៊ីវិលនៅក្នុងប្រទេសស៊ីរី។ បន្ទាប់មក លោកឆាក់ ហាហ្គែលក៏លើកឡើងអំពីកិច្ចសន្យារបស់អាមេរិកក្នុងការជួយការពារប្រទេសហ៊្សកដានីដែលកំពុងមានវត្តមានទាហានអាមេរិកំាងជាង ១ ០០០នាក់នៅទីនោះ។ ប្រទេសទស្សនកិច្ចចុងក្រោយ គឺអ៊ីស្រាអែល។ អ៊ីស្រាអែលដែលជាសម្ព័ន្ធមិត្តចាក់ទឹកមិនលេចរបស់អាមេរិក និងដែលលោកប្រមុខការពារជាតិអាមេរិកត្រូវឆ្លើយពន្យល់បំភ្លឺអ៊ីស្រាអែលចំពោះក្តីបារម្ភរបស់ទីក្រុងហ៊្សេរុយសាឡិមទាក់ទងនឹងជំហរអាមេរិកក្នុងសំណុំរឿងនុយក្លេអ៊ែរអ៊ីរ៉ង់។ ទំាងនេះមិនភ្លេចនិយាយពីសន្តិសុខក្នុងតំបន់ និងកិច្ចសហប្រតិបត្តិការរវាងអាមេរិក និងអ៊ីស្រាអែលទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ