ចិនទាមទារឲ្យវៀតណាមស៊ើបអង្កេតរឿងសរសរពាក្យជេរលើលិខិតឆ្លងដែនចិន
អាជ្ញាធរចិនបានធ្វើការទាមទារជាផ្លូវការ កាលពីថ្ងៃសុក្រម្សិលមិញ ឲ្យវៀតណាមបើកការស៊ើបអង្កេតទៅលើករណីមន្រ្តីវៀតណាមសរសេរពាក្យជេរ នៅលើលិខិតឆ្លងដែនពលរដ្ឋចិន ហើយដែលទំនងជាមានជាប់ពាក់ព័ន្ធទៅនឹងជម្លោះនៅសមុទ្រចិនខាងត្បូង។ រូបភាពនៃទំព័រលិខិតឆ្លងដែននេះ ត្រូវបានគេចុះផ្សាយតាមប្រព័ន្ធអ៊ីនធ័រនែត និងបណ្តាញសង្គម និងបានក្លាយជាប្រធានបទនៃការជជែកដេញដោលគ្នាយ៉ាងផុសផុល នៅក្នុងរយៈពេលប៉ុន្មានថ្ងៃចុងក្រោយនេះ។
ចុះផ្សាយនៅថ្ងៃ៖
ស្តាប់ - ០១:៤៤
យោងតាមសេចក្តីថ្លែងការណ៍ចុះផ្សាយនៅលើវិបសៃត៍របស់ស្ថានកុងស៊ុលចិនប្រចាំទីក្រុងហូជីមិញ ពលរដ្ឋចិនម្នាក់ឈ្មោះ ហ្សុង (Zhong) បានធ្វើដំណើរចូលទៅក្នុងប្រទេសវៀតណាម កាលពីថ្ងៃទី២៣កក្កដា ហើយក្រោយពីបានឆ្លងកាត់ការត្រួតពិនិត្យរបស់មន្រ្តីអន្តោប្រវេសន៍នៅច្រកព្រលានយន្តហោះអន្តរជាតិក្រុងហូជីមិញ ពលរដ្ឋចិនរូបនេះបានឃើញពាក្យជេរជាភាសាអង់គ្លេសថា « Fuck You » ត្រូវបានសរសេរនៅលើលិខិតឆ្លងដែនរបស់ខ្លួន គឺនៅពីលើរូបភាពផែនទីចិន ដែលមានខ្សែព្រំដែនគូសវាតយកតំបន់សមុទ្រចិនខាងត្បូង។
អគ្គកុងស៊ុលចិនបានចាត់ទុកការសរសេរពាក្យជេរនេះថាជា “ទង្វើកំសាកគួរឲ្យខ្មាស់អៀន” ហើយបានទាមទារឲ្យអាជ្ញាធរវៀតណាមបើកការស៊ើបអង្កេតឲ្យបានម៉ត់ចត់ ដើម្បីស្វែងរកមុខ និងដាក់ទោសមន្រ្តីដែលប្រព្រឹត្តទង្វើនេះ។
យោងតាមការអះអាងរបស់ចិន អាជ្ញាធរវៀតណាមបានឆ្លើយតបជាវិជ្ជមាន ហើយសន្យាថានឹងស៊ើបអង្កេតលើរឿងនេះ។ ក៏ប៉ុន្តែ មន្រ្តីវៀតណាមវិញបានបដិសេធមិនធ្វើអត្ថាធិប្បាយអ្វីទាំងអស់ជុំវិញរឿងនេះ។
គួរបញ្ជាក់ថា ខ្សែបន្ទាត់ព្រំដែនសមុទ្រចិនខាងត្បូង ដែលចិនផ្តិតលើទំព័រលិខិតឆ្លងដែន ហើយដែលត្រូវបានគេសរសេរពាក្យជេរពីលើនេះ បង្ហាញពីការវាតយកតំបន់សមុទ្រចិនខាងត្បូងស្ទើរតែទាំងស្រុង ហើយខ្សែបន្ទាត់ព្រំដែននេះទើបនឹងត្រូវបានតុលាការអាជ្ញាកណ្តាលអន្តរជាតិក្រុងឡាអេប្រកាសចាត់ទុកថាជាព្រំដែនខុសច្បាប់។
បញ្ហាចម្រូងចម្រាសជុំវិញការសរសេរពាក្យជេរលើលិខិតឆ្លងដែននេះ គឺជាការបង្ហាញឲ្យឃើញកាន់តែច្បាស់ ពីភាពជាសត្រូវ ដែលកំពុងតែកើតមានឡើងកាន់តែខ្លាំងឡើង រវាងចិន និងវៀតណាម ដោយសារតែជម្លោះនៅសមុទ្រចិនខាងត្បូង។
បន្ថែមពីរឿងនេះទៀត កាលពីល្ងាចថ្ងៃសុក្រ បណ្តាញផ្សព្វផ្សាយព័ត៌មានផ្លូវការរបស់វៀតណាមបានចុះផ្សាយឲ្យដឹងថា អេក្រង់ព័ត៌មាននៅឯព្រលានយន្តហោះអន្តរជាតិក្រុងហូជីមិញ ត្រូវទទួលរងនូវការវាយប្រហារតាមប្រព័ន្ធអ៊ីនធ័រនែត ហើយព័ត៌មានពីជើងហោះហើរត្រូវបានជំនួសមកវិញដោយពាក្យស្លោករិះគន់វៀតណាម និងហ្វីលីពីន ទាក់ទងនឹងជម្លោះនៅសមុទ្រចិនខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ