វិបត្តិនៅស៊ូដង់ខាងត្បូងជាតេស្តសម្រាប់នយោបាយមិនជ្រៀតជ្រែកកិច្ចការផ្ទៃក្នុងរបស់ចិន
ចុះផ្សាយនៅថ្ងៃ៖
ស្តាប់ - ០៤:០១
កាលពីថ្ងៃចន្ទដើមសប្តាហ៍នេះ រដ្ឋមន្រ្តីក្រសួងការបរទេសចិនបានថ្លែងជាសាធារណៈ ដោយសម្តែងនូវក្តីព្រួយបារម្ភ អំពីជម្លោះប្រដាប់អាវុធ នៅក្នុងប្រទេសស៊ូដង់ខាងត្បូង ហើយព្រមទាំងបានជំរុញឲ្យភាគីជម្លោះបញ្ឈប់អំពើហិង្សា ហើយដោះស្រាយបញ្ហាដោយការចរចា។ ការអំពាវនាវបែបនេះគឺជារឿងដ៏កម្រមួយ សម្រាប់ចិន ដែលតែងតែប្រកាន់យកនូវនយោបាយមិនជ្រៀតជ្រែកកិច្ចការផ្ទៃក្នុងប្រទេសដទៃ។
ជម្លោះប្រដាប់អាវុធ នៅក្នុងប្រទេសស៊ូដង់ខាងត្បូង នៅក្នុងពេលបច្ចុប្បន្ននេះ កំពុងតែបង្កនូវក្តីព្រួយបារម្ភចំពោះរដ្ឋាភិបាលជាច្រើន នៅទូទាំងពិភពលោក។ ក្នុងនោះក៏មានរដ្ឋាភិបាលក្រុងប៉េកាំងផងដែរ។
កាលពីចុងសប្តាហ៍មុន នៅពេលដែលភាគីជម្លោះស៊ូដង់ខាងត្បូងជួបចរចាគ្នា នៅក្នុងប្រទេសអេត្យូពី ចិនក៏បានបញ្ជូនរដ្ឋមន្រ្តីក្រសួងការបរទេសរបស់ខ្លួនឲ្យទៅកាន់ទីនោះដែរ។ លោកវ៉ាង អ៊ី (Wang Yi) បានជួបជជែកជាមួយភាគីជម្លោះទាំងពីរ គឺតំណាងក្រុមឧទ្ទាម និងតំណាងរដ្ឋាភិបាលស៊ូដង់ខាងត្បូង ដើម្បីព្យាយាមជួយសម្របសម្រួលបញ្ចប់ជម្លោះ។
►សូមអាន៖ ហេតុអ្វីបានជាប្រទេសស៊ូដង់ខាងត្បូងកំពុងស្ថិតមាត់ជ្រោះនៃសង្រ្គាមស៊ីវិល?
ក្រោយពីជំនួបនេះ លោកវ៉ាង អ៊ី បានថ្លែងប្រាប់អ្នកសារព័ត៌មានថា “ចិនមានជំហរច្បាស់លាស់ ចំពោះស្ថានភាពនៅស៊ូដង់ខាងត្បូង គឺយើងអំពាវនាវឲ្យភាគីជម្លោះបញ្ឈប់ជាបន្ទាន់នូវអំពើហិង្សា និងការវាយប្រយុទ្ធគ្នា”។
ការអំពាវនាវនេះ គឺជារឿងធម្មតា ប្រសិនបើវាចេញពីប្រទេសណាមួយផ្សេង។ ក៏ប៉ុន្តែ ចេញពីមាត់មន្រ្តីរដ្ឋាភិបាលចិន វាគឺជារឿងដ៏កម្រមួយ ពីព្រោះថា តាំងពីដើមរៀងមក ចិនតែងតែប្រកាន់យ៉ាងខ្ជាប់ខ្ជួននូវនយោបាយមិនជ្រៀតជ្រែកកិច្ចការផ្ទៃក្នុងប្រទេសដទៃ។
នៅក្នុងពេលបច្ចុប្បន្ននេះ ចិនគឺជាដៃគូពាណិជ្ជកម្មដ៏ធំបំផុតរបស់អាហ្វ្រិក។ ក៏ប៉ុន្តែ បើទោះជាយ៉ាងនេះក៏ដោយ មេដឹកនាំរដ្ឋាភិបាលក្រុងប៉េកាំងតែងតែបានប្រកាសជារឿយៗថា ចិនប្រកាន់ខ្ជាប់នូវជំហរអព្យាក្រឹត ដោយមិនជ្រៀតជ្រែកចូលទៅក្នុងកិច្ចការផ្ទៃក្នុងនៃបណ្តាប្រទេសអាហ្វ្រិកនោះទេ។
ម្យ៉ាងទៀត គេនៅចាំបានថា កាលពីឆ្នាំ២០១១ នៅពេលដែលស៊ូដង់ខាងត្បូងទើបនឹងបានផ្តាច់ខ្លួនចេញពីស៊ូដង់ ទៅបង្កើតជារដ្ឋឯករាជ្យ លោកហ៊ូ ជិនតាវ ដែលនៅពេលនោះជាប្រធានាធិបតីចិន បានទទួលស្គាល់រដ្ឋស៊ូដង់ខាងត្បូងភ្លាមៗ ហើយបានផ្ញើសារមួយទៅកាន់មេដឹកនាំស៊ូដង់ខាងត្បូង ដោយសន្យាថា ចិនត្រៀមខ្លួនជាស្រេច ដើម្បីភ្ជាប់ទំនាក់ទំនងជាមិត្តជាមួយគ្នា ដោយប្រកាន់យកនូវគោលការណ៍មិនជ្រៀតជ្រែកកិច្ចការផ្ទៃក្នុងគ្នាទៅវិញទៅមក។
តាមការពិត ចិនតែងតែប្រកាន់យកនូវគោលការណ៍មិនជ្រៀតជ្រែកកិច្ចការផ្ទៃក្នុងប្រទេសដទៃនេះ គឺដោយសារតែចិនចង់ឲ្យប្រទេសដទៃធ្វើដូចខ្លួនដែរ ពោលគឺ មិនត្រូវជ្រៀតជ្រែកចូលក្នុងកិច្ចការផ្ទៃក្នុងរបស់ចិន។
ក៏ប៉ុន្តែ នៅពេលនេះ ចិនគឺជាមហាអំណាចសេដ្ឋកិច្ច ដែលមានផលប្រយោជន៍ជាយុទ្ធសាស្រ្តនៅទូទាំងពិភពលោក។ ក្រុមហ៊ុនចិនបានពង្រីកមុខជំនួញក្រៅប្រទេសរបស់ខ្លួនកាន់តែធំឡើង ពីមួយថ្ងៃ ទៅមួយថ្ងៃ ហើយទុនវិនិយោគរបស់ចិនមាននៅស្ទើរតែគ្រប់ទីកន្លែង នៅទូទាំងពិភពលោក។ ដូច្នេះ គោលការណ៍មិនជ្រៀតជ្រែកកិច្ចការផ្ទៃក្នុងរបស់ចិនអាចដើរបញ្ច្រាសទិសគ្នាជាមួយនឹងការការពារផលប្រយោជន៍ជាតិរបស់ចិន។
វិបត្តិនៅស៊ូដង់ខាងត្បូង គឺជាឧទាហរណ៍ជាក់ស្តែង ដែលអាចបញ្ជាក់ អំពីករណីនេះ។ នៅពេលដែលភាពវឹកវរ នៅក្នុងប្រទេសផ្សេង ដូចជាករណីស៊ូដង់ខាងត្បូងបច្ចុប្បន្ន គំរាមកំហែងដល់ផលប្រយោជន៍ជាយុទ្ធសាស្រ្តរបស់ចិន សំណួរប្រាកដជាត្រូវចោទឡើង សម្រាប់មេដឹកនាំចិន៖ តើគួរនៅបន្តប្រកាន់ខ្ជាប់នូវគោលការណ៍មិនជ្រៀតជ្រែកកិច្ចការផ្ទៃក្នុងប្រទេសដទៃ ហើយបណ្តោយឲ្យបាត់បង់ផលប្រយោជន៍ជាតិរបស់ចិនឬក៏យ៉ាងណា?
►សូមអាន៖ ប្រមុខរដ្ឋស៊ូដង់ខាងត្បូងទៅចិន ចំពេលដែលស៊ូដង់ខាងត្បូងកំពុងមានភាពតានតឹងជាមួយស៊ូដង់ខាងជើង
ស៊ូដង់ខាងត្បូងត្រូវបានគេចាត់ទុកថាជាជង្រុកប្រេងដ៏ធំមួយ នៅក្នុងតំបន់អាហ្វ្រិក ហើយចិន គឺជាប្រទេសដែលបានបោះទុនវិនិយោគច្រើនជាងគេក្នុងវិស័យប្រេងកាតរបស់ស៊ូដង់ខាងត្បូង។ នៅមុនពេលមានជម្លោះប្រដាប់អាវុធ ស៊ូដង់ខាងត្បូងផលិតប្រេងឆៅ ប្រមាណជា ២០ម៉ឺនធុងក្នុងមួយថ្ងៃៗ។ ក៏ប៉ុន្តែ ការវាយប្រយុទ្ធគ្នា រវាងទាហានរដ្ឋាភិបាល និងទាហានឧទ្ទាម ក្នុងរយៈពេល ៣សប្តាហ៍កន្លងទៅនេះ បានធ្វើឲ្យសកម្មភាពបូមប្រេងនៅស៊ូដង់ខាងត្បូងធ្លាក់ចុះមកនៅត្រឹមតែ ៤៥ ០០០ធុងប៉ុណ្ណោះ ក្នុងមួយថ្ងៃ។ ពលរដ្ឋចិន ដែលបម្រើការក្នុងក្រុមហ៊ុនប្រេងចិននៅស៊ូដង់ខាងត្បូង ក៏កំពុងប្រឈមមុខនឹងបញ្ហាសុវត្ថិភាពផ្ទាល់ខ្លួន។
ដូច្នេះ ប្រសិនបើសិនជាចិនមិនធ្វើអ្វីសោះ ហើយបណ្តោយឲ្យជម្លោះប្រដាប់អាវុធ នៅស៊ូដង់ខាងត្បូង រាលដាលទៅជាសង្រ្គាមស៊ីវិលពេញទំហឹង ចិនប្រាកដជានឹងត្រូវប្រឈមមុខនឹងការខាតបង់យ៉ាងច្រើន។ លុយវិនិយោគរបស់ក្រុមហ៊ុនចិនក៏ត្រូវខាតបង់ ពលរដ្ឋចិនដែលធ្វើការក្នុងប្រទេសស៊ូដង់ខាងត្បូងក៏ត្រូវប្រឈមមុខនឹងបញ្ហាសុវត្ថិភាព ហើយប្រភពផ្គត់ផ្គង់ប្រេងដ៏សំខាន់មួយ សម្រាប់សេដ្ឋកិច្ចចិនក៏នឹងត្រូវបាត់បង់។ នេះហើយជាបញ្ហាចោទ ចំពោះនយោបាយមិនជ្រៀតជ្រែកកិច្ចការផ្ទៃក្នុងរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ