ចិនចង់កាត់បន្ថយផ្សែងពុលមួយភាគបួន ក្នុងក្រុងធំៗនៅឆ្នាំ២០១៧
ចាប់ពីពេលនេះដល់ឆ្នាំ២០១៧ ចិននឹងកាត់បន្ថយផ្សែងពុលបរិស្ថាន ឱ្យបានមួយភាគបួន នៃកំរិតពុលបច្ចុប្បន្ន នៅតាមបណ្តាក្រុងធំៗ សំខាន់ៗរបស់ចិន មានជាអាទិ៍ក្រុងប៉េកាំង សៀងហៃ ។ល។ និង។ល។ នេះបើតាមឯកសារផ្លូវការដែលផ្សព្វផ្សាយជាសាធារណៈនៅថ្ងៃព្រហស្បតិ៍ម្សិលមិញ។
ចុះផ្សាយនៅថ្ងៃ៖
ស្តាប់ - ០២:០១
កំរិតផ្សែងពុលក្នុងបរិយាកាស ដែលពោរពេញទៅដោយសារធាតុល្អិតឆ្មារៗ នៅប៉េកាំងនិងតំបន់ជុំវិញ នឹងត្រូវកាត់បន្ថយឱ្យធ្លាក់ទាបជាងឆ្នាំ២០១២ ចំនួន២៥%។ ឯនៅសៀងហៃ ឬ កង់តុង ព្រមទាំងក្រុងធំៗសំខាន់ផ្សេងទៀត ការកាត់បន្ថយត្រូវធ្វើដោយសន្សឹមៗ ពោលគឺបញ្ចុះពី១០ទៅ ២០% នៅឆ្នាំ២០១៧។ នេះជាផែនការដែលក្រុមប្រឹក្សារដ្ឋបានដាក់ចេញ និងផ្សព្វផ្សាយជាសាធារណៈនៅលើទំព័រផ្លូវការរបស់រដ្ឋាភិបាល។
សូមបញ្ជាក់ថា បរិយាកាសពុល នៅតាមទីក្រុងចិន បានកើនឡើងដល់កំរិតកំពូល កាលពីឆ្នាំ២០១២កន្លងទៅ ពោលគឺកំរិតសារធាតុល្អិតឆ្មារៗ PM២,៥ បានឡើងហួសកំរិតអនុញ្ញាតដោយអង្គការសុខភាពពិភពលោកដល់ទៅ៤០ដង នៅទីក្រុងប៉េកាំង។ ខ្យល់ពុល បរិយាកាសលាយលំទៅដោយសារធាតុល្អិតៗ បានបង្កបណ្តាជនរាប់ពាន់នាក់ស្លាប់មុនអាយុ និងប៉ះពាល់ដល់កិត្តិយសក្រុងយ៉ាងខ្លាំង។ ក្នុងរយៈពេល៦ខែដើមឆ្នាំ ចំនួនភ្ញៀវទេសចរបានធ្លាក់ចុះប្រមាណ ១៥%បាន ចំពោះក្រុងប៉េកាំង។
ប្រឈមមុខនឹងផលវិបាកជាក់ស្តែងបែបនេះ រដ្ឋាភិបាលចិនត្រូវបង្ខំចិត្តចាត់វិធានការកាត់បន្ថយការបំពុលបរិស្ថាន ដោយកាត់បន្ថយការប្រើប្រាស់រោងចក្រអគ្គីសនីដើរដោយធ្យូងថ្ម ព្រោះជាប្រភពចម្បងមួយនាំឱ្យមានផ្សែងពុល។ ចិន ជាប់លេខមួយខាងថាមពលធ្យូងថ្ម និងតំណាងឱ្យ៥០%នៃតម្រូវការពិភពលោក។ ថាមពលដើរធ្យូងថ្ម ដែលបើតួលេខអាមេរិក ផ្គត់ផ្គង់ឱ្យប្រមាណ៧០%នៃតម្រូវការក្នុងស្រុកនៅឆ្នាំ២០០៩ នឹងត្រូវទម្លាក់មកត្រឹមតែ៦៥%វិញនៅឆ្នាំ២០១៧។
ថ្វីដ្បិតជាការកាត់បន្ថយបន្តិចម្តងៗក៏ដោយ ក៏វិធានការកំពុងឈានឆ្ពោះទៅរកការគ្រប់គ្រងតម្រូវការធ្យូងថ្មក្នុងពេលឆាប់ៗនេះ។ ប៉ុន្តែដើម្បីឱ្យការកាត់បន្ថយផ្សែងពុលក្នុងបរិស្ថាន កាន់តែមានប្រសិទ្ធិភាព ចាំបាច់ត្រូវតែកាត់បន្ថយការប្រើប្រាស់ធ្យូងថ្ម ក្នុងផ្នែកផ្សេងៗទៀត មិនមែនតែក្នុងវិស័យរោងចក្រអគ្គិសនីដើរដោយធ្យូងថ្មប៉ុណ្ណោះទេ។ នេះតាមការព្រមានរបស់លោកស្រី Li Yan អ្នកទទួលបន្ទុកឃោសនាអាកាសធាតុនិងថាមពលអង្គការGreenpeace ប្រចាំតំបន់អាស៊ីអាគ្នេយ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ