ក្រៅពីនាំចូលអង្ករ១០ម៉ឺនក្នុងមួយឆ្នាំចាប់ពីឆ្នាំ២០១៦ទៅ ចិនក៏ជួយនាំចូលកៅស៊ូពីកម្ពុជាដែរ
ចិនបានសន្យាថានឹងជួយជំរុញការនាំចូលកៅស៊ូពីប្រទេសកម្ពុជា។ ការសន្យានេះត្រូវបានធ្វើឡើងតាមរយៈការចុះអនុសារណៈយោគយល់គ្នា រវាងក្រសួងកសិកម្ម រុក្ខាប្រមាញ់និងនេសាទកម្ពុជា និងក្រសួងកសិកម្មចិន។ លោកកៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានបញ្ជាក់យ៉ាងដូច្នេះ នៅក្នុងសន្និសីទកាសែតមួយ នៅវេលាម៉ោង១២ ថ្ងៃត្រង់ថ្ងៃទី ១៧ តុលានេះ នៅឯអាកាសយានដ្ឋានអន្តរជាតិភ្នំពេញ បន្ទាប់ពីធ្វើដំណើរពីប្រទេសចិនមកដល់កម្ពុជាវិញ។
ចុះផ្សាយនៅថ្ងៃ៖
ស្តាប់ - ០១:២៧
កម្ពុជានិងចិនបានចុះអនុសារណៈយោគយល់គ្នាលើការនាំកៅស៊ូពីកម្ពុជាទៅចិន។ MOU នេះត្រូវបានធ្វើឡើងនៅក្នុងដំណើរទស្សនៈកិច្ចរបស់លោកនាយករដ្ឋមន្ត្រីហ៊ុន សែនរយៈពេល៥ថ្ងៃ នៅក្នុងប្រទេសចិន ចាប់ពីថ្ងៃទី ១២ ដល់ ១៧តុលា។ ក្រៅពីកៅស៊ូ ចិនក៏បានសន្យាថានឹងនាំអង្ករកម្ពុជាចេញទៅកាន់ប្រទេសចិនឲ្យបាន១០ម៉ឺនតោនក្នុងមួយឆ្នាំ ចាប់ពីឆ្នាំ ២០១៦តទៅផងដែរ។
គួរជម្រាបថា រយៈពេលប៉ុន្មានឆ្នាំចុងក្រោយនេះ តម្លៃកៅស៊ូនៅក្នុងប្រទេសកម្ពុជា បានធ្លាក់ចុះជាគំហុក ដែលបណ្តាលឲ្យប្រជាពលរដ្ឋដាំកៅស៊ូជាលក្ខណៈគ្រួសារមួយចំនួនបង្ខំចិត្ត កាប់កៅស៊ូចោល និងដាំដំណាំផ្សេងទៀត ហើយប្រជាពលរដ្ឋមួយចំនួនបានធ្វើចំណាកស្រុក ដោយសារតែតម្លៃកៅស៊ូមិនអាចឲ្យពួកគាត់ដាំបានតទៅទៀត និងបណ្តាលឲ្យមនុស្សមួយចំនួនគ្មានការងារធ្វើ។ហើយបច្ចុប្បន្ននេះ កម្ពុជា មានផ្ទៃដីដាំកៅស៊ូប្រមាណ ៣៥៨,០០០ហិកតា និងការដាំជាលក្ខណៈគ្រួសារមានតែ១៥០,០០០ហិកតា ឬ៤០% នៃផ្ទៃដីដាំកៅស៊ូសរុបប៉ុណ្ណោះ។
កាលពីខែឧសភាកន្លងទៅនេះរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក អ៊ុក រ៉ាប៊ុន បានថ្លែងពីលទ្ធផលនៃកិច្ចប្រជុំរបស់រដ្ឋមន្ត្រីសមាគមបណ្តាប្រទេស ផលិតកៅស៊ូធម្មជាតិ ថាក្រុមបណ្តាប្រទេសផលិតកៅស៊ូធម្មជាតិ និងសម្រេចរៀបចំផែនការយុទ្ធសាស្ត្រថ្មីមួយ ដើម្បីចូលរួមចំណែកក្នុងការពង្រឹងតម្លៃទីផ្សារកៅស៊ូនៅក្នុងតំបន់ ក៏ដូចជានៅក្នុងប្រទេសកម្ពុជាទាំងមូលផងដែរ។ ហើយការសម្រេចនឹងធ្វើឡើងនៅក្នុងកិច្ចប្រជុំ នៅក្នុងខេត្តសៀមរាប នៅខែតុលានេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ