១៥%នៃប្រទេសចិនមានផ្សែងពុលហួសបទដ្ឋានសុវត្ថិភាព
កំរិតផ្សែងពុលក្នុងបរិយាកាសបានគ្របដណ្តប់ផ្ទៃមេឃចិន តាំងពីជាងមួយសប្តាហ៍មក ហើយ បង្កឱ្យមានការព្រួយបារម្ភ និងប្រតិកម្មយ៉ាងផុសផុល តាមប្រព័ន្ធសង្គម។ ពលរដ្ឋចិនម្នាក់បានថែមទាំងហ៊ានដាក់ពាក្យបណ្តឹងទៅតុលាការប្រឆាំងអាជ្ញាធរក្រុងដែលគ្មានចំណាត់ការល្អទប់ទល់នឹងការបញ្ចេញផ្សែងពុល។ ចំណែកលោក ស៊ីជីនពីង ប្រធានាធិបតីល្បីថាស្និទ្ធនឹងរាស្ត្រ ក៏បានចេញដើរតាមផ្លូវក្នុងក្រុងប៉េកាំង ដែលអួរអាប់ទៅដោយផ្សែងពុល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
អាជ្ញាធរចិនបានចេញក្រិត្យ ហាមប្រាមមិនឱ្យប្រជាជនប្រើប្រាស់យានយន្ត ក្នុងករណីមិនចាំបាច់ និងបានណែនាំឱ្យបណ្តាជនគ្រប់រូបពាក់ម៉ាស ឬផ្អាកសកម្មភាពកីឡា ព្រោះដង់ស៊ីតេនៃជាតិពុលក្នុងខ្យល់ បានឡើងដល់កំរិតខ្ពស់ លើសបទដ្ឋានសុវត្ថិភាពអង្គការសុខភាពពិភពលោកដល់ទៅ ១៦ដង។ សារធាតុល្អិតឆ្មារ តូចបំផុតនិងគ្រោះថ្នាក់បំផុតចំពោះសុខភាព កំពុងរសាត់ពេញខ្យល់ មេឃចុះអ័ព្ទ គ្មានពន្លឺព្រះអាទិត្យ តាមផ្លូវអួរអាប់មើលស្ទើរលែងយល់អ្វី ត្រឹមចម្ងាយ១០០ម៉ែត្រពីគ្នាសោះ។
កំរិតខ្យល់ពុលក្នុងបរិយាកាសបានឡើងដល់ថ្នាក់អាសន្នខ្លាំង នារយៈពេលប៉ុន្មានថ្ងៃចុងក្រោយនេះ បានបង្កជាភ័យស្លន់ស្លោ រោងចក្រសហគ្រាសនៅក្រុងប៉េកាំងប្រមាណជាង១៥០ បានផ្អាកដំណើរតាំងពីថ្ងៃអង្គារម្សិលមិញមក។ ជាងនេះទៅទៀត ម៉ាសដែលអាជ្ញាធរណែនាំឱ្យពាក់ ម៉ាស៊ីនកាត់បន្ថយផ្សែងពុល បានលក់ដាច់អស់ គ្មានសល់ពីឃ្លាំងទេ។ គេត្រូវរង់ចាំដល់ខែមេសា ទើបអាចរកផលិតផលម៉ាសដង្ហើម ប្រកបដោយប្រសិទ្ធិភាពបាន។
ដើម្បីរំងាប់ការព្រួយបារម្ភ នៅថ្ងៃអង្គារម្សិលមិញនេះ លោកប្រធានាធិបតី ស៊ីជីនពីង បានរៀបចំចុះជួបសួរសុខទុក្ខពលរដ្ឋរស់នៅក្រុងប៉េកាំង ក្នុងសង្កាត់ចំណាស់មួយ ដោយគ្មានពាក់ម៉ាសការពារ។ ការចុះជួបដើម្បីបង្ហាញពីភាពស្និទ្ធស្នាលជាមួយពលរដ្ឋ ប៉ុន្តែមិនប្រាកដថានឹងបានទទួលការស្វាគមន៍ស្មោះស្ម័គ្រឡើយ។
គេត្រូវរង់ចាំយ៉ាងហោចដល់ថ្ងៃស្អែកទើបបរិយាកាសអាចប្រសើរឡើងវិញបាន។ កំណើនខ្យល់ពុលក្នុងបរិយាកាសនេះ ដែលបើតាមអាជ្ញាធរ គឺបណ្តាលមកពីសកម្មភាពដ៏ខ្លាំងក្លារបស់មជ្ឈមណ្ឌលថាមពលដើរដោយធ្យូងថ្មក្នុងអំឡុងពេលរដូវរងា។
ចិនមហាអំណាចសេដ្ឋកិច្ចទីពីរពិភពលោក ដែលមានម៉ាស៊ីនឧស្សាហកម្មដំណើរការយ៉ាងខ្លាំងនេះ ប្រឈមមុខកាន់ញឹកញាប់ឡើងនឹងបរិយាកាសពុលខ្លាំងយ៉ាងដូច្នេះ ប៉ុន្តែជាលើកទីមួយ មានជនជាតិម្នាក់ រស់នៅក្នុងខេត្តហេបី បានសម្តែងក្តីកា្លហាន ដាក់ពាក្យបណ្តឹងទៅតុលាការប្រឆាំងនឹងអសមត្ថភាពរបស់អាជ្ញាធរក្នុងការកាត់បន្ថយផ្សែងពុល។ ពាក្យបណ្តឹងនេះមានតម្លៃជានិមិត្តរូបយ៉ាងខ្លាំង ព្រោះបញ្ហាបរិស្ថានជាសំណុំរឿងដ៏រសើបបំផុតនៅក្នុងប្រទេសកុម្មុយនិស្តដូចយ៉ាងចិននេះ។
រដ្ឋាភិបាលចិនបានចាត់វិធានការជាច្រើនក្នុងបំណងកាត់បន្ថយការបំពុលបរិយាកាស ប៉ុន្តែច្បាប់នេះពុំសូវ ឬត្រូវបានអនុវត្តតាមឡើយ។ សូមបញ្ជាក់ថាបើតាមការសិក្សាចុងក្រោយ របស់ក្រុមអ្នកឯកទេសចិន ពេលនេះផ្ទៃដីចិនចំនួន១៥% រងគ្រោះមានផ្សែងពុល ជាពិសេសខេត្តឧស្សាហកម្មនៅភាគខាងជើងនិងប៉េកាំង ហួសបទដ្ឋានសុវត្ថិភាពអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ